ນະຄອນຫຼວງວຽງຈັນ – ວັນທີ 13 ມີນາ 202, ທີ່ ໂຮງແຮມ ຄຣາວ ພລາຊາ. ໄດ້ມີກອງປະຊຸມເຜີຍແຜ່: “ການດໍາເນີນທຸລະກິດຢ່າງມີຄວາມຮັບຜິດຊອບໃນພາກປະຕິບັດ ບົດຮຽນທີ່ດີຂອງວິສາຫະກິດໃນ ສປປ ລາວ”.

ທ່ານ ປອ. ໄຊບັນດິດ ຣາຊະພົນ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ທັງເປັນ ຜູ້ຊີ້ນຳວຽກງານຕາງໜ້າຜູ້ໃຊ້ແຮງງານ ແລະ ອຸດສາຫະກຳ ຂອງ ສຄອຊ ໃຫ້ກຽດເປັນປະທານໃນທີ່ປະຊຸມຮ່ວມກັບ ທ່ານ ນາງ ຢູກິ ໂຄບາຍາຊິ ຜູ້ປະສານງານແຜນງານ ຈາກ ອົງການແຮງງານສາກົນ (ILO) ພ້ອມກັນນັ້ນ, ທ່ານຍັງມີຜູ້ຕາງໜ້າຈາກອົງການໄຕພາຄີສາມຝ່າຍກໍ່ຄື ກະຊວງແຮງງານ ແລະ ສະຫວັດດີການສັງຄົມ, ຈາກສະຫະພັນກຳມະບານລາວ, ສະພາການຄ້າ ແລະ ອຸດສາຫະກຳ ແຫ່ງຊາດລາວ, ຕາງໜ້າຈາກວິສາຫະກິດ ແລະ ສະມາຄົມທຸລະກິດ ເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນເພືອເສີມສ້າງຂີດຄວາມສາມາດໃຫ້ແກ່ວິສາຫະກິດລາວ ກໍຄືຜູ້ປະກອບການ ໂດຍນຳໃຊ້ “ຖະແຫຼງການ MNE” ເປັນຂອບແນວທາງໃນການປະຕິບັດ ເພື່ອສ້າງຄວາມຮັບຮູ້: ເພີ່ມຄວາມເຂົ້າໃຈກ່ຽວກັບ “ຖະແຫຼງການ MNE” ເພື່ອເປັນເຄື່ອງມືພັດທະນາທຸລະກິດຢ່າງມີຄວາມຮັບຜິດຊອບ (RBC), ເຜີຍແຜ່ບົດຮຽນຕົວຈິງ: ຜ່ານການນໍາສະເໜີ ກໍລະນີສຶກສາ ຂອງວິສາຫະກິດລາວ ທີ່ໄດ້ຫັນເອົາມາດຕະຖານສາກົນ ມາເປັນການປະຕິບັດຕົວຈິງໃນບ່ອນເຮັດວຽກ ແລະ ຊຸກຍູ້ ການຮຽນຮູ້ລະຫວ່າງກັນ ເພື່ອໃຫ້ບັນດາ ຜູ້ປະກອບການ ຫລື ຜູ້ໃຊ້ແຮງງານ ໄດ້ແລກປ່ຽນທັດສະນະ ແລະ ສົ່ງເສີມການຮ່ວມມືລະຫວ່າງສາມຝ່າຍ ເພື່ອສ້າງວຽກງານທີ່ມີຄຸນຄ່າ.