ວັນທີ 22 ກໍລະກົດ 2021, ນະຄອນປາກເຊ, ແຂວງຈໍາປາສັກ.  ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ໂດຍການຮ່ວມມຶກັບ ສະພາການຄ້າ ແລະ ອຸດສາຫະກໍາແຫ່ງຊາດ (ສຄອຊ) ແລະ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ (ສຄອ.ຈສ) ຈັດຊຸດຝຶກອົບຮົມ ເພື້ມທັກສະ ໃນການຈັດຕັ້ງປະຕິບັດກົນໄກປຶກສາຫາລື ພາກລັດ-ທຸລະກິດ ສໍາລັບກອງເລຂາ ສຄອ.ຈສ ແລະ ຜູ້ປະສານງານກົນໄກດັ່ງກ່າວ.   ກອງປະຊຸມເຝຶກອົບຮົມ ແມ່ນໄດ້ຈັດຂື້ນເປັນເວລາ 02 ວັນ ແຕ່ວັນທີ 22 -23 ພະຈິກ ຢູ່ທີ່ໂຮງແຮມຈໍາປາສັກແກຼນ, ນະຄອນປາກເຊ.

ຈຸດປະສົງຂອງກອງປະຊຸມຝຶກອົບຮົມຄັ້ງນີ້ ແມ່ນເພື່ອແນໃສ່ປັບປຸງ ແລະ ເສີມສ້າງ ຄວາມອາດສາມາດ ຂອງກອງເລຂາ ແລະ ຜູ້ປະສານງານ ພາກທຸລະກິດ ແລະ ພາກລັດ ຂອງກົນໄກ LPPD ໃນທັກສະດ້ານການອໍານວຍຄວາມສະດວກກອງປະຊຸມ ເພື່ອໃຫ້ສາມາດປະຕິບັດໜ້າທີ່ຂອງກອງເລຂາໄດ້ຢ່າງມີປະສິດທິຜົນ, ແລະ ມີຄວາມສາມາດໃນການຂຽນບົດສະ ເໜີບັນຫາ ເພື່ອສະເໜີຕໍ່ພາກລັດທີ່ກ່ຽວຂ້ອງ.   ນອກນັ້ນການຝຶກອົບຮົມຄັ້ງນີ້ ຍັງເປັນການທົບທວນຄວາມເຈົ້າໃຈຂອງຜູ້ເຂົ້າຮ່ວມກ່ຽວກັບກົນໄກ LPPD.

ກອງປະຊຸມຝຶກອົບຮົມ ມີຜູ້ເຂົ້າຮ່ວມທັງໝົດ 25 ຄົນ ຈາກກອງເລຂາ ສຄອ.ຈສ, ແລະ ຜູ້ປະສານງານ ກົນໄກ LPPD ທັງພາກລັດ ແລະ ເອກະຊົນ.

ໃນພິທີເປີດກອງປະຊຸມຝຶກອົບຮົມ ທ່ານ ນາງ ບຸນເຮືອງ ແຄຣໍ ລິດດັງ, ປະທານ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ ໄດ້ກ່າວບາງຕອນວ່າ:  ເພື່ອເຮັດເພື່ອເຮັດໃຫ້ບັນລຸຈຸດປະສົງຂອງການເຝຶກອົບຮົມຄັ້ງນີ້, ຂໍໃຫ້ທຸກທ່ານໄດ້ເຂົ້າຮ່ວມຢ່າງສຸດກົກສຸດປາຍ, ພ້ອມທັງມີການຄົ້ນຄວ້າ-ສົນທະນາແລກປ່ຽນບົດຮຽນກັນຢ່າງກົງໄປກົງມາ ແລະ ມີຄວາມສ້າງສັນ, ຂ້າພະເຈົ້າມີຄວາມເຊື່ອໝັ້ນຢ່າງສູງຕໍ່ວິທະຍາກອນ ທີ່ຈະໃຫ້ຄວາມຮູ້ວິຊາສາມາດນຳໃຊ້ໄດ້ ເພຶ່ອຜົນສໍາເລັດໃນວຽກງານ ຊຸກຍູ້ສົ່ງເສີມ ກ້າວໄປເຖິງການຄົ້ນຄວ້າ ແລະ ຂຽນບົດສະເໜີບັນຫາຕ່າງໆ ຈາກການສະເໜີຂອງພາກທຸລະກິດແຂວງຈໍາປາສັກພວກເຮົາ ໃຫ້ມີຄວາມໝັ້ນຄົງຢືນຢົງໄດ້.

ເພື່ອເພີ້ມພູນປະສົບການ ການຮຽນຮູ້ຂອງຜູ້ເຂົ້າຮ່ວມ, ກອງປະຊຸມຝຶກອົບຮົມ ໄດ້ລວບລວມເອົາທັງທິດສະດີ ແລະ ພາກປະຕິບັດ ລວມທັງນໍາໄຊ້ຮູບແບບການຮຽນຮູ້ ທີ່ຊ່ວຍໃຫ້ຜູ້ເຂົ້າຮ່ວມ ສາມາດສະທ້ອນ, ແບ່ງປັນປະສົບການ, ແລະ ນໍາໄຊ້ສິ່ງທີ່ໄດ້ຮຽນຮູ້ເຂົ້າໃນພາກປະຕິບັດຕົວຈິງໄດ້.

ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.