ກອງປະຊຸມວຽກງານຄຸ້ມຄອງແຮງງານ ແລະ ກອງປະຊຸມຮ່ວມອົງການສາມຝ່າຍ ໃນວັນທີ 07 ພະຈິກ 2024, ທີ່ຫ້ອງປະຊຸມ ໂຮງແຮມລາວພຣາຊ່າ, ນະຄອນຫຼວງວຽງຈັນ.

ທ່ານ ນາງ ດາວວະດີງ ພິລະໄຊພິທັກ, ຮອງເລຂາທິການ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ຜູ້ຊີ້ນຳວຽກງານພະແນກຕາງໜ້າຜູ້ໃຊ້ແຮງງານ, ສຄອຊ ພ້ອມວິຊາການທີ່ກ່ຽວຂ້ອງ ຂອງ ພະແນກພັດທະນາຜູ້ປະກອບການ ແລະ ກິດຈະກຳຕາງໜ້າຜູ້ໃຊ້ແຮງງານ, ສຄອຊ ໄດ້ເຂົ້າຮ່ວມກອງປະຊຸມວຽກງານຄຸ້ມຄອງແຮງງານ ແລະ ກອງປະຊຸມຮ່ວມອົງການສາມຝ່າຍ ແລະ ນຳສະເໜີບົດໃນກອງປະຊຸມ ໂດຍພາຍໃຕ້ການເປັນປະທານ ຂອງ ທ່ານ ພົງສະຫວັນ ໄຊໂກສີ, ຫົວໜ້າກົມຄຸ້ມຄອງແຮງງານ, ກະຊວງ ແຮງງານ ແລະ ສະຫວັດດີການສັງຄົມ ໂດຍມີບັນດາ ທ່ານ ຄະນະກົມ, ຮອງກົມ, ພະແນກ ແລະ ວີຊາການທີ່ກ່ຽວຂ້ອງ ຈາກສະພາການຄ້າ ແລະ ອຸດສາຫະກຳ ແຫ່ງຊາດລາວ, ສູນກາງສະຫະພັນກຳມະບານ, ເຈົ້າໜ້າທີກວດກາແຮງງານ, ອ້ອມຂ້າງນະຄອນຫຼວງ, ເມືອງ ແລະ ມີບັນດາຊ່ຽວຊານຈາກ ສ. ເກົາຫຼີ ພາຍໃຕ້ໂຄງການໃຫ້ຄຳປືກສາແກ່ການປັບປຸງນິຕິກຳ ດ້ານແຮງງານຂອງ ສປປ ລາວ ເຂົ້າຮ່ວມສັງເກດການ ແລະ ປືກສາຫາລື ໃນກອງປະຊຸມດັ່ງກ່າວ.

ຈຸດປະສົງຂອງກອງປະຊຸມ ແມ່ນເພື່ອປືກສາຫາລື ວຽກງານຄຸ້ມຄອງແຮງງານ ແລະ ກິດຈະກຳທີ່ກ່ຽວຂ້ອງ ແລະ ການມີສ່ວນຮ່ວມ, ໃນການຈັດຕັ້ງ ແລະ ເຄື່ອນໄຫວວຽກງານຂອງກອງເລຂາຄະນະກຳມະທິການແຮງງານແຫ່ງຊາດ, ນອກນ້ັນ ກອງປະຊຸມ, ຍັງໄດ້ຮັບຟັງການນຳສະເໜີຈາກ ທາງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ສຄອຊ ແລະ ສູນກາງສະຫະພັນກຳມະບານ ຕໍ່ວຽກງານຄຸ້ມຄອງແຮງງານ ແລະ ວຽກງານທີ່ຕິດພັນກັບການພັດທະນາແຮງງານ.