ການຝຶກອົບຮົມຄັ້ງນີ້ ພາຍໃຕ້ການສະໜັບສະໜູນດ້ານວິຊາການ ຂອງອົງການແຮງງານສາກົນ, ໂຄງການຮ່ວມມື ILO-China ເພື່ອສ້າງຄວາມເຂັ້ມແຂງການພັດທະນາສີມືແຮງງານໃນ ສປປ ລາວ. ໂດຍມີຈຸດປະສົງ ແນໃສ່ວຽກພັດທະນາບຸກຄະລາກອນໃຫ້ມີຄຸນນະພາບຫລາຍຂື້ນ ເຊັ່ນ: ຍົກລະດັບສີມືແຮງງານໃຫ້ນັກສຶກສາທີ່ຈົບໃໝ່, ບຸກຄະລາກອນ, ຜູ້ອອກແຮງງານ ໃນສະຖານປະກອບການໃນມີຄຸນນະພາບຫລາຍຂື້ນ.

ຜູ້ເຂົ້າຮ່ວມໃນການຝຶກອົບຮົມ ປະກອບດ້ວຍທຸລະກິດ ຫຼາຍຂະແໜງການ ເປັນຕົ້ນແມ່ນ: ຂະແໜງການຂົນສົ່ງ ທີ່ ເປັນ ລະບົບບໍລິຫານຈັດການ ທີ່ ທັນສະໄໝ, ຂະແໜງການຂຸດຄົ້ນບໍ່ແຮ່, ສະຖາບັນການສຶກສາ, ຂະແໜງການບໍລິການ ບ້ານພັກ ໂຮງແຮມ, ຮ້ານອາຫານ ແຫຼ່ງທ່ອງທ່ຽວສຳຄັນ ຫຼາຍໆແຫ່ງ ແລະ ຂະແໜງການຜະລິດ, ອຸດສະຫະກຳ ທັນສະໄໝໃນເຂດເສດຖະກິດພິເສດ ສະຫວັນ – ເຊໂນ, ໄດ້ສົນທະນາ ແລະ ແລກປ່ຽນການພັດທະນາ ການຮຽນພາກປະຕິບັດຕົວຈິງທີ່ມີຄຸນນະພາບ ແລະ ການຮຽນຮູ້ຕະຫຼອດຊີວິດ ຂອງອົງການແຮງງານສາກົນ ILO , ລະບຽບການຂອງຜູ້ໃຊ້ແຮງງານ ໃນການຈັດຕັ້ງປະຕິບັດການຮຽນພາກປະຕິບັດຕົວຈິງທີ່ມີຄຸນນະພາບ ແລະ ຄໍາແນະນຳຂອງອົງການແຮງງານສາກົນ 208, ການຝຶກງານ ແລະ ການຮຽນຮູ້ແບບຄວບຄູ່ ໃນສປປ ລາວ.

ນອກຈາກນັ້ນ, ບັນດາແຂກຜູ້ເຂົ້າຮ່ວມຍັງໄດ້ປຶກສາຫາລືກ່ຽວກັບ ແຜນງານໃນອະນະຄົນເພື່ອສ້າງຄວາມເຂັ້ມແຂງໃຫ້ວິສາຫະກິດ, ສາຖາບັນການສຶກສາ ແລະ ພາກສ່ວນກ່ຽວຂ້ອງ ເພື່ອພັດທະນາສີມືແຮງງານທີ່ມີຄຸນນະພາບ ແລະ ເພື່ອເພີ່ມຜົນຜະລິດໃຫ້ໄດ້ມາດຕະຖານ ຕາມຄວາມຕ້ອງການຂອງຕະຫຼາດແຮງງານ ແລະ ສາມາດດຳເນີນທຸລະກິດໃຫ້ມີຄວາມໝັ້ນຄົງ ແລະ ຢືນຍົງ.