ຫຼາຍຫົວໜ່ວຍທຸລະກິດໃຫ້ການສະໜັບສະໜູນ ງານຜະລິດຕະພັນລາວ 2020 (Made in Laos 2020). ເພື່ອຊຸກຍູ້ສົ່ງເສີມການຜະລິດເປັນສິນຄ້າ,​ ພ້ອມທັງເປັນການສົ່ງເສີມຜູ້ປະກອບການ ໃຫ້ໄດ້ມີເວທີ ໂຄສະນາ ແລະ ຈຳໜ່າຍ ສິນຄ້າຂອງຕົນ  ແລະ ເພື່ອກະຕຸ້ນການຊື້ຂາຍ, ຊ່ວຍຟື້ນຟູເສດຖະກິດຈາກຜົນກະທົບການແຜ່ລະບາດເຊື່ອພະຍາດ COVID-19 ໃນໄລຍະຜ່ານມາ.

ງານຜະລິດຕະພັນລາວ 2020 (Made in Laos 2020) ຈະໄດ້ຈັດຂື້ນ ໃນລະຫວ່າງວັນທີ 25/12/2020 – 03/01/2021 ທີ່ ສູນວາງສະແດງສິນຄ້າ ລາວ-ໄອເຕັກ (ຕືກເກົ່າ).

 ໃນຕອນເຊົ້າຂອງວັນທີ 21 ທັນວາ 2020 ໄດ້ມີພິທີ ມອບເງິນສະໜັບສະໜູນງານຜະລິດຕະພັນລາວ 2020 ເຊິ່ງ ພິທີດັ່ງກ່າວເຂົ້າຮ່ວມ ແລະ ມອບໂດຍ ຜູ້ຕາງຫນ້າ ຈາກແຕ່ລະບໍລິສັດ ເຊິ່ງມີດັ່ງນີ້: ທ່ານ ນາງ ລິດທິດາ ມະນີວົງ ຫົວຫນ້າພິທີການ ແລະ ການຕະຫລາດ ຈາກ ກຸ່ມບໍລິສັດ ດາວເຮືອງ, ທ່ານ ພອນສະຫວັນ ອຸດົມ ຫົວຫນ້າພະແນກຂໍ້ມູນຂ່າວສານ ແລະ ປະຊາສຳພັນ ລັດວິສາຫະກິດໄຟຟ້າລາວ, ທ່ານ ສຸລິໂຍ ວົງດາລາ ອໍານວຍການ ບໍລິສັດ ໂລກ້າ ຈຳກັດ, ທ່ານ ນາງ ບຸນສະຫວັນ ໄຊສິດ ຫົວຫນ້າພັດທະນາທຸລະກິດ ທະນາຄານ ຊາຄອມແບັງ ລາວ  ຮັບໂດຍ ທ່ານ ນາງ ຈັນທະຈອນ ວົງໄຊ, ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ, ທີ່ ສະພາການຄ້າ ແລະ ອຸດສາຫະກຳແຫ່ງຊາດລາວ.