ໃນຄໍ່າຄືນຂອງ ວັນທີ 10 ມີນາ 2021, ທີ່ ໂຮງແຮມ ແລນມາກ, ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ)  ຮ່ວມກັບ ບໍລິສັດ ເບຍລາວ ຈໍາກັດ

ໄດ້ຈັດງານລ້ຽງ ພົບປະຜູ້ນຳ​ເຄື່ອຂ່າຍທຸລະກິດ ສຄອຊ ພາຍໃຕຫົວຂໍ້: ທັກສະການບໍລິຫານທຸລະກິດໃນໄລຍະການແຜ່ລະບາດຂອງເຊື້ອພະຍາດ COVID-19, ໂດຍການເຂົ້າຮ່ວມຂອງ ທ່ານ ປອ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ອຸເດດ ສຸວັນນະວົງ ປະທານ ສຄອຊ, ທ່ານ ສູນທອນ ພົມມະຈັກ ປະທານ ບໍລິສັດ ເບຍລາວ ຈໍາກັດ ແລະ ບັນດາແຂກຈາກພາກລັດ ແລະ ຜູ້ອຳນວຍການບໍລິສັດ ທີ່ໄດ້ເຂົ້າຮ່ວມ.  ເຊິ່ງການຈັດງານໃນຄັ້ງນີ້ແມ່ນໄດ້ຮັບການສະໜັບສະໜູນຈາກ ບໍລິສັດ ເບຍລາວ ຈໍາກັດ.

ຈຸດປະສົງຂອງງານໃນຄັ້ງນີ້ ແມ່ນເພື່ອເປັນການສ້າງເວທີໃນການພົບປະແລກປ່ຽນບົດຮຽນປະສົບການໃນການດຳເນີນທຸລະກິດ, ສ້າງເຄືອຂ່າຍທຸລະກິດ, ເພີ່ມຄວາມສາມັກຄີຮັກແພງລະຫວ່າງທຸລະກິດກັບທຸລະກິດ ແລະ ທຸລະກິດກັບພາກລັດ. ພ້ອມດຽວກັນນັ້ນຍັງໄດ້ຮັບຟັງການນຳສະເໜີກ່ຽວກັບປະສົບການ ແລະ ຜົນສຳເລັດໃນການບໍລິຫານຂອງ ບໍລິສັດ ເບຍລາວ ຈໍາກັດ ໃນໄລຍະ 40 ກວ່າປີທີ່ຜ່ານມາ.