ກອງປະຊຸມປຶກສາຫາລືຂະແໜງການບໍລິການທົ່ວໄປ ພາຍໃຕ້ກົນໄກກອງປະຊຸມ ທຸລະກິດລາວ

ກອງປະຊຸມປຶກສາຫາລືຂະແໜງການບໍລິການທົ່ວໄປ ພາຍໃຕ້ກົນໄກກອງປະຊຸມ ທຸລະກິດລາວ, ໃນວັນທີ 03 ກັນຍາ 2024, ທີ່ ສະພາການຄ້າ ແລະ ອຸດສາຫະກໍາ ແຫ່ງຊາດລາວ,

ໂດຍການເປັນ ປະທານຂອງ ທ່ານ ປອ ຄໍາແສນ ສີສະວົງ, ຮອງປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ (ສຄອຊ), ຮອງຫົວໜ້າໜ່ວຍງານປຶກສາຫາລືຂະແໜງການບໍລິການພາຍໃຕ້ກົນໄກກອງປະຊຸມທຸລະກິດລາວ. ໃນນີ້ໄດ້ມີຜູ້ປະກອບການດ້ານການບໍລິການທົ່ວໄປ ລວມທັງກອງເລຂາຂອງກອງປະຊຸມທຸລະກິດລາວ ເຂົ້າຮ່ວມ ທັງໝົດເປັນຈໍານວນ 48ທ່ານ (ຍິງ 20 ທ່ານ).

ຈຸດປະສົງຂອງກອງປະຊຸມ ແມ່ນເພື່ອລາຍງານຄວາມຄືບໜ້າຂອງບັນຫາທີ່ໄດ້ຍົກຂຶ້ນໃນກອງປະຊຸມທຸລະກິດລາວຄັ້ງຜ່ານມາ ແລະ ໃຫ້ຜູ້ປະກອບການໃນຂະແໜງການບໍລິການທົ່ວໄປ ສະເໜີ, ປຶກສາຫາລື ແລະ ກໍານົດບັນຫາບູລິມະສິດທີ່ເປັນຂໍ້ຫຍຸ້ງຍາກໃນການດໍາເນີນທຸລະກິດຂອງຂະແໜງການ ພ້ອມດ້ວຍວິທີແກ້ໄຂ, ສັງລວມໃຫ້ແກ່ກອງເລຂາກອງປະຊຸມທຸລະກິດລາວ ຄັດຈ້ອນເອົາເຂົ້າໃນຂະບວນການປຶກສາຫາລືຂອງກອງປະຊຸມທຸລະກິດລາວຄັ້ງທີ 16 ໃນຂັ້ນຕໍ່ໄປ,

ເຊິ່ງເນື້ອໃນຂອງກອງປະຊຸມສາມາດສັງລວມໄດ້ລຸ່ມນີ້ດັ່ງນີ້:

1. ສະຖຽນລະພາບດ້ານເງິນຕາ

2. ຂັ້ນຕອນ ການຂຶ້ນທະບຽນວິສາຫະກິດ,ການຂໍອະນຸຍາດລົງທຶນ

3. ການສົ່ງເສີມການຜະລິດພາຍໃນ

4. ການສົ່ງເສີມການນໍາໃຊ້ສິນຄ້າ ແລະ ການບໍລິການທີ່ຜະລິດພາຍໃນປະເທດ

5. ການອອກໃບຢັ້ງຢືນການມອບພັນທະອາກອນ ຢູ່ຂັ້ນນະຄອນຫຼວງ

6. ຂັ້ນຕອນການຈັດກິດຈະກໍາສົ່ງເສີມການທ່ອງທ່ຽວ.

ພາຍຫຼັງກອງປະຊຸມນີ້, ກອງເລຂາກອງປະຊຸມທຸລະກິດລາວ ທີ່ປະຈໍາຢູ່ສະພາການຄ້າ ແລະ ອຸດສາຫະກໍາ ແຫ່ງຊາດລາວ ຮ່ວມກັບ ໜ່ວຍງານປຶກສາຫາລື ຂະແໜງການບໍລິການ, ຈະໄດ້ຮວບຮວມບັນຫາບູລິມະສິດ ທີ່ຜູ້ເຂົ້າຮ່ວມໄດ້ສະເໜີ ແລະ ກະກຽມບົດສະເໜີບັນຫາ ເພື່ອສົ່ງໃຫ້ຂະແໜງການທີ່ກ່ຽວຂ້ອງຂອງພາກລັດ ຄົ້ນຄວ້າ ແລະ ກະກຽມສໍາລັບກອງປະຊຸມປຶກສາຫາລືລະຫວ່າງ ພາກລັດ ແລະ ພາກທຸລະກິດ ໃນຂັ້ນຕໍ່ໄປ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການ ທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດ ໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.