ນະຄອນຫຼວງວຽງຈັນ, ວັນທີ 5 ກໍລະກົດ 2018. ກອງປະຊຸມທຸລະກິດລາວຄັ້ງທີ 11 ໄດ້ຈັດຂືຶ້ນ ຢ່າງ ເປັນທາງການ ໃນວັນທີ ວັນທີ 5 ກໍລະກົດ 2018 ທີ່ໂຮງແຮມ ດອນຈັນ ພາເລສ ນະຄອນຫຼວງວຽງຈັນ ເພື່ອປຶກສາຫາລືກ່ຽວກັບ ຄວາມຄືບໜ້າໃນການແກ້ໄຂ ບັນຫາຂໍ້ຫຍຸ້ງຍາກຕ່າງໆ ທີ່ພາກທຸລະກິດປະສົບ ແລະ ແຜນການຂອງ ລັດຖະບານ ໃນການ ປັບປຸງສະພາບແວດລ້ອມການດໍາເນີນທຸລະກິດໃນ ສປປລາວ.

ການຈັດກອງປະຊຸມເຄິ່ງມື້ໃນຄັ້ງນີ້ ແມ່ນເປັນການຮ່ວມມືກັນລະຫວ່າງ ກະຊວງອຸດສາຫະກໍາ ແລະ ການຄ້າ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ເຊິ່ງໄດ້ມີຜູ້ເຂົ້າຮ່ວມຫຼາຍກ່ວາ 400 ຄົນຈາກພາກທຸລະກິດ, ພາກລັດຖະບານ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາ. ກອງປະຊຸມທຸລະກິດລາວໃນຄັ້ງນີ້ ແມ່ນໄດ້ຮັບກຽດເປັນປະທານຮ່ວມ ໂດຍ ພະນະ ທ່ານ ທອງລຸນ ສີສຸລິດ ນາຍົກ ລັດຖມົນຕີແຫ່ງ ສປປລາວ, ທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ, ແລະ ທ່ານ ອຸເດດສຸວັນນະວົງ ປະທານ ສຄອຊ.

ພະນະທ່ານ ນາຍົກ ໄດ້ມີຄໍາເຫັນຕໍ່ ກອງປະຊຸມກ່ຽວກັບ ຜົນສໍາເລັດທີ່ສໍາຄັນ ຂອງ ລັດຖະບານ ໃນການຮັກສາສະເຖຍລະພາບທາງດ້ານ ເສດຖະກິດມະຫາພາກ, ການຫຼຸດຜ່ອນຄວາມທຸກຍາກ, ການລວມກຸ່ມທາງດ້ານເສດຖະກິດ, ແລະ ການປັບປຸງສະພາບແວດລ້ອມທຸລະກິດ. ພະນະທ່ານ ນາຍົກ ທອງລຸນ ສີສຸລິດ ຍັງໄດ້ເນັ້ນໜັກ ເຖິງ ຄວາມຈໍາເປັນ ໃນການສົ່ງເສີມ ການພັດທະນາພາກທຸລະກິດໃຫ້ມີຄວາມເຂັ້ມແຂງ ໂດຍຜ່ານຂະບວນການ ປັບປຸງກອບກົດໝາຍ ແລະ ລະບຽບການຕ່າງໆ ທີ່ຕິດພັນກັບການດໍາເນີນທຸລະກິດໃນ ສປປລາວ ໂດຍໄດ້ກ່າວວ່າ “ທາງລັດຖະບານ ແມ່ນໄດ້ເຫັນໄດ້ເຖິງ ບົດບາດຄວາມສໍາຄັນຂອງພາກທຸລະກິດເພື່ອ ໃຫ້ທາງພາກລັດຖະບານສາມາດ ບັນລຸເປົ້າໝາຍ ການພັດທະນາດ້ານເສດຖະກິດ-ສັງຄົມ, ແລະ ຈະນໍາໃຊ້ເອົາ ກອງປະຊຸມທຸລະກິດລາວນີ້ ເປັນເວທີ ປຶກສາຫາລື ລະຫວ່າງພາກລັດ ແລະ ພາກທຸລະກິດ ແລະ ຈະໝຸນໃຊ້ກອງປະຊຸມນີ້ໃຫ້ເປັນເຄື່ອງມືທີ່ມີປະສິດທິພາບໃນການກໍານົດ ແລະ ແກ້ໄຂບັນຫາ ທີ່ກ່ຽວຂ້ອງກັບການສ້າງຕັ້ງທຸລະກິດ ແລະ ຂໍ້ຫຍຸ້ງຍາກທີ່ເປັນອຸປະສັກໃນການນຂະຫຍາຍທຸລະກິດໃນ ສປປລາວ”.

