ກອງປະຊຸມ ພິທີເປີດໂຄງການ ສ້າງຕ່ອງໂສ້ມູນຄ່າເພີ່ມທີ່ມີຄວາມຮັບຜິດຊອບໃນອາຊີ ໂດຍຜ່ານການສົ່ງເສີມວຽກງານທີ່ມີຄຸນຄ່າ ແລະ ເປັນທຳໃນການດຳເນີນ ທຸລະກິດ ໄລຍະທີ II, ໃນວັນທີ 20 ມັງກອນ 2024, ທີ່ໂຮງແຮມ ລາວພລາຊາ, ນະຄອນຫຼວງວຽງຈັນ.

ທ່ານ ວິບູນ ສິດທິມໍລະດາ ຄະນະບໍລິຫານງານ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ທ່ານ ນາງ ດາວວະດິງ ພິລະໄຊພິທັກ, ຮອງເລຂາທິການ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ເຂົ້າຮ່ວມ ກອງປະຊຸມ ພິທີເປີດໂຄງການ ສ້າງຕ່ອງໂສ້ມູນຄ່າເພີ່ມທີ່ມີຄວາມຮັບຜິດຊອບໃນອາຊີ ໂດຍຜ່ານການສົ່ງເສີມວຽກງານທີ່ມີຄຸນຄ່າ ແລະ ເປັນທຳໃນການດຳເນີນ ທຸລະກິດ ໄລຍະທີ II, ໃຫ້ກຽດເປັນປະທານໃນພີທີເປີດໂຕໂຄງການ ຂອງ ທ່ານ ພົງໄຊສັກ ອີນຖາລາດ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ວຽງປະສີດ ທີບພະສຸດາ, ຜູ້ປະສານງານອົງການແຮງງານສາກົນ ປະຈຳ ສປປ ລາວ, ມີບັນດາ ທ່ານ ຕາງໜ້າ ຈາກສະຖານທູດ ປະຈຳລາວ, ຄະນະກົມ, ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ສູນກາງສະຫະພັນກຳມະບານລາວ, ອົງການແຮງງານສາກົນ, ພ້ອມດ້ວຍພະແນກການທີ່ກ່ຽວຂ້ອງ ແລະ ແຂກທີ່ຖືກເຊີນເຂົ້າຮ່ວມ.

ຈຸດປະສົງ ແມ່ນເປັນການເປີດໂຕໂຄງການ ທີ່ກ່ຽວກັບການສ້າງຕ່ອງໂສ້ມູນຄ່າເພີ່ມ ພາຍໃຕ້ການຮ່ວມມື ແລະ ການມີສ່ວນຮ່ວມຂອງອົງການໄຕພາຄີສາມຝ່າຍ ໃນການຈັດຕັ້ງປະຕິບັດແຜນວຽກງານ ແລະ ກິດຈະກຳ.