ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມດ້ວຍຄະນະ ໄດ້ເຂົ້າຮ່ວມທ່ຽວຊົມ ງານວາງສະແດງຜະລິດຕະພັນເຟີນີເຈີໄມ້ລາວ ຄັ້ງທີ VIII (8th LAO WOOD FURNITURE FAIR 2023 ) ຕ້ອນຮັບໂດຍ ທ່ານ ທອງດໍາ ສີຫາມາຍາ ປະທານ ສະມາຄົມເຟີນີເຈີລາວ (ສຟລ) ພ້ອມດ້ວຍຄະນະ

ທີ່ ສູນວາງສະແດງສິນຄ້າລາວ-ໄອເຕັກ, ໃນຕອນບ່າຍ ຂອງວັນທີ 09 ມັງກອນ 2023. ເຊິ່ງງານງານວາງສະແດງໄດ້ຈັດຂື້ນໃນລະຫວ່າງວັນທີ 07-15 ມັງກອນ 2023 ເປັນເວລາ 9 ວັນ.

ສະມາຄົມເຟີນີເຈີລາວ (ສຟລ) ໄດ້ມີການຈັດງານວາງສະແດງທີ່ເປັນຂອງສະມາຄົມເອງຂຶ້ນມີຄື: ງານວາງສະແດງ ຜະລິດຕະພັນ(ເຟີນີເຈີ)ໄມ້ລາວ ຄັ້ງທີ 1, 2,3,4,5,6 ແລະ 7, ງານວາງສະແດງສິນຄ້າເຟີນີເຈີວຽງຈັນ ຄັ້ງທີ 1,2.3,4,5 ແລະ 6 ແລະ ງານວາງສະແດງເຄື່ອງເຮືອນລາວ ຄັ້ງທີ 1, 2, 3, 4 ແລະ 5. ຊຶ່ງໄດ້ສ້າງຊື່ສຽງໃນສັງຄົມທັງພາຍໃນ ພາກພື້ນ ແລະ ສາກົນ ໃຫ້ແກ່ສະມາຄົມ ແລະ ປະເທດຊາດໄດ້ຢ່າງໂດດເດັ່ນ ເຫັນໄດ້ຊັດເຈນ ແລະ ຍັງໄດ້ເຂົ້າຮ່ວມງານວາງສະແດງນໍາພາ ກສ່ວນອື່ນນໍາອີກ ຕົວຢ່າງເຊັ່ນ: ງານວາງສະແດງ Made in Laos ທີ່ ນະຄອນຫຼວງວຽງຈັນ, ງານວາງສະແດງ CAEXPO ທີ່ ຫນານຫນິງ ສປ ຈີນ, ງານວາງສະແດງ IFFS (International Furniture Fair Singapore) ທີ່ ປະເທດສິງກະໂປ, ງານວາງສະແດງ EFE (Export Furniture Exhibition) ທີ່ ປະເທດມາເລເຊຍ, ງານວາງສະແດງ ASEAN-China (Chongqing) Home & Living Expo ທີ່ ນະຄອນຊົງຊິງ ສປ ຈີນ. ຈາກຜົນສໍາເລັດດັ່ງກ່າວມາຂ້າງເທິງນີ້ ແລະ ບວກ ໃສ່ກັບປະສົບການຈາກງານວາງສະແດງຕ່າງໆມາ. ພິເສດທີ່ສຸດ ແມ່ນການມີວິໃສທັດທີ່ກ້ວາງໄກຂອງຄະນະບໍລິຫານງານ ສະມາຄົມເຟີນີເຈີລາວ, ສະນັ້ນ ທາງສະມາຄົມເຟີນີເຈີລາວ ຈຶ່ງຈະໄດ້ຈັດງານວາງສະແດງດັ່ງກ່າວນີ້ຂື້ນ.

ຈຸດປະສົງຂອງການຈັດງານ:

• ເພື່ອເປັນການຈັດຕັ້ງປະຕິບັດ ແລະ ຜັນຂະຫຍາຍ ຕາມເນື້ອໃນຈິດໃຈ ຂອງຂັ້ນເທິງວາງອອກ ໃຫ້ປະກົດຜົນເປັນຈິງໄປເທື່ອລະກ້າວ.

• ເພື່ອຜັນຂະຫຍາຍ ຕາມເນື້ອໃນ ຂອງແຈ້ງການ ເລກທີ 15/ນຍ ໃຫ້ປະກົດຜົນເປັນຈິງ.

• ເພື່ອເປັນການອະນຸລັກຮັກສາປ່າໄມ້, ການນໍາໃຊ້ໄມ້ໃຫ້ເກີດປະໂຫຍດສູງສຸດ ແລະ ມີໄມ້ໄວ້ໃຊ້ຢ່າງຍືນຍົງ ໂດຍການປຸງແຕ່ງ ໃຫ້ເປັນຜະລິດຕະພັນສໍາເລັດຮູບມາຈາກໄມ້, ຫວາຍ ແລະ ໄມ້ປ່ອງ ໃຫ້ມີຫຼາກຫຼາຍຜະລິດຕະພັນ ຕາມທີ່ສັງຄົມປະຈຸບັນ

• ຕ້ອງການ ແລະ ເປັນທີ່ນິຍົມກັນຢູ່ ດ້ວຍການນໍາໃຊ້ເຕັກໂນໂລຊີທີ່ທັນສະໄຫມ ແລະ ທັງເປັນການສ້າງມູນຄ່າເພີ່ມໃຫ້ກັບ ຜະລິດຕະພັນເຟີນີເຈີໄມ້ລາວ ໃຫ້ກາຍເປັນສິນຄ້າທີ່ມີຄຸນນະພາບ ແລະ ລາຄາສູງຕົງຕາມຄວາມຕ້ອງການຂອງລູກຄ້າ ແລະ ຕະຫຼາດ ເຮັດໃຫ້ສາມາດສົ່ງອອກຕ່າງປະເທດໄດ້, ຍັງເປັນການສ້າງວຽກເຮັດງານທໍາໃຫ້ກັບປະຊາຊົນບັນດາເຜົ່າ, ຕ້ານໄພ ຫວ່າງງານ ແລະ ຊ່ວຍໃຫ້ຫຼຸດພົ້ນຈາກຄວາມທຸກຍາກຕື່ມອີກໃນອະນາຄົດ.

• ເພື່ອສົ່ງເສີມການປູກໄມ້ ແລະ ຫັນມາໃຊ້ໄມ້ປູກທົດແທນໄມ້ທໍາມະຊາດ, ການພັດທະນາສີຂຽວ. ເພື່ອສ້າງຄວາມເຂັ້ມແຂງໃຫ້ກັບສະມາຄົມເຟີນີເຈີລາວ.

• ເພື່ອໃຫ້ສັງຄົມໄດ້ຮູ້ຈັກກັບຜະລິດຕະພັນເຟີນີເຈີໄມ້ລາວຫຼາຍຂຶ້ນ ແລະ ກວ້າງຂວາງໄປເລື້ອຍໆ.

• ເພື່ອສົ່ງເສີມ ແລະ ສ້າງຄວາມເຂັ້ມແຂງ ໃຫ້ກັບສີໄມ້ລາຍມືຂອງຄົນລາວເຮົາ ແລະ ຫົວຫນ່ວຍທຸລະກິດເຟີນີເຈີໄມ້ລາວໃຫ້ ຂະຫຍາຍໂຕ ແລະ ສາມາດເຂົ້າສູ່ຕະຫຼາດພາກພື້ນ ແລະ ສາກົນໄດ້ໃນອານາຄົດຂ້າງຫນ້າ. ເພື່ອສຶບຕໍ່ຈາກການຈັດງານວາງສະແດງສິນຄ້າ ປະຈໍາປີ 2022 ທີ່ຜ່ານມາ ໃຫ້ຕໍ່ເນື່ອງ ແລະ ຍືນຍົງ.

ງານວາງສະແດງຄັ້ງນີ້ມີຜູ້ເຂົ້າມາຮ່ວມວາງສະແດງລວມມີບັນດາໂຮງງານເຟີນີເຈີ ແລະ ປຸງແຕ່ງໄມ້ສໍາເລັດຮູບ, ໂຮງຊ່າງຫັດຖະກໍາ ແລະ ຮ້ານແກະສະຫຼັກ, ຫົວຫນ່ວຍທຸລະກິດ ທົ່ວໄປ ໃນຂອບເຂດທົ່ວປະເທດ. ກິດຈະກໍາພາຍໃນງານມີການວາງສະແດງ ແລະ ຊື້-ຂາຍ ສິນຄ້າ, ມີການສາທິດການຜະລິດເຄື່ອງເຟີນີເຈີໄມ້ ແລະ ແກະສະຫຼັກໄມ້, ການຈົກສະຫຼາກຊິງລາງວັນ ແລະ ການສະແດງສິນລະປະ.