ຝຶກອົບຮົມຜູ້ປະເມີນ / ໃຫ້ຄຳປຶກສາດ້ານມາດຖານຄວາມຍືນຍົງຂອງແຜນງານລາວຍືນຍາວ ໃນວັນທີ 11-12 ພະຈິກ, 2022, ທີ່ ວັງວຽງ ທ່ານ ນາງ ສຸພາພອນ ຄຳແສນນາມ ຮອງເລຂາທິການ ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມເປັນປະທານໃນງານ ຝຶກອົບຮົມຜູ້ປະເມີນ / ໃຫ້ຄຳປຶກສາດ້ານມາດຖານຄວາມຍືນຍົງຂອງແຜນງານລາວຍືນຍາວ

ໂຄງການ SUSTOUR ລາວ ຈະຈັດຝຶກອົບຮົມໃຫ້ແກ່ພະນັກງານຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ຂັ້ນສູນກາງ ແລະ ທ້ອງຖິ່ນ, ສະມາຄົມທຸລະກິດທ່ອງທ່ຽວລາວ, ສະມາຄົມໂຮງແຮມ ແລະ ຮ້ານອາຫານລາວ ແລະ ບັນດາຜູ້ໃຫ້ຄຳປຶກສາຂອງແຜນງານທຣາເວວໄລຟ໌ ທີ່ຢູ່ໃນລາວ ເພື່ອສ້າງຄວາມສາມາດທາງດ້ານການໃຫ້ຄຳປຶກສາ ແລະ ປະເມີນຜົນບັນດາ ຈູນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ທີ່ເຂົ້າຮ່ວມໂຄງການເພື່ອຂໍການຢັ້ງຢືນຄວາມຍືນຍົງຂອງແຜນງານລາວຍືນຍາວ. ແຜນງານການຢັ້ງຢືນຄວາມຍືນຍົງນີ້ໄດ້ຮັບການຮ່າງ ແລະ ສ້າງຂຶ້ນໂດຍໂຄງການ SUSTOUR ລາວໂດຍການປຶກສາລືຮ່ວມກັບ 200 ກ່ວາພາກສ່ວນທີ່ນອນຢູ່ໃນຕ່ອງໂສ້ອຸດສາຫະກຳການທ່ອງທ່ຽວລາວ ແລະ ອີງຕາມມາດຖານຂອງແຜນງານທຣາເວວໄລຟ໌.

ຝຶກອົບຮົມນີ້ຈະສ້າງຄວາມສາມາດໃຫ້ແກ່ພະນັກງານຂອງສະພາການຄ້າ ແລະ ອຸດສາຫະກຳ, ບັນດາສະມາຄົມ ແລະ ຜູ້ທີ່ໃຫ້ຄຳປຶກສາ ໃຫ້ສາມາດ ປະເມີນ ແລະ ໃຫ້ຄຳປຶກສາດ້ານຄວາມຍືນຍົງຂອງຈູນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ທີ່ນອນຢູ່ໃນຂະແໜງ ຄົມມະນາຄົມ ແລະ ຂົນສົ່ງ, ອາຫານ ແລະ ເຄື່ອງດື່ມ, ເຄື່ອງຫັດຖະກຳ ແລະ ຂອງທີ່ລະນຶກ ແລະ ການທ່ອງທ່ຽວຮູບແບບວັດທະນະທຳ.

ຝຶກອົບຮົມນີ້ຈະໃຊ້ເວລາຢູ່ 2 ວັນ, ມື້ທີ 1 ແມ່ນຈະຈັດໃນຮູບແບບທິດສະດີ ແລະ ການຮຽນຮູ້ພາຍໃນຫ້ອງຝຶກອົບຮົມ ແລະ ມື້ທີ 2 ແມ່ນການລົງປະຕິບັດຕົວຈິງໃນສະຖານທີ່. ຈະມີນາຍແປພາສາຕະຫຼອດການຝຶກອົບຮົມ.