ກອງປະຊຸມດັ່ງກ່າວແມ່ນເປັນການພົບປະແລກປ່ຽນຂໍ້ມູນ ລະຫວ່າງ ຄະນະສຄອຊ ແລະ ຄະນະ ສຄອ ແຂວງວຽງຈັນ ແນ່ໃສ່ການສ້າງຄວາມເຂັ້ມແຂງ ໃຫ້ແກ່ ສຄອ ແຂວງວຽງຈັນ ເຊິ່ງໃຫ້ກຽດເປັນປະທານ ໂດຍທ່ານ ຄຳໃສ ສຸດທິພອນ ປະທານ ສະພາການຄ້າ ແລະ ອຸດສາຫະກຳ ແຂວງວຽງຈັນ (ສຄອ ແຂວງວຽງຈັນ).ພາຍໃນກອງປະຊຸມໄດ້ມີການເຜີຍແຜ່ປື້ມຄູ່ມືແນະນໍາການຈັດຕັ້ງປະຕິບັດ ແລະ ການບໍລິຫານ ສະພາການຄ້າ ແລະ ອຸດສາຫະກຳ ເພື່ອສ້າງຄວາມເຂົ້າໃຈເພີ່ມເຕີມກ່ຽວກັບກົນໄກການບໍລິຫານຂອງ ສຄອ ໃຫ້ແກ່ ຄະນະບໍລິຫານງານ ແລະກອງເລຂາຂອງ ສຄອ ແຂວງ ວຽງຈັນ. ພ້ອມດຽວກັນນັ້ນ ກະໄດ້ມີການແລກປ່ຽນກ່ຽວກັບຂັນຕອນການອອກໃບຢັ້ງຢືນແຫຼງກຳເນິດສິນຄ້າ, ຂັ້ນຕອນການຈັດງານວາງສະແດງ ການເກັບກຳຂໍ້ມູນແລະສ້າງຖານຂໍ້ມູນ ຂອງ ສຄອ ແຂວງວຽງຈັນ ທີ່ເຊື່ອມໂຍງກັບຖານຂໍ້ມູນຂອງ ສຄອຊ, ນອກຈາກນີ້ ສຄອຊ ແລະ ສຄອແຂວງວຽງຈັນ ຍັງໄດ້ເຂົ້າພົບປະກັບຄະນະອຳນວຍການ ວິທະຍາໄລເຕັກນິກແຂວງວຽງຈັນ ເພື່ອປຶກສາຫາລືແລກປ່ຽນຄຳຄິດຄຳເຫັນໃນການປັບປຸງແລະພັດທະນາການຮ່ວມມືກ່ຽວກັບຮູບແບບການສຶກສາແບບຄວບຄູ່ ອີກດ້ວຍ.