ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບ ຫ້ອງການກອງທຶນປະກັນສັງຄົມແຫ່ງຊາດ ສ້າງຄວາມເຂົ້າໃຈກ່ຽວກັບວຽກງານປະກັນສັງຄົມ ໃຫ້ແກ່ສະມາຊິກ ສຄອ ແຫ່ງຊາດລາວ

ເພື່ອສ້າງຄວາມຮັບຮູ້ ແລະ ເຂົ້າໃຈ ຕໍ່ກັບວຽກງານປະກັນສັງຄົມ ໃຫ້ແກ່ບັນດາຫົວໜ່ວຍທຸລະກິດ ທີ່ຂື້ນກັບ ສຄອ ແຫ່ງຊາດລາວ ໃນຕອນເຊົ້າຂອງວັນທີ 30 ຕຸລາ 2018 ທີ່ ຫ້ອງປະຊຸມ ສຄອ ແຫ່ງຊາດລາວ ໄດ້ມີກອງປະຊຸມ ປຶກສາຫາລື ແລະ ຖອດຖອນບົດຮຽນ ໃນການຈັດຕັ້ງປະຕິບັດວຽກງານປະກັນສັງຄົມພາຍໃຕ້ກົດໝາຍປະກັນສັງຄົມ ສະບັບເລກທີ 34/ສພຊ ສຳລັບ ສະມາຊິກ ສຄອຊ ໂດຍການເປັນປະທານຂອງ ທ່ານ ວັນທອງ ສິດທິກຸນ ຮອງປະທານ ສຄອ ແຫ່ງຊາດລາວ ແລະ ທ່ານ ເພັດສະໝອນ ສຸກທະວີພອນ ຮອງຜູ້ອຳນວຍການ ຫ້ອງການກອງທຶນປະກັນສັງຄົມແຫ່ງຊາດ ແລະ ເຂົ້າຮ່ວມກອງປະຊຸມມີ ຜູ້ຕ່າງໜ້າຈາກລັດວິສາຫະກິດ, ທະນາຄານ, ສະຖາບັນການເງິນຈຸລະພາກ, ສະມາຄົມ, ກຸ່ມບໍລິສັດ, ຄຣີນິກ, ນອກນັ້ນຍັງມີຄະນະອຳນວຍການ, ຄະນະພະແນກ ຂອງຫ້ອງການກອງທຶນປະກັນສັງຄົມແຫ່ງຊາດ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມທັງໝົດ 86 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ ກໍ່ເພື່ອເປັນການກະຕຸ້ນ ໃຫ້ແກ່ສະມາຊິກປະກັນສັງຄົມກໍ່ຄືພະນັກງານຢູ່ໃນບັນດາຫົວໜ່ວຍວິສາຫະກິດ ທີ່ເປັນສະມາຊິກ ສຄອຊ ເຫັນໄດ້ຄວາມສຳຄັນຕໍ່ກັບວຽກງານດັ່ງກ່າວພາຍໃຕ້ກົດໝາຍ. ຊຶ່ງພາຍຫຼັງປະທານກ່າວເປີດພິທີ, ທ່ານ ເພັດສະໝອນ ສຸກທະວີພອນ ຮອງຜູ້ອຳນວຍການ ຫ້ອງການກອງທຶນປະກັນສັງຄົມແຫ່ງຊາດ ໄດ້ສະເໜີພາບລວມກ່ຽວກັບຄວາມສຳຄັນຂອງການປະກັນສັງຄົມ, ຈາກນັ້ນ ພາຍໃນກອງປະຊຸມໄດ້ຮັບຟັງການບັນຍາຍກ່ຽວກັບກົດໝາຍວ່າດ້ວຍການປະກັນສັງຄົມ ເວົ້າລວມເວົ້າສະເພາະ ກໍ່ຄືສິດຜົນປະໂຫຍດທີ່ຈະໄດ້ຮັບໃນເວລາເຂົ້າເປັນສະມາຊິກປະກັນສັງຄົມ ໂດຍການຂື້ນບັນຍາຍຂອງ ທ່ານ ນາງ ດວງເດືຶອນ ຈັນທະວົງ ຫົວໜ້າພະແນກປະຊາສຳພັນ ຂອງ ຫກປຊ, ເຊິ່ງທ່ານ ໄດ້ສະແດງໃຫ້ເຫັນພາບລວມຂອງລະບົບປະກັນສັງຄົມໃນລາວ, ການຈັດສັນກອງທຶນ ພ້ອມທັງລົງເລິກໃນແຕ່ລະປະເພດການອຸດໜູນທີ່ປະກັນສັງຄົມໃຫ້ການຄຸ້ມຄອງ ເຊັ່ນ: ອຸດໜູນອຸປະຕິເຫດແຮງງານ ແລະ ພະຍາດຊິບ, ອຸດໜູນປິ່ນປົ່ວສຸຂະພາບ, ອຸດໜຸນອອກລູກ ຫຼື ຫຼຸລູກ, ອຸດໜູນປ່ວຍການ, ອຸດໜູນເສຍອົງຄະ, ອຸດໜູນບຳນານ, ອຸດໜູນເສຍຊີວິດ, ອຸດໜູນສະມາຊິກຄອບຄົວຜູ້ເສຍຊີວິດ ແລະ ອຸດໜູນວ່າງງານ; ພາຍຫຼັງການບັນຍາຍສິ້ນສຸດ, ປະທານໄດ້ເປີດໂອການໃຫ້ຜຸ້ເຂົ້າຮ່ວມແລກປ່ຽນຖາມ-ຕອບ ກ່ຽວກັບບັນຫາສົນໃຈເພີ່ມຕື່ມ. ກອງປະຊຸມປຶກສາຫາລື ແລະ ຖອດຖອນບົດຮຽນໃນການຈັດຕັ້ງປະຕິບັດວຽກງານປະກັນສັງຄົມ ພາຍໃຕ້ກົດໝາຍວ່າດ້ວຍການປະກັນສັງຄົມ ໄດ້ປິດລົງໃນຕອນບ່າຍຂອງມື້ດຽວກັນ.