ນະຄອນຫຼວງ ວຽງຈັນ, ສປປ ລາວ – ວັນທີ 5 ພຶດສະພາ 2025 – ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ໄດ້ຈັດພິທີເຊັນສັນຍາຮ່ວມມືກັບວິສາຫະກິດກະສິກຳທີ່ມີຊື່ສຽງ

ສອງ ແຫ່ງຄື: ສະຫະກອນ 3 ເອັຟ ກະສິກຳຍືນຍົງ ຂອງລາວ ແລະ ຈິດປັນຍາຟາມ, ໃນພິທີເຊັນບົດບັນທຶກຄວາມເຂົ້າໃຈ (MOU) ໄດ້ຈັດຂຶ້ນທີ່ຫ້ອງການ ສຄອຊ, ໃນມື້ວັນສຸກ ທີ 2 ພຶດສະພາ ທີ່ຜ່ານມາ.

ຂໍ້ລິເລີ່ມນີ້ແມ່ນຢູ່ພາຍໃຕ້ໂຄງການສົ່ງເສີມການສ້າງວຽກເຮັດງານທຳໃນຊົນນະບົດ (REP), ເຊິ່ງໄດ້ຮັບການສະໜັບສະໜູນເປັນຢ່າງດີຈາກອົງການແຮງງານສາກົນ (ILO). ການຮ່ວມມືນີ້ ແມ່ນເພື່ອແນໃສ່ເສີມຂະຫຍາຍທັກສະຊີວິດທີ່ຈຳເປັນຂອງນັກຮຽນອາຊີວະສຶກສາ ແລະ ຝຶກອົບຮົມວິຊາຊີບ (TVET) ໃນຊົນນະບົດ ແລະ ຊາວໜຸ່ມຈາກຊຸມຊົນທີ່ດ້ອຍໂອກາດ. ຈຸດສຳຄັນຂອງໂຄງການນີ້ໄດ້ສຸມໃສ່ ການສຶກສາທາງເພດຢ່າງຄົບຊຸດ, ການສ້າງຄວາມເຂັ້ມແຂງໃຫ້ຊາວໜຸ່ມ-ຍິງສາວ, ໂດຍສະເພາະເພດຍິງ ເພື່ອຮັກສາສຸຂະພາບ ຈະເລີນພັນ ແລະ ສົ່ງເສີມຄວາມສຳພັນທີ່ດີ. ສຸດທ້າຍຄື ເພີ່ມຜະລິດຕະພາບຂອງກຳລັງແຮງງານ.