ນະຄອນຫຼວງ ໂກລົມໂບ, ປະເທດສີລັງກາ,  ໃນວັນທີ 23- 25 ກໍລະກົດ 2025. ທ່ານ ວິບູນ ສິດທິມໍລະດາ, ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ)

ພ້ອມທີມງານວິຊາການ ສຄອຊ ໄດ້ເຂົ້າຮ່ວມກອງປະຊຸມຄະນະໃນລະດັບພາກພື້ນ ກ່ຽວກັບການເປັນຄູ່ຮ່ວມຂອງ Asian Preparedness partnership (APP) ສຳລັບວຽກງານໄພພິບັດ ໃນວັນທີ 23- 25 ກໍລະກົດ 2025 ທີ່ນະຄອນຫຼວງ ໂກລົມໂບ, ປະເທດສີລັງກາ ໂດຍມີຕ່າງໜ້າຄະນະຈາກກົມສັງຄົມສົງເຄາະ, ກະຊວງແຮງງານ ແລະ ສະຫວັດດີການສັງຄົມ, ຕາງໜ້າ ຄະນະຈາກ ຫ້ອງການປະສານງານອົງການຈັດຕັ້ງທາງສັງຄົມລາວ, ໂຄງການ ແລະ ຄູ່ຮ່ວມງານໃນບັນດາປະເທດທີ່ກ່ຽວຂ້ອງ ເຂົ້າຮ່ວມ ຫຼາຍກວ່າ 150 ຄົນ.

ຈຸດປະສົງຂອງກອງປະຊຸມ ໃນຄັ້ງນີ້ແມ່ນເປົ້າໝາຍການຮ່ວມມືແບບຍືນຍົງເພື່ອກ້າວໄປສູ່ອະນາຄົດຂອງຄູ່ຮ່ວມມືການກະກຽມແຫ່ງຊາດ ແລະ ຜູ້ມີສ່ວນຮ່ວມທີ່ສໍາຄັນຈາກ 07 ປະເທດທີ່ເປັນສະມາຊິກຂອງ Asian Preparedness partnership (APP) APP.

ກອງປະຊຸມຄັ້ງນີ້ແມ່ນໄດ້ສ້າງເວທີສົນທະນາ ເພື່ອແລກປ່ຽນຄວາມຄືບໜ້າ, ແບ່ງປັນ ແລະ ໄຈ້ແຍກສິ່ງທ້າທາຍ ແລະ ຊອກຫາໂອກາດໃນການເສີມຂະຫຍາຍ ແລະ ຍືນຍົງຂອງການຮ່ວມມືການກະກຽມແຫ່ງຊາດ NPPs ແລະ ນຳສະເໜີແຜນການມີສ່ວນຮ່ວມກິດຈະກຳໃນຕໍ່ໜ້າ ໃນທົ່ວເຄືອຂ່າຍ APP ກ່ຽວກັບວຽກງານກະກຽມຕອບໂຕ້ສຸກເສີນ, ຮັບມື ຂອງໄພພິບັດ ແລະ ນອກນັ້ນ, ສ້າງໂອກາດອັນສຳຄັນໃຫ້ແກ່ການສົນທະນາໃນແບ່ງປັນຄວາມເຂົ້າໃຈ ແລະ ປຶກສາຫາລືກ່ຽວກັບວິທີການກ້າວໄປໜ້າໃນການຊຸກຍູ້ແຜນຍຸດທະສາດ ຂອງບັນດາປະເທດທີ່ພວມພັດທະນາໃນທະວີບອາຊີ ແລະ ພາກພື້ນປາຊີຟິກ.