ໃນວັນທີ 17 ພະຈິກ 2020 ທີ່ ຫ້ອງການ ສະພາການຄ້າ ແລະ ອຸດສາຫະກຳ ແຫ່ງຊາດລາວ. ສະພາການຄ້າ ແລະ ອຸດສາຫະກຳ ແຫ່ງຊາດລາວ (LNCCI)

ໄດ້ເປັນເຈົ້າພາບຈັດງານສະຫລຸບການຈັດຕັ້ງປະຕິບັດງານລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ແລະ ງານລ້ຽງຂອບໃຈຜູ້ສະໜັບສະໜູນ ທີ່ ໃຫ້ການສະໜັບສະໜູນການຈັດງານລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ຕະຫລອດໄລຍະຜ່ານມາ.

ຈຸດປະສົງຕົ້ນຕໍແມ່ນເພື່ອສະຫລຸບຜົນຂອງການຈັດຕັ້ງປະຕິບັດລາງວັນທຸລະກິດອາຊຽນລາວ (ABA Laos) ແລະ ງານລ້ຽງຂອບໃຈຜູ້ສະໜັບສະໜູນ ແລະ ຄູ່ຮ່ວມຍຸດທະສາດທີ່ໄດ້ເປັນສ່ວນໜຶ່ງໃນການຈັດງານລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ແລະ ງານລ້ຽງ (GALA Dinner) ສຳລັບການມອບລາງວັນໃຫ້ຜູ້ຊະນະ. ເຊິ່ງແຂກຜູ້ມີກຽດທີ່ໄດ້ເຂົ້າຮ່ວມງານດັ່ງກ່າວເຊັ່ນ: ໂຄງການແຜນງານເຊື່ອມໂຍງເສດຖະກິດອາຊຽນຂອງ ສປປ ລາວ ເພື່ອການພັດທະນາດ້ານທຸລະກິດ ແລະ ການຄ້າ (RELATED Project) ພາຍໃຕ້ ໂຄງການຮ່ວມມື ລາວ-ເຢຍລະມັນ (GIZ), ຄະນະປະທານ ສຄອຊ, ຜູ້ໄດ້ຮັບລາງວັນ, ຄູ່ຮ່ວມຍຸດທະສາດ, ຄະນະກຳມະການຕັດສິນງານຊິງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ພ້ອມດ້ວຍນັກທຸລະກິດ ແລະ ທີມງານກອງເລຂາງານຊິງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ.