ນະຄອນຫຼວງ ວຽງຈັນ, ສປປ ລາວ – ວັນທີ 20 ພຶດສະພາ 2025 – ກອງປະຊຸມສ້າງຂີດຄວາມສາມາດເປັນເວລາ 2 ວັນກ່ຽວກັບການພັດທະນາຫຼັກສູດສຳລັບການຮຽນວິຊາຊີບຢູ່ສະຖານປະກອບການ (WBL)

ໄດ້ຈັດຂຶ້ນໃນລະຫວ່າງວັນທີ 19-20 ພຶດສະພາ 2025, ທີ່ໂຮງແຮມ ຮໍດິເດ ອິນ ແອນ ສຫວີທສ໌ ມີຜູ້ເຂົ້າຮ່ວມຈາກພາກລັດ ແລະ ພາກທຸລະກິດ 40 ທ່ານ. ໂດຍການເປັນປະທານຮ່ວມຂອງ ທ່ານ ຕິ່ງຄຳ ສຸລິນທາ, ຮອງຫົວໜ້າ ກົມອາຊີວະສຶກສາ (ກົມ ອສ), ກະຊວງສຶກສາທິການ ແລະ ກິລາ (ສສກ), ແລະ ທ່ານ ວິບູນ ສິດທິມໍລະດາ, ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ).

ກອງປະຊຸມວິຊາການຄັ້ງນີ້ມີວິທະຍາກອນ ຜູ້ຊ່ຽວຊານຈາກມະຫາວິທະຍາໄລ ອາຊີວະສຶກສາ ຂອງສະຫະພັນທະລັດປະເທດສະວິດ (SFUVET) ເປັນຜູ້ບັນຍາຍ, ໂດຍໄດ້ສຸມໃສ່ການເສີມສ້າງທັກສະໃນການອອກແບບ 4 ຫຼັກສູດທີ່ເປັນບູລິມະສິດ ໄດ້ແກ່: ພະນັກງານຄຸ້ມຄອງສິນຄ້າຄົງຄັງ, ພະນັກງານບໍລິການລູກຄ້າ, ຊ່າງເຄື່ອງຈັກ-ເຄື່ອງມື, ແລະ ຊ່າງສ້ອມແປງລົດໄຟຟ້າ. ຂໍ້ລິເລີ່ມນີ້ ເປັນສ່ວນໜຶ່ງຂອງໂຄງການຂໍ້ລິເລີ່ມດ້ານອາຊີວະສຶກສາ ອາຊຽນ-ສະວິດເຊີແລນ (ASTI), ແນໃສ່ສ້າງຄວາມເຂັ້ມແຂງດ້ານອາຊີວະສຶກສາໂດຍຜ່ານແຜນງານຝຶກອົບຮົມທີ່ສອດຄ່ອງກັບອຸດສາຫະກໍາ.

ຜູ້ເຂົ້າຮ່ວມມີຄວາມເຂົ້າໃຈ ແລະ ໄດ້ຮັບຂໍ້ມູນ ທີ່ສາມາດນຳໄປຈັດຕັ້ງປະຕິບັດ ເພື່ອພັດທະນາຫຼັກສູດການຮຽນວິຊາຊີບຢູ່ສະຖານປະກອບການ (WBL) ເຊິ່ງຈະຊ່ວຍໃຫ້ມີຄວາມໝັ້ນໃຈວ່າ: ແຮງງານມີຄວາມພ້ອມ ແລະ ມີຄວາມກ່ຽວຂ້ອງກັບອຸດສາຫະກໍາ. ກອງປະຊຸມດັ່ງກ່າວຖືເປັນຂີດໝາຍສຳຄັນໃນການກ້າວໄປສູ່ຄວາມເປັນເລີດຂອງວຽກງານອາຊີວະສຶກສາ ແລະ ຝຶກອົບຮົມວິຊາຊີບໃນປະເທດລາວ.