ໃນວັນທີ 17 ພະຈິກ 2021 ທີ່ ເມືອງດຸໄບ ປະເທດ ສະຫະລັດ ອາຣັບອາມີເຣດ, ໄດ້ມີພິທີສະເຫຼີມສະຫຼອງວັນລາວ (Lao National Day) ໃນງານວາງສະແດງໂລກ Expo 2020 Dubai. ໃນນາມລັດຖະບານລາວເຂົ້າຮ່ວມໂດຍ ທ່ານ ປອ. ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ ແລະ ພາກທຸລະກິດ.

ງານວາງສະແດງໂລກ EXPO 2020 Dubai ເປັນເວທີອັນສໍາຄັນ ໃຫ້ແກ່ລັດຖະບານ ຂອງ ສປປ ລາວ ໃນການນໍາສະເໜີ ຜົນສຳເລັດການພັດທະນາເສດຖະກິດ ແລະ ສັງຄົມ ໃນໄລຍະຜ່ານມາ, ພິເສດ ແມ່ນຈະນຳສະເຫນີໂອກາດໃນການພັດທະນາຂະແໜງການຕ່າງໆຂອງ ສປປ ລາວ ໂດຍປິ່ນອ້ອມ ຫົວຂໍ້ ການສົ່ງເສີມ ຜ້າຝ້າຍແພໄໝລາວ. ສະນັ້ນ, ເພື່ອໃຫ້ແທດເໝາະກັບຫົວຂໍ້ຂອງງານດັ່ງກ່າວ ທີ່ວ່າ: “Connecting mind creating the future ການເຊື່ອມສານສາຍໃຈ ເພື່ອອະນາຄົດທີ່ສົດໃສ” ໂດຍສະເພາະຢູ່ໃນ Mobility District, ສປປ ລາວ ຈະນໍາສະເໜີ ຂະບວນວິວັດການພັດທະນາຂອງຊາດ ນັບຕັ້ງແຕ່ບູຮານນະການ ຈົນເຖິງປະຈຸບັນ, ໂດຍສະເພາະ ແມ່ນນຳສະເຫນີໂອກາດໃນການພັດທະນາຂອງລາວ ຄຽງຄູ່ກັບການອະນຸລັກວັດທະນະທໍາ ແລະ ສົ່ງເສີມການຜະລິດກະສິກຳປຸງແຕ່ງ, ສິນຄ້າຫັດຖະກຳ ຜ້າຝ້າຍແພໄໝລາວເປັນສິນຄ້າເພື່ອສົ່ງອອກ, ພ້ອມກັນນັ້ນ, ຍັງຈະໄດ້ນໍາເອົາເວທີດັ່ງກ່າວ ເປັນບ່ອນຊອກຫາຄູ່ຮ່ວມພັດທະນາ, ແກ້ໄຂໃນສິ່ງທີ່ທ້າທາຍທີ່ກໍາລັງປະສົບພົບພໍ້.