ທ່ານ Juerge Merz, ຜູ້ປະສານງານລະດັບທະວີບອາຊີ ແລະ ຜູ້ປະສານງານລະດັບພາກພື້ນປະຈຳປະເທດບັງກະລາເທດ ແລະ ສປປ ລາວ ຮ່ວມກັບ ທ່ານ Jesper Lauridsen, ຜູ້ອໍານວຍການ HELVETAS ປະຈໍາ ສປປ ລາວ ໄດ້ພົບປະກັບ ທ່ານ ປອ. ໄຊບັນດິດ ຣາຊະພົນ ຮອງປະທານ ສຄອຊ, ແລະ ທ່ານ ພູໄຊ ເທບພະວົງ ເລຂາທິການ ສຄອຊ ພ້ອມດ້ວຍຄະນະ ທີ່ຫ້ອງການ ສຄອຊ ນະຄອນຫຼວງ ວຽງຈັນ.

ຈຸດສຳຄັນຂອງການປຶກສາຫາລື:

• ພາລະ ບົດບາດຂອງ ສຄອຊ ໃນຖານະເປັນຂົວຕໍ່ລະຫວ່າງພາກລັດ ແລະ ພວກທຸລະກິດ – ເປັນຕົວແທນຂອງພາກທຸລະກິດ ແລະ ຕາງໜ້າຜູ້ໃຊ້ແຮງງານ ລວມທັງການຂັບເຄື່ອນການພັດທະນາຊັບພະຍາກອນມະນຸດຜ່ານໂຄງການ Upskill ແລະ Reskill ໃນ ສປປ ລາວ.

• ຄວາມຄືບໜ້າຂອງ ການຮຽນວິຊາຊີບຢູ່ສະຖານປະກອບການ (WBL) ພາຍໃຕ້ຂໍ້ລິເລີ່ມດ້ານອາຊີວະສຶກສາ ອາຊຽນ-ສະວິດເຊີແລນ/ASEAN-Swiss TVET Initiative (ASTI) – ລາຍງານຄວາມຄືບໜ້າຂອງໂຄງການ ແນໃສ່ພັດທະນາສີມືແຮງງານໃຫ້ມີທັກສະ ຕອບສະໜອງຄວາມຕ້ອງການຂອງພາກອຸດສາຫະກຳ.

• ໂອກາດໃນການຂະຫຍາຍການຮ່ວມມືໃນອານາຄົດ – ຄົ້ນຫາໂອກາດການຮ່ວມມືເພີ່ມເຕີມກັບໂຄງການຕ່າງໆຂອງ HELVETAS ທີ່ກ່ຽວຂ້ອງກັບພາກທຸລະກິດ ແລະ ການສຶກສາອາຊີວະສຶກສາ.

ກອງປະຊຸມຄັ້ງນີ້ໄດ້ຢືນຢັນຄວາມມຸ່ງໝັ້ນຮ່ວມກັນລະຫວ່າງ ສຄອຊ ແລະ HELVETAS ໃນການພັດທະນາສີມືແຮງງານໃຫ້ມີຄຸນນະພາບ ແລະ ເສີມສ້າງຄວາມສາມາດໃນການແຂ່ງຂັນຂອງ ສປປ ລາວ ໂດຍຜ່ານການຮ່ວມມືລະຫວ່າງພາກລັດ-ພາກທຸລະກິດ.