ພິທີເປີດສູນບໍລິການວິສາຫະກິດຂະຫນາດນ້ອຍ ແລະ ກາງແຂວງຈຳປາສັກ

ໃນວັນທີ 21 ສິງຫາ 2019 ທີ່ຜ່ານມາ, ສະພາການຄ້າ ແລະ ອຸດສາຫະກຳ ແຫ່ງຊາດລາວ ກໍ່ຄື ສູນບໍລິການ ວິສາຫະກິດຂະໜາດນ້ອຍ ແລະ ກາງ ຮ່ວມກັບ ກະຊວງ ອຸດສາຫະກຳ ແລະ ການຄ້າ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ພາຍໃຕ້ການສະໜັບສະໜູນຂອງ ໂຄງການ GIZ-Related ໄດ້ຈັດພີທີເປີດສູນບໍລິການວິສາຫະກິດຂະໜາດນ້ອຍ ແລະ ກາງ ແຫ່ງທີ່ 02 ທີ່ ນະຄອນປາກເຊ ແຂວງ ຈຳປາສັກ ຢ່າງເປັນທາງການ.

ໂດຍມີຜູ້ເຂົ້າຮ່ວມຈາກພາກລັດ ແລະ ພາກທຸລະກິດຫຼາຍກວ່າ 100 ທ່ານ, ໃຫ້ກຽດກ່າວຕ້ອນຮັບໂດຍ ທ່ານ ນາງ ບຸນເຮືອງ ແຄຣໍ ລິດດັງ ປະທານ ສະພາການຄ້າ ແລະ ອຸດສາຫະກຳ ແຂວງ ຈຳປາສັກ ແລະ ເຈົ້າພາບຈັດພິທີໃນຄັ້ງນີ້.

ພີທີຕັດແຖບຜ້າເປີດສູນ ບໍລິການ ວິສາຫະກິດຂະໜາດນ້ອຍ ແລະ ກາງ ຈຳປາສັກ ໂດຍ:

ທ່ານ ບົວສອນ ວົງສອງຄອນ ຮອງເຈົ້າແຂວງຈຳປາສັກ
ທ່ານ Jens Lutkenhrem, ເອກອັກຄະລັດຖະທູດ ສະຫະພັນເຢຍລະມັນ ປະຈຳ ສປປ ລາວ
ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ
ທ່ານ ກິແກ້ວ ຈັນທະບູລີ ຮອງລັດຖະມົນຕີ ກະຊວງ ແຜນການ ແລະ ການລົງທຶນ
ທ່ານ ດາວວອນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ
ທ່ານ ນາງ ບຸນເຮືອງ ແຄຣໍ ລິດດັງ ປະທານ ສະພາການຄ້າ ແລະ ອຸດສາຫະກຳແຂວງ ຈຳປາສັກ

ເປົ້າໝາຍເພື່ອສ້າງຂີດຄວາມສາມາດຂອງຜູ້ປະກອບການລາວ ໂດຍສະເພາະຂົງເຂດພາກໃຕ້ ແລະ ສ້າງໃຫ້ເປັນເຄື່ອງມືໃໝ່ ທີ່ດີໃນການສະໜັບສະໜູນທຸລະກິດພາຍໃນໃຫ້ມີການເຊື່ອມໂຍງເຂົ້າກັບຕ່ອງໂສ້ມູນຄ່າທັງພາຍໃນ, ພາກພື້ນ ແລະ ສາກົນທີ່ດີກວ່າເກົ່າ ພ້ອມທັງປະກອບສ່ວນເຂົ້າໃນຜົນສຳເລັດຂອງແຜນພັດທະນາເສດຖະກິດ – ສັງຄົມຂອງແຂວງ.

ເຖິງຢ່າງໃດກໍ່ຕາມ, ເປົ້າໝາຍຍຸດທະສາດຂອງ ສູນບໍລິການ ສບວ ຈສ ແມ່ນ:

ສະໜັບສະໜູນການເລີ່ມຕົ້ນທຸລະກິດ ໃນລະດັບຕ່າງໆ.
ສົ່ງເສີມການພັດທະນາຜູ້ປະກອບກິດຈະການ ສບວ ຈສ ຂອງ ແຂວງ ໃຫ້ມີການຂະຫຍາຍຕົວແບບຍືນຍົງ.
ພັດທະນາຂີດຄວາມອາດສາມາດແບບຄົບຊຸດ ເພື່ອຍົກລະດັບຄຸນນະພາບ, ເພີ່ມຜະລິດຕະພາບ ແລະ ປັບປຸງການແຂ່ງຂັນ ສບວ ຈສ ຂອງ ແຂວງ ໃນຂະແໜງສຳຄັນ.
ສະໜັບສະໜູນ ສບວ ຈສ ໃນການເຊື່ອມໂຍງເຂົ້າສູ່ໂຕ່ງໂສ້ມູນຄ່າຕະຫຼາດພາກພື້ນ ແລະ ສາກົນ.
ສົ່ງເສີມ ສບວ ຈສ ໃນການການເຂົ້າຫາຕະຫຼາດພູມມິພາກ ແລະ ຕະຫຼາດສາກົນ.
ເສີມສ້າງສັກກະຍາພາບ ແລະ ຄວາມເຂັ້ມແຂງຂອງສະຖາບັນ ສບວ ຈສ ແລະ ອົງກອນ ໃນລະດັບທ້ອງຖິ່ນ ໃຫ້ສາມາດສະໜອງບໍລິການຕາມທິດຂອງຕະຫຼາດ ແກ່ ສບວ ຈສ ຂອງແຂວງ.
ສ້າງຕັ້ງເຄື່ອຂ່າຍ ຂອງ ສບວ ຈສ ໃນລະດັບແຂວງ.
ສົ່ງເສີມການຮ່ວມມືຢ່າງໄກ້ຊິດ ກັບ ຂະແໜງສະມາຄົມອຸດສາຫະກຳ ແລະ ການຄ້າເພື່ອຮ່ວມກັນ ຍົກລະດັບ ຄວາມອາດສາມາດ ແລະ ສົ່ງເສີມການຂະຫຍາຍຕົວ ສບວ ຈສ ຂອງແຂວງ.
ສົ່ງເສີມການຮ່ວມມືຢ່າງມີປະສິດທິຜົນ ກັບ ອົງກອນດຳເນີນງານທີ່ກ່ຽວຂ້ອງ ແລະ ຄູ່ຮ່ວມພັດທະນາ.