ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ໃນນາມ ກອງເລຂາກອງປະຊຸມທຸລະກິດລາວ, ໄດ້ຈັດກອງປະຊຸມໜ່ວຍງານປຶກສາຫາລືພາກທຸລະກິດ ສໍາລັບຂະແໜງ ການຄ້າຂື້ນ ພາຍໃຕ້ກົນໄກກອງປະຊຸມທຸລະກິດລາວ

ໃນວັນທີ 16 ສິງຫາ 2024, ທີ່ ຫ້ອງປະຊຸມ ສະພາການຄ້າ ແລະ ອຸດສາຫະກໍາ ແຫ່ງຊາດລາວ.

ກອງປະຊຸມດັ່ງກ່າວແມ່ນໄດ້ຮັບກຽດ ເປັນປະທານໂດຍ ທ່ານ ວັນທອງ ສິດທິກຸນ, ຮອງປະທານ ສຄອຊ ຫົວໜ້າໜ່ວຍງານປຶກສາຫາລືຂະແໜງການຜະລິດ. ຈຸດປະສົງຂອງກອງປະຊຸມ ແມ່ນເພື່ອໃຫ້ຜູ້ປະກອບການໃນຂະແໜງການຄ້າ ປຶກສາຫາລືບັນຫາ ທີ່ເປັນຂໍ້ຫຍຸ້ງຍາກໃນການດໍາເນີນທຸລະກິດຂອງຕົນໃຫ້ໜ່ວຍງານປຶກສາຫາລືຮັບຊາບ ແລະ ເພື່ອຄັດຈ້ອນເອົາບັນດາຂໍ້ຫຍຸ້ງຍາກທີ່ເປັນບູລິມະສິດຂອງຂະແໜງການ ກະກຽມນໍາສະເໜີໃຫ້ແກ່ຂະແໜງການທີ່ກ່ຽວຂ້ອງຂອງພາກລັດ ພິຈາລະນາແກ້ໄຂ.

ກອງປະຊຸມຄັ້ງນີ້ມີຜູ້ເຂົ້າຮ່ວມຫຼາຍກວ່າ 30 ທ່ານ ລ້ວນມາຈາກຫຼາຍພາກສ່ວນຂອງຂະແໜງການການຄ້າ ເຊັ່ນ: ສະມາຄົມການຢາ, ດາວທຽມລາວ, ຍານພະຫານະ, ສູນການຄ້າ.  ນອກນັ້ນ, ຍັງມີສະພາການຄ້າຕ່າງປະເທດ Australian Chamber of Commerce ແລະ Brtish Businss Group Lao. ບັນຫາທີ່ຜູ້ປະກອບການ ຂະແໜງການຄ້າ ໄດ້ປຶກສາຫາລືໃນກອງປະຊຸມຄັ້ງນີ້

1. ຄ່າບໍລິການຂອງທ່າບົກໃນ ສປປ ລາວ
2. ການອໍານວຍຄວາມສະດວກໃຫ້ແກ່ການແຈ້ງພາສີ
3. ການປັບປຸງອັດຕາອາກອນມູນຄ່າເພີ່ມຂອງ ບາງປະເພດສິນຄ້າໃນຂະແໜງການຢາ
4. ບັນຫາດ້ານແຮງງານຂາດແຄນ
5. ການແຂ່ງຂັນຈາກສິນຄ້ານໍາເຂົັ້າ ທີີ່ບໍ່ຖືກຕ້ອງຕາມກົດລະບຽບ
6. ການກໍານົດນະໂຍບາຍສົົ່ງເສີມການຜະລິດພາຍໃນ
7. ສະພາບ ການຜັນຜວນຂອງອັດຕາແລກປ່ຽນ ແລະ ການອ່ອນຄ່າຂອງເງິນກີບ

ພາຍຫຼັງກອງປະຊຸມນີ້, ກອງເລຂາກອງປະຊຸມທຸລະກິດລາວ ທີ່ປະຈໍາຢູ່ສະພາການຄ້າ ແລະ ອຸດສາຫະກໍາ ແຫ່ງຊາດລາວ ຮ່ວມກັບ ໜ່ວຍງານປຶກສາຫາລື ຂະແໜງການຜະລິດ, ຈະໄດ້ຮວບຮວມບັນຫາບູລິມະສິດ ທີ່ຜູ້ເຂົ້າຮ່ວມໄດ້ສະເໜີ ແລະ ກະກຽມບົດສະເໜີບັນຫາ ເພື່ອສົ່ງໃຫ້ຂະແໜງການທີ່ກ່ຽວຂ້ອງຂອງພາກລັດ ຄົ້ນຄວ້າ ແລະ ກະກຽມສໍາລັບກອງປະຊຸມປຶກສາຫາລືລະຫວ່າງ ພາກລັດ ແລະ ພາກທຸລະກິດ ໃນຂັ້ນຕໍ່ໄປ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການ ທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດ ໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.