ກອງປະຊຸມສະຫຼຸບການຈັດຕັ້ງປະຕິບັດໂຄງການ ແລະ ປິດໂຄງການສ້າງຄວາມເຂັ້ມແຂງໃຫ້ແກ່ການຮ່ວມມືຂອງບັນດາຜູ້ມີສ່ວນຮ່ວມໃນການກຽມພ້ອມຮັບມື ແລະ ຕອບໂຕ້ ໄພພິບັດຢູ່ ສປປ ລາວ, ໃນຄັ້ງວັນທີ 26 ທັນວາ 2022, ທີ່ໂຮງແຮມ ລາວພຣາຊ່າ.

ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ໄດ້ເຂົ້າຮ່ວມ ກອງປະຊຸມສະຫຼຸບການຈັດຕັ້ງປະຕິບັດໂຄງການ ແລະ ປິດໂຄງການສ້າງຄວາມເຂັ້ມແຂງໃຫ້ແກ່ການຮ່ວມມືຂອງບັນດາຜູ້ມີສ່ວນຮ່ວມໃນການກຽມພ້ອມຮັບມື ແລະ ຕອບໂຕ້ ໄພພິບັດຢູ່ ສປປ ລາວ ໂດຍການເປັນປະທານ ຂອງທ່ານ ວົງຄຳ ພັນທະນຸວົງ, ຫົວໜ້າກົມສັງຄົມສົງເຄາະ, ກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍຄະນະພະແນກ, ວິຊາການ ຈາກ ສຄອຊ, ຕາງໜ້າ ຫ້ອງການປະສານງານອົງການຈັດຕັ້ງທາງສັງຄົມລາວ, ຜູ້ຈັດການໂຄງການຈາກສູນ ADPC ແລະ ແຂກທີ່ຖືກເຊີນເຂົ້າຮ່ວມ

ຈຸດປະສົງຂອງກອງປະຊຸມ ແມ່ນເພື່ອ ສະຫຼຸບຜົນການຈັດຕັ້ງປະຕິບັດໂຄງການ ແລະ ປິດໂຄງການສ້າງຄວາມເຂັ້ມແຂງ ໃຫ້ແກ່ການຮ່ວມມື ຂອງບັນດາຜູ້ມີສ່ວນຮ່ວມໃນການກຽມພ້ອມຮັບມື ແລະ ຕອບໂຕ້ໄພພິບັດຢູ່ ສປປ ລາວ ທີ່ໄດ້ຈັດຕັ້ງເຄື່ອນໄຫວກິດຈະກຳໃນການເຄື່ອນໄຫວຂອງສາມຝ່າຍ, ສະຫຼຸບແຜນງົບປະມານລາຍຈ່າຍຂອງກິດຈະກຳຕ່າງໆ. ນອກນັ້ນ ພາຍໃນກອງປະຊຸມ ຍັງໄດ້ປຶກສາຫາລື ແຜນກິດຈະກຳຕໍ່ໜ້າ ເພື່ອໃຫ້ທັງສາມຝ່າຍ ໄດ້ມີສ່ວນຮ່ວມໃນການຈັດຕັ້ງປະຕິບັດ ແລະ ມີສ່ວນຮ່ວມ.