ທ່ານ ປອ. ໄຊບັນດິດ ຣາຊະພົນ ຮອງປະທານ ສຄອຊ ໃຫ້ກຽດກ່າວເປີດກອງປະຊຸມ ແລະ ໄດ້ເນັ້ນຄວາມສຳຄັນການຄຸ້ມຄອງໄພພິບັດ ແລະ ການຫຼຸດຜ່ອນຄວາມສ່ຽງໄພພິບັດທີ່ອາດຈະເກີດຂຶ້ນໂດຍສະເພາະໜ້າວຽກຂອງພາກທຸລະກິດ ແລະ ພາກເອກະຊົນ ທີ່ກ່ຽວຂ້ອງ ແລະ ສະເໜີໃຫ້ຜູ້ເຂົ້າຮ່ວມທັງໝົດຊ່ວຍຄົ້ນຄ້ວາ ປະກອບຄໍາຄິດເຫັນຢ່າງກົງໄປກົງມາ ຕໍ່ຮ່າງຂໍ້ກຳນົດພາລະບົດບາດຂອງພາກທຸລະກິດ ແລະ ເອກະຊົນ ຕໍ່ກົນໄກການຕອບໂຕ້ໄພພິບັດ ແລະ ການມີສ່ວນຮ່ວມຕ່າງໆ ເພື່ອແນ່ໃສ່ກະກຽມຄວາມພ້ອມ ແລະ ການມີສ່ວນຮ່ວມຂອງພາກເອກະຊົນໃນການຈັດຕັ້ງປະຕິບັດວຽກງານຕ່າງໆໃຫ້ມີປະສິດທິຜົນສູງສຸດ.

ເນື້ອໃນການສົນທະນາຕົ້ນຕໍມີຄືດັ່ງນີ້:

1. ການໂຄສະນາເຜີຍແຜ່ແລະປູກຈິດສຳນຶກຕໍ່ເຂດທີ່ມີຄວາມສ່ຽງແລະການຮັບມືໄພພິບັດ.

2.ການກະກຽມຄວາມພ້ອມຮັບມື, ປ້ອງກັນແລະການຕອບໂຕ້ໄພພິບັດຄວນມີຫຍັງແດ່.

3.ຄວນມີແຜນວິທີການແນວໃດຕໍ່ການແກ້ໄຂບັນຫາ ແລະ ສິ່ງທ້າທາຍຕ່າງໆ ທີ່ອາດເກີດຂຶ້ນ ໂດຍອີງຕາມປະສົບການ ແລະ ບົດຮຽນທີ່ຜ່ານມາ ແລະ ອື່ນໆ.

ລາຍລະອຽດຜົນກອງປະຊຸມຕິດຕໍ່ພະແນກພັດທະນາຜູ້ປະກອບການ ແລະ ກິດຈະການຕາງຫນ້າຜູ້ໃຊ້ແຮງງານ.