ໃນກອງປະຊຸມໄດ້ປຶກສາຫາລືກ່ຽວກັບການປັບປຸງການຈັດຕັ້ງຂອງສະມາຄົມໃຫ້ມີຄວາມສອດຄ່ອງກັບວຽກງານຕົວຈິງຂອງສະພາບປັດຈຸບັນ, ໄດ້ປຶກສາຫາລືືວາງແຜນບາງວຽກງານຈຸດສຸມຂອງສະມາຄົມໃຫ້ມີການຈັດຕັ້ງວຽກງານຂອງສະມາຄົມໃຫ້ແທດເໝາະກັບສະພາບຄວາມຮຽກຮ້ອງຕ້ອງການຂອງເສດຖະກິດ-ສັງຄົມໃນປັດຈຸບັນ ທັງເປັນການຈັດຕັ້ງຜັນຂະຫຍາຍທິດທາງນະໂຍບາຍຂອງລັດຖະບານ ໂດຍສະເພາະແມ່ນການຈັດຕັ້ງປະຕິບັດວາລະແຫ່ງຊາດ ຈັດຕັ້ງສົ່ງເສີມສະມາຊິກຂອງຕົນເພີ່ມທະວີການຜະລິດເພື່ອທົດແທນການນຳເຂົ້າ ແລະ ຜະລິດເພື່ອເປັນສິນຄ້າສົ່ງອອກ ແລະ ກຽມພ້ອມທາງດ້ານການຜະລິດສະບຽງອາຫານເພື່ອການເປັນເຈົ້າພາບກອງປະຊຸມອາຊຽນໃນປີ 2024 ທີ່ຈະມາເຖິງນີ້.

ທ່ານ ບຸນທ່ຽງ ລັດຕະນະວົງ ຮັກສາການປະທານສະມາຄົມ ຜະລິດ ແລະ ປຸງແຕ່ງກະສິກຳລາວ ໄດ້ກ່າວວ່າ: “ການປັບປຸງການຈັດຕັ້ງແມ່ນອີງໃສ່ຄວາມສອດຄ່ອງໃນການປະຕິບັດວຽກງານຕົວຈິງໂດຍການໄດ້ເຊີນເອົາຜູ້ປະກອບການທີ່ລົງເລິກ ວຽກງານຕົວຈິງໃນແຕ່ລະຂະແໜງການຂອງທຸລະກິດກະສິກຳມາເຮັດວຽກຮ່ວມກັນ ເພາະວ່າຂະແໜງການທຸລະກິດກະສິກຳແມ່ນກວມເອົາຫຼາຍວຽກງານເຊັ່ນ: ປູກຝັງ, ລ້ຽງສັດ-ປະມົງ ແລະ ການປຸງແຕ່ງກະສິກຳ ເຊິ່ງແຕ່ລະຂະແໜງກໍ່ມີຈຸດພິເສດ, ມີທ່າແຮງ ແຕກຕ່າງກັນ. ດັ່ງນັ້ນ, ການທີ່ເຊີນເອົາຜູ້ປະກອບການທີ່ລົງເລິກໃນແຕ່ລະສາຍງານມາເຮັດວຽກຮ່ວມກັນຈະເຮັດໃຫ້ສາມາດຊ່ວຍຜູ້ປະກອບການໄດ້ຖືກຈຸດ ແລະ ທັງເປັນການເຕົ້າໂຮມເອົາບັນດາຜູ້ປະກອບການໃນແຕ່ລະສາຍງານໃຫ້ເປັນກຳລັງແຮງໄດ້ດີ”. ທ່ານ ບຸນທ່ຽງ ລັດຕະນະວົງ ຍັງໄດ້ກ່າວຕໍ່ວ່າ ກ່ຽວກັບແຜນງານຈຸດສຸມຂອງສຸມາຄົມແມ່ນຈະໄດ້ປັບປຸງແຜນງານໃນໄລຍະສັ້ນ, ໄລຍະກາງ ແລະ ໄລຍະຍາວ ເວົ້າສະເພາະແມ່ນແຜນງານໄລຍະສັ້ນ ສະມາຄົມຈະເອົາໃຈໃສ່ສ້າງຄວາມເຂັ້ມແຂງໃຫ້ແກ່ການຈັດຕັ້ງສະມາຄົມໃຫ້ເປັນສູນລວມ ແລະ ເປັນຕົວແທນຂອງຜູ້ປະກອບການທຸລະກິດກະສິກຳຢ່າງແທ້ຈິງ, ຈະເພີ່ມທະວີການປະສານສົມທົບເຮັດວຽກຮ່ວມກັບອົງການຈັດຕັ້ງພາກລັດ ສະຖາບັນສຶກສາ, ສະຖາບັນຄົ້ນຄວ້າຕ່າງໆ, ສະຖາບັນການເງິນ ແລະ ພົວພັນທາງດ້ານຕະຫຼາດທັງພາຍໃນ ແລະ ຕ່າງປະເທດ.

ໃນຕອນທ້າຍ ທ່ານ ບຸນເລີດ ຫຼວງປະເສີດ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ຜູ້ຊີ້ນຳວຽກງານທຸລະກິດກະສິກຳ ໄດ້ມີຄວາມເຫັນຊີ້ນຳວ່າ: “ໃຫ້ສະມາຄົມຈັດຕັ້ງນຳພາ-ຊ່ວຍເຫຼືອບັນດາຜູ້ປະກອບການຢ່າງຕໍ່ເນືືອ່ງ ແລະ ລົງເລິກທຸລະກິດໃນແຕ່ລະສາຍການຜະລິດ-ປຸງແຕ່ງກະສິກຳ ໃຫ້ທຸລະກິດກະສິກຳມີຄວາມເຂັ້ມແຂງ ແລະ ເປັນກຳລັງແຮງໃນການປະກອບສ່ວນສ້າງຄວາມໝັ້ນຄົງທາງດ້ານສະບຽງອາຫານ ແລະ ໃຫ້ກາຍເປັນຂະແໜງການໜຶ່ງໃນການກ້າວໄປເປັນສິນຄ້າສົ່ງອອກໃຫ້ຫຼາຍຂຶ້ນ”.