ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມດ້ວຍຄະນະ ໄດ້ຕ້ອນຮັບຄະນະ ສະພາທຸລະກິດຈີນ – ອາຊຽນ (China ASEAN Business Council (CABC)) – LNCCI – Lao National Chamber of Commerce and Industry

ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມດ້ວຍຄະນະ ໄດ້ຕ້ອນຮັບຄະນະ ສະພາທຸລະກິດຈີນ – ອາຊຽນ (China ASEAN Business Council (CABC))

ໃນວັນທີ 31 ມີນາ 2025, ທີ່ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ), ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ

ອຸດສາຫະກຳ ແຫ່ງຊາດລາວ ພ້ອມດ້ວຍຄະນະ ໄດ້ຕ້ອນຮັບຄະນະ ສະພາທຸລະກິດຈີນ – ອາຊຽນ (China ASEAN Business Council (CABC)) ແລະ ບັນດາຫົວໜ່ວຍທຸລະກິດ ສປ ຈີນ ທີ່ ເດີນທາງມາຢ້ຽມຢາມ ແລະ ເຮັດວຽກທີ່ ສປປ ລາວ, ນຳໂດຍ ທ່ານ ຫຼິວ ຊູ ອີ້, ຮອງເລຂາທິການ ສະພາທຸລະກິດຈີນ ອາຊຽນ ທັງເປັນ ຮອງປະທານ ສະພາສົ່ງເສີມການຄ້າສາກົນແຂວງກວາງຊີ, ສປ ຈີນ.

ໃນກອງປະຊຸມໄດ້ມີການສົນທະນາປຶກສາຫາລືວຽກງານສົ່ງເສີມການຄ້າການລົງທຶນ ລະຫວ່າງ ລາວ ແລະ ຈີນ ໂດຍສະເພາະ ຫົວໜ່ວຍທຸລະກິດຈີນມີຄວາມສົນໃຈຢ່າງສູງຕໍ່ການຮ່ວມມື ແລະ ລົງທຶນໃນຂະແໜງການ AI, ກະສິກຳ, ພະລັງງານສະອາດ, ບໍ່ແຮ່, ທ່ອງທ່ຽວ ແລະ ອື່ນໆ. ພ້ອມດຽວກັນນັ້ນ ທ່ານ ຫຼິວ ຊູ ອີ້, ໄດ້ລາຍງານຜົນສຳເລັດກອງປະຊຸມການຄ້າການລົງທຶນ ຈີນອາຊຽນ ຄັ້ງ ທີ 21 (CABIS) ທີ່ ຈັດຂື້ນໃນນະຄອນໜານໜິງ, ແຂວງກວາງຊີ ໃນປີຜ່ານມາ ແລະ ກໍ່ໄດ້ເຊື້ອເຊິນ ສຄອຊ ສືບຕໍ່ສະໜັບສະໜູນ ລະດົມຄະນະນັກທຸລະກິດເຂົ້າຮ່ວມກອງປະຊຸມ CABIS ຄັ້ງທີ 22 ເຊິ່ງຈະຈັດຂື້ນ ໃນເດືອນກັນຍາ 2025 ແລະ ຈະມີຫຼາຍກອງປະຊຸມຫົວຂໍ້ສົນທະນາປຶກສາຫາລືເຊັ່ນ :

– ກອງປະຊຸມນັກທຸລະກິດຊັ້ນນໍາ ຈີນ – ອາຊຽນ

– ກອງປະຊຸມໂຕະມົນລັດຖະມົນຕີໃນຂະແໜງ AI

– ກອງປະຊຸມສົນທະນາປຶກສາຫາລືການຮ່ວມມືການຄ້າ ກວາງຊີ ແລະ ບັນດາປະເທດຕາມເສັ້ນທາງ BRI

– ກອງປະຊຸມຮ່ວມມືອຸດສາຫະກຳການຂົນສົ່ງຫຼາຍລະບົບ ຈີນ – ອາຊຽນ

– ກອງປະຊຸມ ກົດໝາຍການຄ້າ ຈີນ – ອາຊຽນ

– ກອງປະຊຸມອື່ນໆ

ໃນໂອກາດຂອງການພົບປະກັນໃນຄັ້ງນີ້, ສຄອຊ ແລະ ສະພາທຸລະກິດຈີນ ອາຊຽນ ກໍ່ໄດ້ ມີການເຊັນບົດບັນທຶກຄວາມເຂົ້າໃຈຮ່ວມກັນ ເພື່ອສ້າງກົນໄກປະສານງານເພີ່ມທະວີສົ່ງເສີມການຮ່ວມມືທາງດ້ານການຄ້າ ລະຫວ່າງ ລາວ – ຈີນ ແລະ ອາຊຽນ – ຈີນ ໃຫ້ມີການຂະຫຍາຍຕົວແບບກ້າວກະໂດດ ແລະ ມີປະສິດທິຜົນ, ໂດຍຕ່າງຝ່າຍຕ່າງໄດ້ຮັບຜົນປະໂຫຍດ, ພ້ອມດຽວກັນນັ້ນ, ສຄອຊ ໃນນາມເປັນສະມາຊິກ ສະພາທີ່ປຶກສາທຸລະກິດ ອາຊຽນ ASEAN BAC ຈະຊ່ວຍສະໜັບສະໜູນໃຫ້ CABC ແລະ ASEAN BAC ມີການປະສານງານແລະການຮ່ວມມືກັນໃຫ້ນັບມື້ນັບເລິກເຊິ່ງ.