ໃນລະຫວ່າງ ​ວັນ​ທີ 16-18 ທັນວາ 2020 ຜ່ານມາ ສູນບໍລິການອາຊີວະສຶກສາແບບຄວບຄູ່ ທີ່​ສະ​ພາ​ການ​ຄ້າ ແລະ ອຸດ​ສາ​ຫະ​​ກຳແຫ່ງ​ຊາດ​ລາວ (ສອຄຊ) ໄດ້​ຈັດຊຸຸດ​ຝຶກ​ອົບ​ຮົມ​ຫົວຂໍ້: “ຄູຝຶກໃນສະຖານປະກອບການ”.

ໃຫ້ກັບບັນດາຫົວໜ່ວຍທຸລະກິດ ທີ່ເປັນສະມາຊິກຂອງ ສຄອຊ ໂດຍການເປັນປະທານຂອງ ທ່ານ ປອ ໄຊບັນດິດ ຣາຊພົນ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ທັງເປັນຮອງຫົວໜ້າຄະນະຊີ້ນໍາ ສູນບໍລິການອາຊີວະສຶກສາແບບຄວບຄູ່. ຊຸດຝຶກອົບຮົມມີຜູ້ເຂົ້າຮ່ວມທັງໝົດ 14 ທ່ານ ຍິງ 6 ທ່ານ.

ຈຸດປະສົງຂອງການຝຶກອົບຮົມ ແມ່ນເພື່ອສ້າງຂີດຄວາມສາມາດ ໃນດ້ານບົດບາດ ແລະ ໜ້າທີ່ການເປັນຄູຝຶກໃນສະຖານປະກອບການ, ການບໍລິຫານຈັດການ ການຮຽນ-ການສອນຂອງຜູ້ໃຫ່ຍ, ການວິເຄາະໜ້າວຽກ ແລະ ຄວາມຕ້ອງການການຮຽນຮູ້, ການວາງແຜນ ແລະ ກະກຽມການຝຶກອົບຮົມ, ທັກສະໃນການດໍາເນີນການຝຶກອົບຮົມ, ການປະເມີນຜົນ ແລະ ພັດທະນາການຝຶກອົບຮົມ ຢ່າງມີປະສິດທິຜົນ.

ການຝຶກອົບຮົມຫົວຂໍ້ “ຄູຝຶກໃນສະຖານປະກອບການ” ຄັ້ງນີ້ແມ່ນເປັນຊຸດທົດລອງ ດໍາເນີນການຝຶກອົບຮົມໂດຍ ຄູຝຶກຕົ້ນແບບສ້າງໂດຍໂຄງການຮ່ວມມືລະດັບພູມມີພາກເພື່ອສົ່ງເສີມຄຸນນະພາບຂອງອາຊີວະສຶກສາ ທີ່ເນັ້ນໃສ່ຄວາມຕ້ອງການຂອງຕະຫລາດແຮງງານ (RECOTVET) ແລະ ໄດ້ອີງໃສ່ມາດຕະຖານສໍາລັບຄູຝຶກໃນສະຖານປະກອບການ ໃນປະເທດອາຊຽນ ໃນການສ້າງເນື້ອໃນຊຸດຝຶກອົບຮົມ.

ທ່ານ ປອ ໄຊບັນດິດ ຣາຊພົນ ໄດ້ເນັ້ນໜັກເຖິງຈຸດປະສົງຂອງການຝຶກອົບຮົມວ່າ: “ການຝຶກອົບຮົມດັ່ງກ່າວ ແມ່ນເພື່ອປຶກສາຫາລືແລກປ່ຽນບົດຮຽນກ່ຽວກັບຄວາມຮູ້ ຄວາມເຂົ້າໃຈກ່ຽວກັບບົດບາດຂອງຄູຝຶກໃນສະຖານປະກອບການ ແລະ ເຊື່ອມສານການຈັດຕັ້ງປະຕິບັດອາຊີວະສຶກສາແບບຄວບຄູ່ ເຂົ້າໃນການພັດທະນາ ແລະ ສ້າງສີມືແຮງງານ ພ້ອມທັງສົ່ງເສີມການສ້າງວຽກເຮັດງານທໍາ”.