ນະຄອນຫຼວງ ວຽງຈັນ, ສປປ ລາວ – ວັນທີ 28 ພຶດສະພາ 2025 – ຫ້ອງການສະພາທີ່ປຶກສາອາຊີວະສຶກສາ(NTC-PO) ໄດ້ຈັດກອງປະຊຸມວິຊາການ ເປັນ

ເວລາ 3 ວັນ, ໂດຍເຕົ້າໂຮມເອົາຜູ້ຕາງໜ້າຈາກກະຊວງຫຼັກແຫຼ່ງ ແລະ ພາກທຸລະກິດ ຈໍານວນ 24 ທ່ານ ຮ່ວມກັນພັດທະນາ 4 ມາດຕະຖານອາຊີບ ເພື່ອສະໜັບສະໜູນໂຄງການ ຮຽນວິຊາຊີບຢູ່ສະຖານປະກອບການ (WBL) ພາຍໃຕ້ໂຄງການ ຂໍ້ລິເລີ່ມດ້ານອາຊີວະສຶກສາ ອາຊຽນ-ສະວິດເຊີແລນ (ASTI).

ກອງປະຊຸມວິຊາການຄັ້ງນີ້ມີ ທ່ານ ຕິ່ງຄຳ ສຸລິນທາ, ຮອງຫົວໜ້າ ກົມອາຊີວະສຶກສາ (ກົມ ອສ), ກະຊວງສຶກສາທິການ ແລະ ກິລາ (ສສກ), ແລະ ທ່ານ ພູໄຊ ເທບພະວົງ, ເລຂາທິການ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ເປັນປະທານຮ່ວມ ໂດຍມີຈຸດປະສົງເພື່ອເສີມສ້າງຄວາມເຂັ້ມແຂງທາງດ້ານນິຕິກຳ ແລະ ເຄື່ອງມືທີ່ຈຳເປັນ ໃນການຈັດຕັ້ງປະຕິບັດ ໂຄງການ ຮຽນວິຊາຊີບຢູ່ສະຖານປະກອບການ (WBL) ຢ່າງມີປະສິດທິຜົນ.

ຈຸດສຳຄັນຕ່າງໆທີ່ສຸມໃສ່ລວມມີ ການພັດທະນາຄູ່ມື, ມາດຕະຖານອາຊີບແຫ່ງຊາດ, ຫຼັກສູດອາຊີວະສຶກສາ. ບູລິມະສິດແມ່ນອາຊີບໃນຂະແໜງທີ່ມີຄວາມຕ້ອງການສູງ ເຊັ່ນ: ການຄຸ້ມຄອງສິນຄ້າຄົງຄັງ, ການບໍລິການລູກຄ້າ, ຊ່າງເຄື່ອງຈັກ-ເຄື່ອງມື, ແລະ ຊ່າງສ້ອມແປງລົດໄຟຟ້າ. ຄວາມພະຍາຍາມຮ່ວມມືດັ່ງກ່າວເປັນບາດກ້າວສຳຄັນໃນການເສີມສ້າງຄວາມພ້ອມຂອງກຳລັງແຮງງານຢູ່ລາວ.