ກອງປະຊຸມປຶກສາຫາລືພາກທຸລະກິດ ຂອງຂະແໜງການເງິນ ແລະ ທະນາຄານ ໄດ້ຈັດຂຶ້ນ ໃນວັນທີ 15 ພຶດສະພາ 2019 ເວລາ 08:00 ຫາ 12:00 ໂມງ ທີ່ ສະພາການຄ້າ ແລະ ອຸດສາຫະກໍາ ແຫ່ງຊາດລາວ

ໂດຍການເປັນ ປະທານ ຂອງ ທ່ານ ນາງ ວາລີ ເວດສະພົງ, ຮອງປະທານສະພາການຄ້າ ແລະ ອຸດສາຫະກໍາແຫ່ງ ຊາດລາວ ໃນນີ້ໄດ້ມີຜູ້ປະກອບການຈາກສະຖາບັນການເງິນຈຸລະພາກ, ທະນາຄານ, ບໍລິສັດສິນເຊື່ອ ລວມທັງກອງເລຂາຂອງກອງປະຊຸມທຸລະກິດລາວ ເຂົ້າຮ່ວມ ທັງໝົດເປັນຈໍານວນ 62 ທ່ານ.

ຈຸດປະສົງຂອງກອງປະຊຸມຄັ້ງນີ້ແມ່ນເພື່ອໃຫ້ບັັນດາທ່ານໄດ້ຮັບຟັງບົດສະເໜີຈາກຊ່ຽວຊານສາກົນດ້ານການເງິນ ແລະ ການທະນາຄານ ທ່ານ Rob Kaanen ກ່ຽວກັບບັນຫາບູລິມະສິດຂອງຂະແໜງການ ແລະ ຂໍ້ສະ  ເໜີ ເພື່ອໃຫ້ບັນດາຜູ້ເຂົ້າຮ່ວມໄດ້ມີຄໍາເຫັນເປັນເອກະພາບກັນເພື່ອຈະນຳໄປສະເໜີໃນກອງປະຊຸມທຸລະກິດລາວໃນຂັ້ນຕໍ່ໄປ.

ທ່ານ ຣອບ ຄາເນັນ ຊ່ຽວສານດ້ານສາກົນດ້ານການເງິນ ແລະທະນາຄານ ໄດ້ນຳສະເໜີ 2 ບັນຫາບູລິມະສິດທີ່ຈະນໍາສະເໜີລວມມີ:

