ນະຄອນຫຼວງ ວຽງຈັນ, ສປປ ລາວ – ວັນທີ 23 ກໍລະກົດ 2025 – ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ແລະ ສະຖາບັນ ພັດທະນາ ສີມືແຮງງານ (ສພງ)

ພູມໃຈປະກາດເປີດຕົວໂຄງການທົດສອບ ແລະ ອອກໃບຢັ້ງຢືນສີມືແຮງງານ ພາຍໃຕ້ໂຄງການຂໍ້ລິເລີ່ມດ້ານອາຊີວະສຶກສາ ອາຊຽນ-ສະວິດເຊີແລນ ຢ່າງເປັນທາງການ. ຈັດຂຶ້ນທີ່ ໂຮງແຮມລາວເທວ ນະຄອນຫຼວງ ວຽງຈັນ, ຖືເປັນບາດກ້າວອັນສຳຄັນໃນການຍົກລະດັບຄວາມສາມາດທາງດ້ານແຮງງານຂອງລາວ.

ໂຄງການນີ້ສຸມໃສ່ການທົດສອບສີມືແຮງງານເພື່ອຮັບຮູ້ສິ່ງທີ່ໄດ້ຮຽນຜ່ານມາ (RPL) ພາຍໃນໂຄງການຮຽນວິຊາຊີບຢູ່ສະຖານປະກອບການ (WBL), ເຊິ່ງເປັນສ່ວນໜຶ່ງຂອງໂຄງການ ຂໍ້ລິເລີ່ມດ້ານອາຊີວະສຶກສາ ອາຊຽນ-ສະວິດເຊີແລນ (ASTI). ມີ​ຜູ້ຕາງໜ້າ​ຈາກ​ພາກ​ລັດ ​ແລະ ​ພາກທຸລະກິດ 50 ກວ່າ​ຄົນ​ເຂົ້າ​ຮ່ວມ, ​ໄດ້​ຍົກ​ໃຫ້​ເຫັນເຖິງ​ການ​ສະໜັບສະໜູນ​ການ​ຮ່ວມ​ມື​ທີ່ເຂັ້ມ​ແຂງ.

ໂດຍການເປັນປະທານຮ່ວມຂອງ ທ່ານ ພົງໄຊສັກ ອິນຖາລາດ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ປອ ໄຊບັນດິດ ຣາຊະພົນ ຮອງປະທານ ສຄອຊ, ແລະ ທ່ານ Jean-Gabriel Duss ອຳນວຍການພາກພື້ນຂົງເຂດແມ່ນ້ຳຂອງ ຫ້ອງການຮ່ວມມື ແລະ ກົງສຸນ ແຫ່ງປະເທດສະວິດເຊີແລນ ປະຈໍາ ສປປ ລາວ. ການເປີດຕົວຄັ້ງນີ້ ໄດ້ເນັ້ນໃຫ້ເຫັນເຖິງຄວາມສໍາຄັນຂອງການປະເມີນທັກສະສຳລັບການປັບຕົວທາງເສດຖະກິດ ແລະ ການພັດທະນາກຳລັງແຮງງານ. ຄວາມ​ຮ່ວມ​ມືລະຫວ່າງພາກ​ລັດ-ພາກທຸລະກິດ​ນີ້​ມີ​ຄວາມ​ສຳຄັນຢ່າງຍິ່ງ​ຕໍ່​ການປັບ​ທັກ​ສະໃຫ້ສອດຄ່ອງ​ກັບ​ຄວາມ​ຕ້ອງການ​ທາງ​ທຸລະ​ກິດ, ຊຸກຍູ້ຄ່າ​ແຮງ​ງານ​ທີ່​ສູງ​ຂຶ້ນ, ​ແລະ​ ສົ່ງເສີມຄວາມສາມາດໃນການ​ແຂ່ງຂັນ​ລະດັບ​ຊາດ ​ແລະ ພາກ​ພື້ນ.

ປັດຈຸບັນ, ມີຜູ້ເຂົ້າທົດສອບແລ້ວ 200 ຄົນ, ໂດຍມີເປົ້າໝາຍ 700 ຄົນ ພາຍໃນ ເດືອນສິງຫາ 2026. ໂຄງການລິເລີ່ມນີ້ ມີເປົ້າໝາຍປະກອບສ່ວນສຳຄັນໃນການພັດທະນາກຳລັງແຮງງານຂອງ ສປປ ລາວ ໃຫ້ມີທັກສະ ແລະ ສາມາດປັບຕົວໄດ້.