ທ່ານ ນາງ ເຂັມມະນີ ພົນເສນາ ໄດ້ກ່າວຕໍ່ທີ່ປະຊຸມວ່າ “ການປັບປຸງກົດໝາຍ ແລະ ກົດລະບຽບຕ່າງໆ ແມ່ນເປັນພຽງສ່ວນໜຶ່ງ ທີ່ຈໍາເປັນຕໍ່ການຂະຫຍາຍຕົວ ຂອງພາກທຸລະກິດເທົ່ານັ້ນ. ສິ່ງທີ່ສໍາຄັນ ແມ່ນຕ້ອງ ຮັບປະກັນວ່າ ກົດໝາຍ ແລະ ລະບຽບການຕ່າງໆນັ້ນ ແມ່ນຈະໄດ້ຮັບການຈັດຕັ້ງປະຕິບັດ ຢ່າງມີປະສິດທິພາບໃນທຸກລະດັບການຄຸ້ມຄອງບໍລິຫານຂອງພາກລັດ. ກົນໄກການປຶກສາຫາລືພາຍໃຕ້ ກອງປະຊຸມທຸລະກິດລາວນີ້ ຈະເປັນເຄື່ອງມື ທີ່ສໍາຄັນໃນການ ກວດກາຕິດຕາມ ການຈັດຕັ້ງປະຕິບັດ ທີ່ຕິດພັນ ກັບກອບກົດໝາຍ ແລະ ລະບຽບການຕ່າງໆ.”

ທ່ານ ອຸເດດ ສຸວັນນະວົງ ປະທານ ສຄອຊ ກໍ່ໄດ້ກ່າວມີຄໍາເຫັນຕໍ່ທີ່ປະຊຸມກ່ຽວກັບບົດບາດຄວາມສໍາຄັນຂອງ ກອງປະຊຸມທຸລະກິດລາວ ໃນການປັບປຸງສະພາບ ແວດລ້ອມທຸລະກິດວ່າ “ຕັ້ງແຕ່ຜົນສໍາເລັດກອງປະຊຸມ ທຸລະກິດລາວຄັ້ງທີ 10, ພາກທຸລະກິດແມ່ນສາມາດເຫັນໄດ້ວ່າ ຂະບວນການປຶກສາຫາລື ລະຫວ່າງພາກລັດ ແລະ ພາກທຸລະກິດ ແມ່ນໄດ້ຮັບການປັບປຸງຂຶ້ນ ໃນທຸກລະດັບ. ເປັນຕົ້ນແມ່ນເຫັນໄດ້ວ່າ ທາງພາກລັດ ແມ່ນໄດ້ມີຄວາມເອົາໃຈໃສ່ໃນການແກ້ໄຂບັນຫາຂອງພາກທຸລະກິດຢ່າງເປັນຮູບປະທໍາ.” ຫຼັງຈາກຜົນສໍາເລັດຂອງ ກອງປະຊຸມ ທຸລະກິດລາວ ຄັ້ງທີ 10 ໃນວັນທີ 28 ມີນາ 2017, ແມ່ນມີ 4 ບັນຫາບູລິມະສິດທີ່ໄດ້ຮັບການແກ້ໄຂເກືອບສົມບູນແລ້ວ ແລະບັນຫາທີ່ີໄດ້ມີຄວາມຄືບໜ້າທີ່ດີ ໃນການແກ້ໄຂ ມີ 7 ບັນຫາ. ໃນກອງປະຊຸມໃນຄັ້ງນີ້ ແມ່ນມີ 3 ກຸ່ມບັນຫາໃຫຍ່ທີ່ໄດ້ຍົກມາປຶກສາຫາລືກັນຄື: ກຸ່ມບັນຫາອາກອນສໍາລັບທຸລະກິດມີ 2 ບັນຫາຄື: ບັນຫາການສົ່ງຄືນເງິນອາກອນມູນຄ່າເພີ່ມ ແລະ ບັນຫາອາກອນຊົມໃຊ້ອິນເຕີເນັດ; ກຸ່ມບັນຫາການອຳນວຍຄວາມສະດວກດ້ານການຄ້າ ແລະ ການຂົນສົ່ງໃນ ສປປ ລາວ ມີ 4 ບັນຫາຄື: ບັນຫາ ການນໍາເຂົ້າສິນຄ້າ ແລະ ວັດຖຸດິບ ທີ່ໄດ້ຮັບການຍົກເວັ້ນພາສີ ແລະ ອາກອນມູນຄ່າເພີ່ມ ພາຍໃຕ້ກົດໝາຍສົ່ງເສີມການລົງທຶນ ຕ້ອງຜ່ານຫຼາຍຂອດຂັ້ນ ແລະ ໃຊ້ເວລາຫຼາຍ, ການນໍາເຂົ້າ ສິນຄ້າ ຜ່ານດ່ານປະເພນີ ທີ່ມີລັກສະນະການຄ້າ, ລາຄາຂົນສົ່ງສິນຄ້າພາຍໃນ ແລະ ຕ່າງປະເທດແພງ, ແລະ ຂັ້ນຕອນການຂໍອະນຸຍາດຂົນສົ່ງ ສໍາລັບການຂົນສົ່ງສິນຄ້າຜ່ານແດນ; ແລະ ບັນຫາ ອຸປະສັກຕໍ່ການພັດທະນາຂະແໜງການທ່ອງທ່ຽວ. ໜ່ວຍງານພາກລັດທີ່ກ່ຽວຂ້ອງ ແລະ ຕ່າງໜ້າພາກທຸລະກິດ ແມ່ນໄດ້ເຫັນຕົກລົງດີ ຮັບຮອງເອົາ ຫຼາຍມາດຕະການ ເພື່ອຫາແນວທາງໃນການແກ້ໄຂບັນຫາທີ່ຖືກ ສະເໜີໃນກອງປະຊຸມໃນຄັ້ງນີ້.

