ນະຄອນຫຼວງວຽງຈັນ – ວັນທີ 11 ມີນາ 2026, ທີ່ ໂຮງແຮມຄຣາວພາຊ່າ, ໄດ້ມີກອງປະຊຸມ ສະຫຼຸບປິດໂຄງການ “ໂຄງການສ້າງຕ່ອງໂສ້ມູນຄ່າທີ່ມີຄວາມຮັບຜິດຊອບໃນອາຊີ ໂດຍຜ່ານ ການສົ່ງເສີມວຽກທີ່ມີຄຸນຄ່າ ແລະ ເປັນທຳໃນການດຳເນີນທຸລະກິດ ໄລຍະ II”.

ທ່ານ ນາງ ດາວວະດິງ ພິລະໄຊພີທັກ, ຮອງເລຂາທິການ ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມທັງຕ່າງໜ້າຈາກຫ້ອງການ, ພະແນກທີ່ກ່ຽວຂ້ອງ ຂອງ ສຄອຊ ເຂົ້າຮ່ວມ ກອງປະຊຸມ ສະຫຼຸບປິດໂຄງການໃນຄັ້ງນີ້, ເຊິ່ງໃຫ້ກຽດເປັນປະທານກອງປະຊຸມໂດຍ ທ່ານ ພົງໄຊສັກ ອິນຖາລາດ, ຮອງລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ, ຜູ້ຊີ້ນຳວຽກງານແຮງງານ, ທ່ານ TASAKA Takuro, ອັກຄະລາຊະທູດ ຍີ່ປຸ່ນ ປະຈຳ ສປປ ລາວ, ທ່ານ ນາງ Xiaoyan QIAN, ຜູ້ອຳນວຍການ ILO ປະຈຳປະເທດໄທ, ກຳປູເຈຍ ແລະ ສປປ ລາວ ພ້ອມກັນນັ້ນກໍ່ຍັງມີບັນດາທ່ານຕາງໜ້າຈາກອົງການໄຕພາຄີສາມຝ່າຍ, ກະຊວງ ແຮງງານ ແລະ ສະຫວັດດີການສັງຄົມ, ສະພາການຄ້າ ແລະ ອຸດສາຫະກຳ ແຫ່ງຊາດລາວ, ສູນກາງສະຫະພັນກຳມະບານລາວ, ພະແນກການອອ້ມຂ້າງທີ່ກ່ຽວຂ້ອງຈາກອົງການສາມຝ່າຍ, ອົງການແຮງງານສາກົນ ILO ແລະ ແຂກທີ່ຖືກເຊີນເຂົ້າຮ່ວມ.

ຈຸດປະສົງຂອງກອງປະຊຸມກໍ່ແມ່ນເພື່ອສະຫຼຸບປິດໂຄງການຕ່ອງໂສ້ມູນຄ່າທີ່ມີຄວາມຮັບຜິດຊອບໃນອາຊີ ໂດຍຜ່ານ ການສົ່ງເສີມວຽກທີ່ມີຄຸນຄ່າ ແລະ ເປັນທຳ ໃນ ສ ປປ ລາວ ໂດຍການມີສ່ວນຮ່ວມຂອງອົງການໄຕພາຄີສາມຝ່າຍໃນການຈັດຕັ້ງ ແລະ ປະຕິບັດເຄື່ອນໄຫວໃນແຜນວຽກງານທີ່ມີຄຸນຄ່າ ແລະ ເປັນທຳ ໃນ ສປປ ລາວ Decent Work Country Program ໂດຍການສະໜັບສະໜູນໃນການຈັດຕັ້ງ ແລະ ເຄື່ອນໄຫວຂອງອົງການແຮງງານສາກົນ ILO.