ໃນວັນທີ 12 ຕຸລາ 2021, ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບ ຄະນະກໍາມະທິການສຶກສາທິການນະຄອນຊົງຊິ້ງ, ວິິທະຍາໄລຝີມືແຮງງານນະຄອນຊົງຊິ້ງ ແລະ ກົມອະຊີວະສຶກສາ, ກະຊວງສຶກສາທິການ ແລະ ກິລາ ສປປ ລາວ ໄດ້ເປີດຊຸດ “ຝຶກອົບຮົມ ທາງອອນໄລ ໃນຫົວຂໍ້“ ການນໍາໃຊ້ Big data ເຂົ້າໃນລະບົບການຄ້າທາງອີເລັກໂທຣນິກ”ສໍາລັບຜູ້ບໍລິຫານລະດັບກາງ ແລະ ລະດັບສູງ

 ໂດຍໄດ້ຮັບການສະໜັບສະໜູນຈາກ ໂຄງການທຶນການສຶກສາເສັ້ນທາງສາຍໄໝສໍາລັບນັກຮຽນຕ່າງປະເທດຂອງນະຄອນຊົງຊີ້ງ, ໃຫ້ກຽດ ເຂົ້າຮ່ວມ ເປັນຄະນະປະທານເປີດການຝຶກອົບຮົມ ໂດຍ

ທ່ານ ອຸເດດສຸວັນນະວົງ, ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (LNCCI),

ທ່ານ ຫຼີ ປິ່ນ ຫົວໜ້າພະແນກຮ່ວມື ແລະ ແລກປ່ຽນສາກົນ, ຄະນະກຳມະທິການສຶກສາທິການນະຄອນຊົງຊິ້ງ,

ທ່ານ ສຸມານາ ຈຸນລະມະນີ, ຫົວໜ້າກົມນະວັດຕະກຳເຕັກໂນໂລຊີວິຊາຊີບ, ກະຊວງໂທລະຄົມມະນາຄົມ ແລະ ເຕັກໂນໂລຊີ,

ທ່ານ ສົມລິດ ວິຣະວົງ, ຮອງຫົວໜ້າກົມ ອາຊີວະສຶກສາ, ກະຊວງສຶກສາທິການ ແລະ ກິລາ ແລະ ມີຜູ້ເຂົ້າຮ່ວມຝຶກອົບຮົມຫຼາຍກວ່າ 60 ຄົນ

ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເພື່ອເປັນການຈັດກິດຈະກຳໜຶ່ງໃນການຫັດແໜ້ນສາຍພົວພັນການຮ່ວມມືລະຫວ່າງ ລາວ – ຈີນ ເນື່ອງໃນໂອກາດຄົບຮອບສາຍພົວພັນທາງການທູດລະຫວ່າງ ສປປ ລາວ ແລະ ສປ ຈີນ ຄົບຮອບ 60 ປີ, ພ້ອມດຽວກັນນັ້ນກໍ່ເພື່ອແລກປ່ຽນບົດຮຽນນໍານະຄອນຊົງຊິ້ງ, ສປ ຈີນກ່ຽວກັບການບໍລິການດ້ານການສຶກສາ ແລະ ການຝຶກອົບຮົມທີ່ມີຄຸນນະພາບ, ຊຸກຍູ້ສົ່ງເສີມການນໍາໃຊ້ເຕັກໂນໂລຍີ ເຂົ້າໃນການຈັດຕັ້ງປະຕິບັດວຽກງານ ໃນໄລຍະການດຳລົງຊີວິດຮູບແບບໃໝ່ (New Normal), ໂດຍສະເພາະແມ່ນເພື່ອເປັນການສົ່ງເສີມການສ້າງບຸກຄະລະກອນຂອງ ສປປ ລາວ ໃຫ້ມີຄວາມຮັບຮູ້, ຄວາມສາມາດ ແລະ ເຂົ້າໃຈເລິກເຊິ່ງຂຶ້ນກ່ຽວກັບການນໍາໃຊ້ Big Data ເຂົ້າໃນລະບົບການຄ້າທາງເອເລັກໂທຣນິກ ແລະ ເພື່ອໃຫ້ເຂົ້າໃຈເຕັກນິກຂອງການຕະຫຼາດໃຫ້ຫຼາຍຂຶ້ນ ເຊິ່ງຄວາມຮູ້ດັ່ງກ່າວຈະເປັນພື້ນຖານອັນໜັກແໜ້ນ ແລະ ຈະສ້າງຜົນປະໂຫຍດທີ່ສຳຄັນໃຫ້ແກ່ຜູ້ເຂົ້າຮ່ວມກໍ່ຄືຜູ້ປະກອບການໃນການນໍາໃຊ້ເຂົ້າໃນວຽກງານຕົວຈິງ, ຊ່ວຍພັດທະນາຕົນເອງ ແລະ ບໍລິສັດ ໃຫ້ມີການພັດທະນາຢ່າງຕໍ່ເນື່ອງ, ເພິ່ມທະວີຊ່ອງທາງການຮ່ວມມືທຸລະກິດການຄ້າ ກັບ ຕ່າງປະເທດ ໂດຍສະເພາະ ສປ ຈີນ ໃຫ້ນັບມື້ນັບຫຼາຍຂຶ້ນ ແລະ ເປັນສ່ວນໜຶ່ງໃນການປະກອບສ່ວນຊຸກຍູ້ສົ່ງເສີມການພັດທະນາເສດຖະກິດ ສັງຄົມຂອງປະເທດຊາດໃຫ້ນັບມື້ນັບຂະຫຍາຍຕົວ.

ການຝຶກອົບຮົມດັ່ງກ່າວຈະໄດ້ດໍາເນີນເປັນໄລຍະເວລາ 30 ວັນ