ກອງປະຊຸມປຶກສາຫາລືຂະແໜງການຜະລິດກະສິກໍາ

ກອງປະຊຸມປຶກສາຫາລືຂະແໜງການຜະລິດກະສິກໍາ, ໃນວັນທີ 07 ພະຈິກ 2024, ທີ່ ສະພາການຄ້າ ແລະ ອຸດສາຫະກໍາ ແຫ່ງຊາດລາວ

ທ່ານ ບຸນທ່ຽງ ລັດຕະນະວົງ, ຄະນະບໍລິຫານງານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ (ສຄອຊ),

ຮອງຫົວໜ້າໜ່ວຍງານປຶກສາຫາລືຂະແໜງການຜະລິດກະສິກໍາ ໃຫ້ກຽດເປັນປະທານຮ່ວມໃນກອງປະຊຸມ ພາຍໃຕ້ກົນໄກກອງປະຊຸມທຸລະກິດລາວ. ໃນກອງປະຊຸມດັ່ງກ່າວໄດ້ມີ ບັນດາຜູ້ປະກອບການທີ່ປິ່ນອ້ອມການຜະລິດກະສິກໍາ ລວມທັງກອງເລຂາຂອງກອງປະຊຸມທຸລະກິດລາວ ເຂົ້າຮ່ວມ ທັງໝົດເປັນຈໍານວນ 34 ທ່ານ, ຍິງ 17 ທ່ານ.ຈຸດປະສົງຂອງກອງປະຊຸມແມ່ນ ເພື່ອລາຍງານຄວາມຄືບໜ້າ ຂອງບັນຫາທີ່ໄດ້ຍົກຂຶ້ນ ໃນກອງປະຊຸມທຸລະກິດລາວຄັ້ງຜ່ານມາ ແລະ ໃຫ້ຜູ້ປະກອບການໃນຂະແໜງການໂລຈິສຕິກ ສະເໜີ, ປຶກສາຫາລື ແລະ ກໍານົດບັນຫາບູລິມະສິດທີ່ເປັນຂໍ້ຫຍຸ້ງຍາກ ໃນການດໍາເນີນທຸລະກິດຂອງຂະແໜງການຜະລິດກະສິກໍາ ພ້ອມດ້ວຍວິທີແກ້ໄຂ, ສັງລວມໃຫ້ແກ່ກອງເລຂາກອງປະຊຸມທຸລະກິດລາວ ຄັດຈ້ອນເອົາເຂົ້າໃນຂະບວນການ ປຶກສາຫາລືຂອງ ກອງປະຊຸມທຸລະກິດລາວຄັ້ງທີ 16 ໃນຂັ້ນຕໍ່ໄປ, ເຊິ່ງເນື້ອໃນຂອງກອງປະຊຸມສາມາດສັງລວມໄດ້ລຸ່ມນີ້ດັ່ງນີ້:

ຂໍ້ສະເໜີທີ່ຢູ່ໃນຂັ້ນຕອນການແກ້ໄຂ:

1. ຂັ້ນຕອນການນໍາເອົາລົດຂົນສົ່ງຈາກຕ່າງປະເທດເຂົ້າມາຂົນສິນຄ້າຢູ່ ສປປ ລາວ ໂດຍບໍ່ໄດ້ຄ່ຽນຖ່າຍເພື່ອສົ່ງເສີມການສົ່ງອອກ;

2. ການສ້າງຄວາມເຂັ້ມແຂງໃຫ້ກຸ່ມຜູ້ຜະລິດ ແລະ ປຸງແຕ່ງກະສິກໍາ

3. ການກໍານົດນະໂຍບາຍສົ່ງເສີມການຜະລິດພາຍໃນ

4. ການແຂ່ງຂັນຈາກສິນຄ້ານໍາເຂົ້າທີ່ບໍ່ຖືກຕ້ອງຕາມກົດລະບຽບ

5. ການຄວບຄຸມລາຄາສິນຄ້າກະສິກໍາ

ພາຍຫຼັງກອງປະຊຸມນີ້, ກອງເລຂາກອງປະຊຸມທຸລະກິດລາວ ທີ່ປະຈໍາຢູ່ສະພາການຄ້າ ແລະ ອຸດສາຫະກໍາ ແຫ່ງຊາດລາວ ຮ່ວມກັບ ໜ່ວຍງານປຶກສາຫາລື ຂະແໜງການຜະລິດກະສິກໍາ, ຈະໄດ້ຮວບຮວມບັນຫາບູລິມະສິດ ທີ່ຜູ້ເຂົ້າຮ່ວມໄດ້ສະເໜີ ແລະ ກະກຽມບົດສະເໜີບັນຫາ ເພື່ອສົ່ງໃຫ້ຂະແໜງການທີ່ກ່ຽວຂ້ອງຂອງພາກລັດ ຄົ້ນຄວ້າ ແລະ ກະກຽມສໍາລັບກອງປະຊຸມປຶກສາຫາລືລະຫວ່າງ ພາກລັດ ແລະ ພາກທຸລະກິດ ໃນຂັ້ນຕໍ່ໄປ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການ ທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດ ໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.