ໃນວັນທີ 19 ມິຖຸນາ 2020 ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ), ທ່ານ ປອ ໄຊບັນດິດ ຮາຊະພົນ ຮອງປະທານກວດກາ ສຄອຊ ພ້ອມດ້ວຍຄະນະ ລົງຢ້ຽມຢາມ ໂຮງງານ ວິເຄເຄ ອຸດສາຫະກຳ ຈຳກັດ ເພື່ອເປັນການຊຸກຢູ້ ໃຫ້ກຳລັງໃຈ ສົ່ງເສີມການຜະລິດພາຍໃນໃຫ້ເຕີບໂຕ ແລະ ທົດແທ່ນການນຳເຂົ້າໃນອານາຄົດ.

ໃນການຢ້ຽມຢາມຄັ້ງນີ້ໄດ້ຮັບຟັງການລາຍງານ ຈາກ ທ່ານ ບຸນທະວົງ ບຸນເລີດ ປະທານ ໂຮງງານ ວີເຄເຄ ອຸດສາຫະກຳ ຈຳກັດ ກ່ຽວກັບປະຫວັດຄວາມເປັນມາຂອງ ໂຮງງານ ທີ່ເລິມດຳເນີນທຸລະກິດ ໄດ້ພົບ ຂໍ້ສະດວກ ແລະ ຂໍ້ຫຍຸງຍາກ ໃນການດຳເນີນທຸລະກິດ, ການພັດທະນາສ້າງໂຮງງານຈົນເຖິງປະຈຸບັນ, ນອກຈາກນີ້ ຍັງໄດ້ລາຍງານກ່ຽວກັບ ຜົນກະທົບຂອງ ພະຍາດ ໂຄວິດ 19 ທີ່ສົ່ງຜົນກະທົບຕໍ່ໂຮງງານພໍສົມຄວນເຮັດໃຫ້ຍອດການຂາຍຫຼຸດລົງໂດຍສະເພາະແມ່ນລູກຄ້າລາຍນ້ອຍຂາດໄປເຖິງ 70%. ເຖິງແນວໃດກໍຕາມທາງ ໂຮງງານຍັງດຳເນີນສືບຕໍ່ພັດທະນາຜະລິດຕະພັນໃຫ້ມີຄຸນນະພາບ, ຄວາມສະດວກໃນການນຳໃຊ້ ເພື່ອຕອບສະຫນອງຄວາມຕ້ອງການຂອງລູກຄ້າ.