ຄວາມຄືບໜ້າຂອງ Work-Based Learning ( WBL ) ໃນປະເທດລາວໂດຍຜ່ານໂຄງການ ASEAN-Swiss TVET Initiative (ASTI)

ນະຄອນຫຼວງ ວຽງຈັນ, ວັນທີ 27 ມີນາ 2025 – ຄະນະຮັບຜິດຊອບຈັດຕັ້ງປະຕິບັດໂຄງການຂໍ້ລິເລີ່ມດ້ານອາຊີວະສຶກສາອາຊຽນ-ສະວິດເຊີແລນ (ASTI) ກ່ຽວກັບການຮຽນວິຊາຊີບຢູ່ສະຖານປະກອບການ (WBL) ໄດ້ຈັດກອງປະຊຸມຄັ້ງທີ 1 ປະຈໍາປີ 2025 ທີ່ໂຮງແຮມລາວພລາຊາ.

ກອງປະຊຸມດັ່ງກ່າວຈັດຂຶ້ນໂດຍ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ຮ່ວມກັບ ກົມອາຊີວະສຶກສາ (ອສ), ກອງປະຊຸມໄດ້ປະເມີນຄວາມຄືບໜ້າຂອງໂຄງການ, ສິ່ງທ້າທາຍ, ການວິເຄາະ SWOT ແລະ ຍຸດທະສາດໃນອະນາຄົດ, ໂດຍການເປັນປະທານຮ່ວມຂອງ ທ່ານ ຕິ່ງຄໍາ ສຸລີນທາ ຮອງຫົວໜ້າກົມ ອາຊີວະສຶກສາ ແລະ ທ່ານ ພູໄຊ ເທບພະວົງ ເລຂາທິການ ສຄອຊ ເປັນປະທານຮ່ວມ, ກອງປະຊຸມດັ່ງກ່າວໄດ້ເສີມຂະຫຍາຍຄວາມພະຍາຍາມໃນການປະສານງານ ແລະ ວາງແນວທາງຍຸດທະສາດໃຫ້ສອດຄ່ອງກັບເປົ້າໝາຍການພັດທະນາແຫ່ງຊາດ. ພາກສ່ວນກ່ຽວຂ້ອງໄດ້ຢືນຢັນຄືນຄວາມມຸ່ງໝັ້ນໃນການຈັດຕັ້ງປະຕິບັດໂຄງການ WBL ໃນການສ້າງບຸກຄະລາກອນທີ່ມີສີມືແຮງງານຮ່ວມກັນ.