ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ນຳໂດຍ ທ່ານ ອຸເດດ ສຸວັນນະວົງ, ປະທານ ສຄອຊ ໄດ້ນຳພາຄະນະບໍລິຫານງານ ພ້ອມດ້ວຍນັກທຸລະກິດ ຈຳນວນ 54 ທ່ານ

ເດີນທາງຕິດຕາມຄະນະທາງການ ຂອງ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ໃນການເດີນທາງຢ້ຽມຢາມຢ່າງເປັນທາງການ, ທີ່ ປະເທດ ຍີ່ປຸ່ນ, ໃນລະຫວ່າງວັນທີ 20-23 ທັນວາ 2024

ໃນໂອກາດດັ່ງກ່າວນີ້ ຄະນະປະທານ ແລະ ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ໄປຢ້ຽມຢາມ ແລະ ພົບປະກັບສະພາການຄ້າ ແລະ ອຸດສາຫະກຳ ຄາວາສະກິ ໃນວັນທີ 21 ມັງກອນ 2025, ທີ່ ສະພາການຄ້າຄາວາສະກິ, ເມືອງຄາວາສະກິ, ປະເທດ ຍີ່ປຸ່ນ, ເຊິ່ງຕ້ອນຮັບໂດຍ ທ່ານ goro kusakabe ປະທານ ສະພາການຄ້າ ແລະ ອຸດສາຫະກຳ ຄາວາສະກິ ພ້ອມດ້ວຍຄະນະ, ຝ່າຍລາວນໍາໂດຍ ທ່ານ ອຸເດດ ສຸວັນນະວົງ, ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມດ້ວຍ ຄະນະບໍລິຫານງານ ສຄອຊ

ຈຸດປະສົົງຂອງການພົບປະຢ້ຽມຢາມໃນຄັ້ງນີ້ແມ່ນເພື່ອສືບຕໍ່ປຶກສາຫາລືວຽກງານລະຫວ່າງສອງສະພາການຄ້າ ໃນປີ 2025 ແລະ ລົງເລິກປຶກສາຫາລືການເພີ່ມທະວີການຮ່ວມກັນມືຈັດຕັ້ງປະຕິບັດການຝຶກອົບຮົມ Bookkeeping, ລວມເຖິງການອອກໃບຢັ້ງຢືນໃຫ້ແກ່ວິສາຫະກິດ ຫຼື ຜູ້ທີ່ມີຄວາມສົນໃຈຂອງລາວໃນອານາຄົດ ເຊິງເປັນການຮ່ວມມື ລະຫວ່າງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ສະພາການຄ້າ ແລະ ອຸດສາຫະກຳ ຄາວາສະກິ, ມະຫາວິທະຍາໄລ ແຫ່ງຊາດລາວ ແລະ ມະຫາວິທະຍາໄລເຊັນຊູ, ພ້ອມດຽວກັນນັ້ນກໍ່ເພື່ອເປັນການສົ່ງເສີມການຮ່ວມມື ແລະ ແລກປ່ຽນກັນໃນອານາຄົດໃຫ້ຫຼາຍຂຶ້ນຂອງທັງສອງສະພາການຄ້າ ກໍຄືທັງສອງທຸລະກິດລາວ-ຍີ່ປຸ່ນ.