I. ກົດລະບຽບ ແລະຂັ້ນຕອນການຈົດທະບຽນຫລັກຊັບ ແລະ ສັນຍາການກູ້ຢືມ:

1. 1. ບັນຫາ

• ການກູ້ຢືມສ່ວນຫຼາຍແມ່ນໃຊ້ໃບຕາດິນເປັນຫຼັກຊັບ
• ໃບຕາດິນຂອບທອງ ແມ່ນອອກໃຫ້ໂດຍກົມຄຸ້ມຄອງທີ່ດິນຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ
• ທຫລ ໄດ້ອອກແຈ້ງການເລກທີ 818/ຫກ ວັນທີ 27/11/2017 ເຊີ່ງຈໍາກັດການນໍາໃຊ້ໃບຢັ້ງຢືນທີ່ດິນຈາກນາຍບ້ານ (ໃບຕາດີນສີຂາວ)
• ສັນຍາເງິນກູ້ ແລະ ຫຼັກຊັບຄໍ້່າປະກັນຕ້ອງໄດ້ຮັບການຢັ້ງຢືນຈາກຫ້ອງການທະບຽນສານ ເພື່ອເປັນເອກະສານອ້າງອີງເວລາມີກໍລະນີເກີດຂໍ້ຂັດແຍ່ງຮ້ອງຟ້ອງໃນອະນາຄົດ
• ເອກະສານຄໍ້າປະກັນຫຼັກຊັບຕ້ອງໄດ້ຮັບການຢັ້ງຢືນຈາກຫ້ອງການທະບຽນສານເພື່ອໃຫ້ມີສິດພິເສດໃນຂັ້ນຕອນສານ.
• ເວລາທີ່ໃຊ້ໃນຂັ້ນຕອນທັງໝົດແມ່ນ ປະມານ 2 ຫາ 4 ອາທິດ
• ຄ່າບໍລິການຕາງໜ້າຜູ້ກູ້ຢືມ ແມ່ນ 2 to 4 ລ້ານກີບ
• ການເກັບຄ່າທໍານຽມທີ່ບໍ່ເປັນເອກະພາບ
  2. ຂໍສະເໜີ ແລະ ວິທີແກ້ໄຂ
• ຫຼຸດຜ່ອນຂັ້ນຕອນໃຫ້ງ່າຍດາຍລົງ
• ສ້າງແບບຟອມ/ຄໍາຮ້ອງ ແລະ ຂັ້ນຕອນແບບອອນໄລນ ໃນການກວດເບີ່ງຖານຂໍ້ມູນໃບຕາດິນ
• ການສະມັກຈົດທະບຽນສານຂອງສັນຍາກູ້ຢືມ ແລະ ຫຼັກຊັບຄໍ້າປະກັນຜ່ານລະບົບອອນໄລນ
• ສ້າງລະບົບການຈ່າຍຄ່າທໍານຽມຜ່ານລະບົບທະນາຄານ ແທນການຈ່າຍເປັນເງິນສົດ
• ພິຈາລະນາຄືນຄວາມຈໍາເປັນໃນການຈົດທະບຽນສານສັນຍາກູ້ຢືມ ແລະ ຫຼັກຊັບຄໍ້າປະກັນ
• ຮັບຮອງເອົາການເກັບຄ່າທໍານຽມແບບໃຫມ່ ສໍາລັບການຈົດທະບຽນສານເອກະສານສິນເຊື່ອ
• ສ້າງຖານຂໍ້ມູນສູນກາງກ່ຽວກັບຂະບວນການສານ ແລະ ຄະດີຄວາມຕ່າງໆທີ່ຕິດພັນກັບຫຼັກຊັບສິນເຊື່ອ
• ການເກັບຄ່າທໍານຽມທີ່ເປັນເອກະພາບກັນທົ່ວປະເທດສໍາລັບການຢັ້ງຢືນຈາກນາຍບ້ານຕໍ່ການປະກອບເອກະສານກູ້ຢືມ
• ພິຈາລະນາຄືນຄວາມຈໍາເປັນທີ່ຕ້ອງຈົດທະບຽນສັນຍາເງິນກູ້ ແລະ ຫຼັກຊັບຄໍ້າປະກັນຢູ່ທີ່ກົມຄຸ້ມຄອງຊັບສິນແຫ່ງລັດ
• ໃຫ້ຄວາມກະຈ່າງແຈ້ງຕື່ມກ່ຽວກັບແຈ້ງການເລກທີ 818/ຫກ ໂດຍໃຫ້ອະນຸຍາດນໍາໃຊ້ໃບຢັ້ງຢືນທີ່ດິນຈາກນາຍບ້ານໄດ້ໃນກໍລະນີສະເພາະໃດໜຶ່ງໄດ້

II. ການປັບປຸງລະບົບຂໍ້ມູນຂ່າວສານສິນເຊື່ອທີ່ຍັງບໍ່ທັນທົ່ວເຖິງ ແລະ ບໍ່ເປັນເອກະພາບກັນລະຫວ່າງສະຖາບັນການເງິນ:

1. ບັນຫາ

• ຂໍ້ຈໍາກັດໃນການຄົ້ນຫາ ແລະ ການລາຍງານຂໍ້ມູນສິນເຊື່ອ
  • ການຄົ້ນຫາຂໍ້ມູນໂດຍຜ່ານລະບົບຄູ່ມື ແຕ່ບໍ່ສາມາດເຮັດຜ່ານລະບົບຫາລະບົບໄດ້
  • ຍັງບໍ່ມີການລາຍງານຂໍ້ມູນສິນເຊື່ອທີ່ເປັນຮູບແບບມາດຖານ
• ຍັງບໍ່ມີການໃຫ້ບໍລິການທີ່ເພີ່ມເຕີມທີ່ເປັນປະໂຫຍດດ້ານອື່ນເຊັ່ນ
  • ການໃຫ້ຄະແນນສິນເຊື່ອ ແລະ ບົດລາຍງານແບບສັງລວມຂໍ້ມູນສິນເຊື່ອ
  • ບົດລາຍງານຂໍ້ມູນສິນເຊື່ອຂອງຂະແໜງການສະເພາະ
  • ບົດລາຍງານການປ່ຽນແປງຂໍ້ມູນຂອງຄະແນນສິນເຊື່ອ (A/B/C)

