ໃນຕອນບ່າຍຂອງວັນທີ 14 ທັນວາ 2020 ທີ່ ຫ້ອງປະຊຸມສະພາການຄ້າ ແລະ ອຸດສາຫະກຳແຫ່ງຊາດລາວ, ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ໄດ້ຈັດພິທີຖະແຫຼ່ງຂ່າວ “ ແນວຄວາມຄິດລິເລີ້ມ Plaosme 2.0 ເພື່ອສົ່ງເສີມຫົວໜ່ວຍທຸລະກິດ ແລະ ການຄ້າທາງເອເລັກໂຕຣນິກ ເພື່ອສະໜັບສະໜູນ SMEs ຂອງລາວ”

ໂດຍການເປັນປະທານຂອງທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ, ທ່ານ ບຸນເຖິງ ດວງສະຫວັນ ຫົວໜ້າກົດສົ່ງເສີມ SMEs ແລະ ທ່ານ ດາວວອນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ  ພ້ອມດ້ວຍແຂກຖຶກເຊີນຕ່າງໜ້າຈາກ ພາກລັດ, ພາກທຸລະກິດ ແລະ ບັນດາສື່ມວນຊົນຕ່າງໆ ທີ່ເຂົ້າຮ່ວມ. ຈຸດປະສົງຂອງການຈັດງານຖະແຫຼ່ງຂ່າວໃນຄັ້ງນີ້:

1. ແມ່ນເພື່ອເຜີຍແຜ່ຂໍ້ມູນໃຫ້ແກ່ຜູ້ປະກອບການທຸລະກິດ SMEs ໃນ ສປປ ລາວ ແລະ ສັງຄົມໄດ້ຮັບຮູ້ຢ່າງກວ້າງ ຂວາງ, ມີຄວາມເຂົ້າໃຈຢ່າງເລິກເຊີ່ງກ່ຽວກັບການຄ້າຜ່ານທາງເອເລັກໂຕຣນິກ ໃນເວັບໄຊທ໌ www.plaosme.com
2. ເພື່ອສົ່ງເສີມການຊື້-ຂາຍສິນຄ້າລາວຜ່ານທາງ E-Commerce ໂດຍສະເພາະເວັບໄຊທ໌ www.plaosme.com ໃຫ້ເປັນ ເປັນເວັບໄຊທ໌ຊື້-ຂາຍ ທາງອອນລາຍລະດັບຊາດ.
3. ເພີ່ມຊ່ອງທາງການຊໍາລະເງິນໃນລະບົບເວັບໄຊທ໌ www.plaosme.com ໂດຍຜ່ານທາງອອນລາຍ (Payment Gateway) ແລະ ລະບົບການຄຸ້ມຄອງການຂົນສົ່ງສິນຄ້າ (Logistics).
4. ເປັນເວທີຖະແຫຼ່ງຂ່າວເພື່ອເປີດຕົວການຊື້-ຂາຍສິນຄ້າລາວ ທັງພາຍໃນ ແລະ ຕ່າງປະເທດໃນ ກ່ຽວກັບລະບົບການຄ້າ ຜ່ານທາງເອເລັກໂຕຣນິກ ຂອງເວັບໄຊທ໌ www.plaosme.com.

ເປົ້າໝາຍຂອງພວກເຮົາຄືຫັນມານໍາໃຊ້ນະວັດຕະກໍາເຕັກໂນໂລຊີໃໝ່ ເພື່ອນໍາປະເທດໄປສູ່ທັນສະໄໝຫລຸດຜ່ອນຕົ້ນທຶນຊື້-ຂາຍສິນຄ້າ ແລະ ເວລາໃນການຂົນສົ່ງ, ສ້າງໃຫ້ທຸລະກິດ SMEs ຂອງລາວໃຫ້ມີຄວາມເຂັ້ມແຂງ, ສາມາດນໍາໃຊ້ເຄື່ອງມືທາງດ້ານ ເຕັກໂນໂລຊີ ແລະ ເພີ້ມຊ່ອງທາງການຊື່-ຂາຍສິນຄ້າຂອງຕົນຜ່ານທາງເວັບໄຊທ໌ www.plaosme.com   ທາງອອນລາຍ ໃຫ້ກາຍເປັນເວັບໄຊທ໌ຊື້-ຂາຍໃນລະດັບຊາດ.

ເພື່ອເພີ້ມຍອດຂາຍ ແລະ ສ້າງລາຍຮັບໃຫ້ທຸລະກິດ SMEs  ຂອງ ສປປ ລາວ ໃຫ້ເຂັ້ມແຂງ ເພື່ອເປັນຖານເກັບລາຍຮັບໃຫ້ແກ່ລັດຖະບານຢ່າງຢືນຍົງ ສະນັ້ນ, ພາກລັດຈຶ່ງໄດ້ມີນະໂຍບາຍຊຸກຍູ້ສົ່ງເສີມ ໃຫ້ຜູ້ປະກອບການທຸລະກິດ/ຜູ້ຜະລິດພາຍໃນ ແລະ ຕ່າງປະເທດສາມາດນຳໃຊ້ການຊື້-ຂາຍສິນຄ້າຂອງຕົນ ໂດຍການພັດທະນາທຸລະກິດການຄ້າທາງອອນລາຍ. ຊຶ່ງປັດຈຸບັນກຳລັງເປັນທີ່ຍອມຮັບ, ທັນສະໄຫມນຳໃຊ້ກັນໃນທົ່ວໂລກ ແລະ ເປັນຮູບແບບການຄ້າທີ່ບໍ່ມີພົມແດນ, ສາມາດດຶງດູດການຊື້-ຂາຍສິນຄ້າທັງພາຍໃນ ແລະ ຕ່າງປະເທດໄດ້ທົ່ວໂລກ.