ພາຍຫຼັງກອງປະຊຸມຄັ້ງນີ້ ຄາດວ່າທາງລັດຖະບານ ຈະອອກ ໜັງສືແຈ້ງການ ເປັນຄໍາແນະນໍາລາຍລະອຽດ ເພື່ອຕິດຕາມການແກ້ໄຂບັນຫາທີ່ຍົກຂຶ້ນພາຍໃຕ້ ຂະບວນການ ປຶກສາຫາລື ຂອງກອງປະຊຸມທຸລະກິດລາວ. ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ກ່າວປິດກອງປະຊຸມ ວ່າ ທາງພາກລັດຖະບານ ຈະນໍາເອົາບັນຫາຕ່າງໆທີ່ໄດ້ຖືກຍົກຂຶ້ນໃນກອງປະຊຸມໃນຄັ້ງນີ້ ໄປພິຈາລະນາ ແລະ ຍັງໄດ້ເນັ້ນໜັກ ເຖິງຄວາມຈໍາ ເປັນທີ່ໃຫ້ມີການສືບຕໍ່ ກົນໄກປຶກສາຫາລືທີ່ສ້າງສັນນີ້ ຕໍ່ໄປໃນອະນາຄົດ. ກອງປະຊຸມທຸລະກິດລາວ ຖືກສ້າງຕັ້ງຂຶ້ນ ໃນເດືອນ ມີນາ ປີ 2005 ໂດຍເປັນການຮ່ວມມືກັນ ລະຫວ່າງ ອົງການ ການເງິນສາກົນ (IFC) ແລະ ກະຊວງແຜນການ ແລະ ການລົງທຶນ (MPI). ອົງການ IFC ຮັບໜ້າທີ່ຊີ້ນໍາກອງເລຂາ ແຕ່ປີ 2005 ຈົນຮອດ ປີ 2010. ຫຼັງຈາກນັ້ນ ສຄອຊ ແມ່ນມີໜ້າທີ່ຮັບຜິດຊອບໃນການຊີ້ນໍາກອງເລຂາ ໃນການປະສານງານ ແລະ ການອໍານວຍຄວາມສະດວກ. ມາຮອດກາງປີ 2015, ກະຊວງອຸດສາຫະກໍາ ແລະ ການຄ້າ ແມ່ນຖືກມອບໝາຍ ແທນກະຊວງ ແຜນການ ແລະ ການລົງທຶນໃຫ້ເປັນຈຸດປະສານງານຂອງ ພາກລັດຖະບານ ເພື່ອອໍານວຍຄວາມສະດວກ ໃຫ້ກັບຂະບວນການປຶກສາຫາລື. ນັບແຕ່ປີ 2016 ເປັນຕົ້ນມາ ກອງປະຊຸມທຸລະກິດລາວ ແມ່ນໄດ້ຮັບການ ສະໜັບສະໜຸນດ້ານວິຊາການ ຈາກໂຄງການ TDF 2 ໂດຍມີ ກອງເລຂາປະຈໍາຢູ່ ສຄອຊ ມີໜ້າທີ່ເປັນຜູ້ປະສານງານ ກັບພາກທຸລະກິດ ແລະ ມີຈຸດປະສານງານພາກລັດປະຈໍາຢູ່ທີ່ ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ເຊີ່ງມີໜ້າທີ່ໃນການຊີ້ນໍາ ແລະ ຕິດຕາມສະພາບລວມ.