2. ຂໍສະເໜີ ແລະວິທີແກ້ໄຂ
   • ຕ້ອງມີການວາງແຜນຈັດຕັ້ງປະຕິບັດການຍົກລະດັບສູນຂໍ້ມູນສິນເຊື່ອເພື່ອຂະຫຍາຍການຄວບຄຸມຂໍ້ມູນໃຫ້ທົ່ວເຖິງ ແລະ ການເຊື່ອມໂຍງຂໍ້ມູນ
   • ເພີ່ມການບັງຄັບໃຊ້ກົດລະບຽບໃຫ້ເຂັ້ມງວດໃນການກວດກາມາດຕາຖານການລາຍງານຂໍ້ມູນສິນເຊື່ອໂດຍກົມຄຸ້ມຄອງທະນາຄານທຸລະກິດ
   • ການປຶກສາຫາລືກັບບັນດາສະມາຊິກເປັນໄລຍະ ເພື່ອລາຍງານຄວາມຄືບໜ້າໃນການປັບປຸງຖານຂໍ້ມູນສິນເຊື່ອ ຜ່ານຊ່ອງທາງຕ່າງໆເຊັ່ນ ຈົດໝາຍຂ່າວ ແລະ ແຈ້ງການ
   • ຄວນມີການປຶກສາກັບບັນດາຜູ້ໃຊ້ລະບົບຂໍ້ມູນສິນເຊື່ອໃນການສ້າງລະບົບຂໍ້ມູນໃໝ່
   • ການມີສ່ວນຮ່ວມຂອງຜູ້ໃຊ້ຕົວຈິງໃນການເກັບຂໍ້ມູນເພື່ອນໍາມາປັບປຸງ ໂດຍຜ່ານການສັງລວມ ແລະ ວິເຄາະຂໍ້ມູນ, ການສໍາມະນາ, ສໍາພາດ ແລະ ການເຮັດບົດສໍາຫຼວດ.
   • ໃຫ້ມີຕົວແທນຈາກຜູ້ໃຊ້ໃຫ້ມີສ່ວນຮ່ວມໃນຂະບວນການສ້າງລະບົບຂໍ້ມູນສິນເຊື່ອ ໃນການຢັ້ງຢືນຄວາມຖືກຕ້ອງຄວາມຕ້ອງການ ແລະ ເຫັນດີເປັນເອກະພາບ
   • ມີສ່ວນຮ່ວມໃນການຄັດເລືອກບໍລິສັດຜູ້ພັດທະນາ, ການສ້າງລະບົບຈໍາລອງ, ການທົດລອງໃຊ້ ແລະ ການທົດສອບການຮັບຮອງຂອງຜູ້ໃຊ້
   • ປະກອບຄໍາເຫັນຕໍ່ແຜນການຍ້າຍຂໍ້ມູນ ແລະ ການປັບປ່ຽນລະບົບໃໝ່

ພາຍຫຼັງໄດ້ຮັບຟັງຄໍາອະທິບາຍຂໍ້ຂ້ອງໃຈຕ່າງໆຈາກຊ່ຽວຊານ ທາງຜູ້ເຂົ້າຮ່ວມກອງປະຊຸມກໍ່ຄືພາກທຸລະກິດກໍ່ໄດ້ຕັ້ງໜ້າຮ່ວມກັນປະກອບຄໍາຄິດຄຳເຫັນ ແລະ ທາງຊ່ຽວຊານພ້ອມດ້ວຍກອງເລຂາ ຈະນຳໄປພິຈາລະນາ ແລະ ຄົ້ນຄວ້າຕື່ມກັບພາກສ່ວນກ່ຽວຂ້ອງ. ກອງປະຊຸມປິດລົງໃນເວລາ 12:00ໂມງ ຂອງວັນດຽວກັນ.

ດາວໂຫຼດເອກະສານ:

ບົດສະເໜີ

FinSector WG workshop (Eng)