ວັງວຽງ, ແຂວງວຽງຈັນ, ສປປ ລາວ – ວັນທີ 4 ກໍລະກົດ 2025 – ກອງປະຊຸມຄັ້ງທີ 2 ເພື່ອກວດແກ້ຄວາມຖືກຕ້ອງ, ກວດຜ່ານ ແລະ ຮັບຮອງ 04 ມາດຕະຖານອາຊີບແຫ່ງຊາດ (NOS) ໄດ້ຈັດຂຶ້ນທີ່ໂຮງແຮມ ຝຶກປະຕິບັດ, ເມືອງວັງວຽງ, ແຂວງວຽງຈັນ.

ກອງປະຊຸມຄັ້ງນີ້ມີຜູ້ບໍລິຫານຈາກ ກົມ ອສ, ສຄອຊ, ສພອ, ແລະ ສພງ ເປັນປະທານຮ່ວມ ໂດຍມີຜູ້ຕາງໜ້າ ຈາກພາກສ່ວນກ່ຽວຂ້ອງທັງພາກລັດ ແລະ ພາກທຸລະກິດເຂົ້າຮ່ວມ 35 ທ່ານ. ກອງປະຊຸມໄດ້ສຸມໃສ່ການສະຫຼຸບ 4 ມາດຕະຖານອາຊີບແຫ່ງຊາດ (NOS) ເຊັ່ນ: ການຄຸ້ມຄອງສິນຄ້າຄົງຄັງ, ການບໍລິການລູກຄ້າ, ຊ່າງເຄື່ອງຈັກ-ເຄື່ອງມື, ແລະ ຊ່າງສ້ອມແປງລົດໄຟຟ້າ. ພາຍໃຕ້ໂຄງການຮຽນວິຊາຊີບຢູ່ສະຖານປະກອບການ (WBL), ສະໜັບສະໜູນໂດຍໂຄງການ ຂໍ້ລິເລີ່ມດ້ານອາຊີວະສຶກສາ ອາຊຽນ-ສະວິດເຊີແລນ (ASTI).

ບັນດາຜູ້ເຂົ້າຮ່ວມໄດ້ສະໜອງຂໍ້ມູນທີ່ມີລັກສະນະສ້າງສັນເພື່ອຮັບປະກັນຄວາມສອດຄ່ອງກັນໃນລະດັບຊາດ ແລະ ພາກພື້ນ. ເມື່ອໄດ້ຮັບການອະນຸມັດຈາກກະຊວງສຶກສາທິການ ແລະ ກິລາແລ້ວ; ມາດຕະຖານອາຊີບແຫ່ງຊາດເຫຼົ່ານີ້ຈະເປັນແນວທາງໃນການພັດທະນາຫຼັກສູດການຮຽນ-ການສອນ ແລະ ປະກອບສ່ວນເຂົ້າໃນການເສີມສ້າງລະບົບ ອາຊີວະສຶກສາ ແລະ ຄວາມພ້ອມຂອງກໍາລັງແຮງງານຂອງ ສປປ ລາວ.