9 ທັນວາ 2025 ທີ່ຜ່ານມາ, ທີ່ໂຮງແຮມ ອາມາຣີ, ນະຄອນຫຼວງວຽງຈັນ ກົມທະບຽນສານ ກະຊວງຍຸຕິທໍາ ຮ່ວມກັບ ສະພາການຄ້າ ແລະ ອຸດສາຫະກໍາ ແຫ່ງຊາດລາວ

ໄດ້ຈັດກອງປະຊຸມເຜີຍແຜ່ນິຕິກຳ ແລະ ແລກປ່ຽນບົດຮຽນກ່ຽວກັບວຽກງານທະບຽນສານຂຶ້ນ, ໂດຍການເປັນປະທານຮ່ວມຂອງ ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທໍາ ແລະ ທ່ານ ວັນທອງ ສິດທິກຸນ ຮອງປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ມີຜູ້ຕາງໜ້າຈາກ ກະຊວງຍຸຕິທໍາ, ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ບັນດາຫົວໜ່ວຍທຸລະກິດ ແລະ ໂຄງການລາວ/037 ເຂົ້າຮ່ວມທັງໝົດຫຼາຍກວ່າ 85 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ ເພື່ອເຜີຍແຜ່ກົດໝາຍວ່າດ້ວຍທະບຽນສານ (ສະບັບປັບປຸງ) ແລະ ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍທະບຽນສານ ສະບັບເລກທີ 1786/ກຍ, ລົງວັນທີ 28 ທັນວາ 2023, ໃຫ້ແກ່ບັນດາຫົວໜ່ວຍທຸລະກິດ ທັງພາຍໃນ ແລະ ຕ່າງປະເທດ ຢູ່ ສປປ ລາວ, ເພືອແນໃສ່ເຮັດໃຫ້ບັນດາຫົວໜ່ວຍທຸລະກິດ ໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງເລິກເຊິ່ງ ພ້ອມທັງນໍາໄປຈັດຕັ້ງ ປະຕິບັດໃຫ້ມີຜົນສັກສິດ.

ພາຍຫຼັງຮັບຟັງການເຜີຍແຜ່ນິຕິກໍາດັ່ງກ່າວແລ້ວ ຜູ້ເຂົ້າຮ່ວມກອງປະຊຸມກໍຍັງໃຫ້ມີການແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ເພື່ອຮັບປະກັນໃຫ້ການຈັດຕັ້ງປະຕິບັດວຽກງານດັ່ງກ່າວມີຄວາມໂປ່ງໃສ ເປັນເອກະພາບ ແນໃສ່ການປົກປ້ອງສິດ ແລະ ຜົນປະໂຫຍດຂອງບຸກຄົນ, ນິຕິບຸກຄົນ ແລະ ການຈັດຕັ້ງທັງພາຍໃນ ແລະ ຕ່າງປະເທດ ຕາມກົດໝາຍ. ກອງປະຊຸມໄດ້ດໍາເນີນໄປເປັນເວລາ 1 ວັນ ແລະ ປິດລົງ ດ້ວຍຜົນສໍາເລັດອັນຈົບງາມ.