ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມມືກັບອົງການອະນຸລັກສັດປ່າ ປະຈຳ ສປປ ລາວ (Wildlife Conservatio Society Lao PDR Program – WCS) ໄດ້ຈັດກອງປະຊຸມ ປຶກສາຫາລືກ່ຽວກັບ ລະດັບມາດຕະຖານການຫຼຸດຜ່ອນຜົນກະທົບຕໍ່ຊີວະນານາພັນ ຢູ່ ສປປ ລາວ, ໂດຍ ການເປັນປະທານ ຂອງ ທ່ານ ພູໄຊເທບພະວົງ, ເລຂາທິການ ສະພາການຄ້າ ແລະ ອຸດສາຫະກຳແຫ່ງຊາດລາວ ມີຜູ້ເຂົ້້າຮ່ວມທັງໝົດ ຈຳນວນ 28 ທ່ານ ຕາງໜ້າຈະພາກທຸລະກິດ ໃນຂະແໜງການພະລັງງານ, ບໍ່ແຮ່ ແລະ ຂະແໜງການບໍລິການທ່ອງທ່ຽວ.

ຈຸດປະສົງຂອງກອງປະຊຸມຄັ້ງນີ້ແມ່ນເພື່ອປືກສາຫາລືກ່ຽວກັບ ສີ່ງທ້າທາຍ ແລະ ເປົ້າໝາຍ ກັບພາກສ່ວນເອກະຊົນທີ່ກ່ຽວຂ້ອງໂດຍກົງ ເພື່ອຄວາມສົມດຸນຂອງການເຕີບໂຕທາງດ້ານເສດຖະກິດ ແລະ ຄວາມຍືນຍົງທາງດ້ານສິ່ງແວດລ້ອມພ້ອມກັບການອະນຸລັກຊີວະນານາພັນ.

ເນື່ອງຈາກສະພາບການທົ່ວໂລກ ລວມທັ້ງ ສປປ ລາວ ໄດ້ຖືເອົາບັນຫາຄວາມຍືນຍົງຂອງສິ່ງແວດລ້ອມ ລວມທັ້ງການປ່ຽນແປງດິນຟ້າອາກາດ ແລະ ການສູນເສຍຂອງຊີວະນານາພັນ ພ້ອມໄດ້ຮັບການແກ້ໄຂດ້ວຍການສົ່ງເສີມທາງດ້ານຄວາມຄິດເຫັນກ່ຽວກັບ ການເຕີບໂຕສີຂຽວ.

ໜຶ່ງແນວທາງທີ່ຊ່ວຍສ້າງຍຸດທະສາດການພັດທະນາ ໂດຍສະເພາະແມ່ນ ການເຕີບໂຕສີຂຽວໃຫ້ກາຍເປັນຄວາມຈິງ ແມ່ນການນໍຳໃຊ້ ລຳດັບມາດຕະການຫຼຸດຜ່ອນຜົນກະທົບ(Mitigation Hierarchy), ຊ່ວຍໃຫ້ຜູ້ມີສ່ວນກ່ຽວຂ້ອງນໍາໃຊ້ເພື່ອ ຫລິກລ້ຽງ, ຫຼຸດຜ່ອນ, ຟື້ນຟູ ແລະ ການທົດແທນຊີວະນານາພັນແບບຄົບຖ້ວນ ເພື່ອຮັບປະກັນບໍ່ໃຫ້ມີການສູນເສຍຂອງຊີວະນານາພັນ.

ລັດຖະບານ ສປປ ລາວ ໄດ້ຮັບຮອງນໍາໃຊ້ນະໂຍບາຍເຫຼົ່ານີ້, ທີ່ສອດຄ້ອງກັບຍຸດທະສາດການເຕີບໂຕສີຂຽວທີ່ໄດ້ຖືກຮັບຮອງຕັ້ງແຕ່ປີ 2019 ແລະ ຍັງສືບຕໍ່ຊີ້ນຳແຜນພັດທະນາສັງຄົມ ແລະ ເສດຖະກິດແຫ່ງຊາດ.

ປັດຈຸບັນນີ້, ເປົ້າໝາຍຂອງນະໂຍບາຍລຳດັບມາດຕະການຫຼຸດຜ່ອນຜົນກະທົບຕໍ່ຊີວະນານາພັນຄາດວ່າຈະຖືກນໍາໃຊ້ຢ່າງແຜ່ຫຼາຍ ເພື່ອກ້າວໄປສູ່ການບັນລຸການທົດແທນທີ່ບໍ່ໃຫ້ມີການສູນເສຍຂອງຊີວະນານາພັນ.

ກອງປະຊຸມປຶກສາຫາລືຄັ້ງນີ້ ຈັດຂື້ນເພື່ອໃຫ້ຜູ້ເຂົ້າຮ່ວມໄດ້ປຶກສາຫາລື ບໍ່ພຽງແຕ່ສ້າງຄວາມເຂົ້າໃຈໃຫ້ຫຼາຍຂື້ນກ່ຽວກັບນະໂຍບາຍນີ້ເທົ່ານັ້ນ ແຕ່ຮັບຟັງກ່ຽວກັບທັດສະນະ ແລະ ສະຖານະການຕົວຈິງ ຂອງຂະແໜງການເອກະຊົນທີ່ມີສ່ວນ ກ່ຽວຂ້ອງກັບນະໂຍບາຍເຫຼົ່ານີ້ ເປັນການຮ່ວມມື ແລະ ສົ່ງເສີມການພົວພັນອີກອັນໜື່ງ ລະຫວ່າງ ສະມາຊິກຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ວິຊາການຂອງອົງການທີ່ເຮັດວຽກກ່ຽວຂ້ອງກັບບັນຫາປ່າໄມ້ ແລະ ຊີວະນານາພັນ, ເປີດໂອກາດໃຫ້ບັນດາແຂກຜູ້ເຂົ້າຮ່ວມທຸກຄົນ ສາມາດແລກປ່ຽນຄວາມຄິດເຫັນ ແລະ ແຊປະສົບການຮ່ວມກັນ ເພື່ອຊອກຫາແນວທາງຢ່າງກົມກຽວຂອງການຈະເລີນເຕີບໂຕຂອງທຳມະຊາດໃນອະນາຄົດຕໍ່ໄປ.