ພາຍໃນກອງປະຊຸມໄດ້ປຶກສາຫາລື ເພື່ອເສີມສ້າງການຮ່ວມມືລະຫວ່າງ ສະພາການຄ້າ ແລະ ອຸດສາຫະກຳ ແຫ່ງຊາດລາວ (LNCCI) ແລະ ສະພາການຄ້າ ແລະ ອຸດສາຫະກຳອົດສະຕາລີ ປະຈຳ ສປປ ລາວ (Aus Cham Lao) ໂດຍການປຶກສາຫາລືຂອງທັງສອງຝ່າຍ ແລະ ສຳຫຼວດໂອກາດໃນການເປັນພັນທະມິດຮ່ວມກັນເພື່ອສົ່ງເສີມການຄ້າ ແລະ ການລົງທຶນລະຫວ່າງອົດສະຕາລີ ແລະ ສປປ ລາວ, ເພື່ອເປັນສ່ວນໜື່ງຂອງຄວາມມຸ່ງໝັ້ນຢ່າງຕໍ່ເນື່ອງຂອງລັດຖະບານອົດສະຕາລີໃນການເສີມສ້າງຄວາມສຳພັນທາງດ້ານເສດຖະກິດກັບອາຊີຕາເວັນອອກສ່ຽງໃຕ້ ພາຍໃຕ້ຍຸດທະສາດທຸລະກິດອາຊີຕາເວັນອອກສ່ຽງໃຕ້ຕໍ່ປີ 2040. ເຊິ່ງສະຖານທູດອົດສະຕາລີ ປະຈຳ ສປປ ລາວ ມີຄວາມຍິນດີທີ່ຈະຫາລືຄົ້ນຄວ້າຫາໂອກາດໃໝ່ໆໃນການຮ່ວມມືກັບສະພາການຄ້າ ແລະ ອຸດສາຫະກຳ ແຫ່ງຊາດລາວ.

ພາຍໃຕ້ຍຸດທະສາດທຸລະກິດອາຊີຕາເວັນອອກສ່ຽງໃຕ້, ລັດຖະບານອົດສະຕາລີຈະໃຫ້ການສະໜັບສະໜູນໂຄງການຕ່າງໆທີ່ສົ່ງເສີມຄວາມຮ່ວມມືທາງທຸລະກິດ ແລະ ສະໜັບສະໜູນການລົງທຶນຂອງບໍລິສັດເອກະຊົນອົດສະຕາລີໃນປະເທດລາວ. ນອກຈາກນີ້ຍັງໄດ້ປຶກສາຫາລື ໃນການຈັດກິດຈະກຳການສ້າງເຄືອຂ່າຍ (Networking Event) ລະຫວ່າງ ລາວ-ອົດສະຕາລີ ຮ່ວມກັນ ບໍ່ວ່າຈະເປັນຂະແໜງກະສິກຳ, ຂົນສົ່ງ, ການຄ້າ, SME ພ້ອມທັງປັບປຸງມາດຕະຖານໃນການສົ່ງອອກສິນຄ້າຈາກລາວສູ່ອົດສະຕາລີອິກດ້ວຍ.