ຈຸດປະສົງ ຂອງ ການຈັດກອງປະຊຸມໃນຄັ້ງນີ້, ກໍ່ເພື່ອເປັນການເປີດໂອກາດໃຫ້ ພາກທຸລະກິດ ໄດ້ປະກອບຄຳຄິດເຫັນຕໍ່ 3 ຮ່າງກົດໝາຍຢ່າງກົງໄປກົງມາ, ພ້ອມດຽວກັນນັ້ນ, ກໍ່ຍັງເປັນການຊ່ວຍໃຫ້ພາກລັດ ແລະ ພາກທຸລະກິດ ໄດ້ນຳສະເໜີບັນຫາ ແລະ ຂໍ້ຄົງຄ້າງໃນການຈັດຕັ້ງປະຕິບັດບັນດາ ນິຕິກຳ ທີ່ຕິດພັນກັບອາກອນ ໃນທີ່ຜ່ານມາ ເພື່ອເຮັດແນວໃດໃຫ້ຮ່າງ 3 ກົດໝາຍ ອາກອນ ທີ່ ຈະນຳສະເໜີຕໍ່ຄະນະລັດຖະບານ ເພື່ອພິຈາລະນາ ແລະ ນຳສະເໜີຕໍ່ ສະພາແຫ່ງຊາດ ເພື່ອຮັບຮອງນັ້ນມີຄວາມ ສອດຄ່ອງ, ແທດເໝາະ ແລະ ເອື້້ອອຳນວຍກັບການດຳເນີນທຸລະກິດ, ພ້ອມດຽວກັນນັ້ນ ກໍ່ເພື່ອເປັນການຮັບປະກັນການເກັບງົບປະມານໃຫ້ໄດ້ປະສິດທິພາບທີ່ສຸດ.

ທ່ານ ວັນທອງ ສິດທິກຸນ ຮອງປະທານ ສຄອ ແຫ່ງຊາດລາວ ໄດ້ກ່າວທີ່ປະຊຸມວ່າ: “ຂ້າພະເຈົ້າ, ຂໍລາຍງານ ຕໍ່ທີ່ປະຊຸມ ກ່ຽວກັບຄວາມຄືບໜ້າຂອງຂະບວນການປຶກສາຫາລື ລະຫວ່າງ ພາກລັດ ແລະ ພາກທຸລະກິດ ພາຍໃຕ້ກອບຂອງເວທີທຸລະກິດລາວ ທີ່ ສຄອ ແຫ່ງຊາດລາວ ພ້ອມດ້ວຍກະຊວງອຸດສາຫະກຳ ແລະ ການຄ້າ ໄດ້ຖືກມອບໝາຍໃຫ້ເປັນຜູ້ປະສານງານ ແລະ ກອງເລຂາ ໂດຍໄດ້ຮັບການສະໜັບສະໝູນຈາກໂຄງການ TDF2. ໃນນີ້ ກອງປະຊຸມທຸລະກິດ ລາວ ແມ່ນຂະບວນການປຶກສາຫາລື ທີ່ ປະກອບມີ 4 ລະດັບຄື ລະດັບ ຫນ່ວຍງານປຶກສາຫາລື ພາກເອກະຊົນ, ລະດັບວິຊາການກະຊວງກ່ຽວຂ້ອງ, ລະດັບຄະນະຊີ້ນໍາ ແລະ ລະດັບຊາດ ເຊິ່ງ ພວກເຮົາກໍ່ໄດ້ສໍາເລັດ ການຈັດກອງປະຊຸມທຸລະກິດລາວ ຄັ້ງທີ 11 ໃນວັນທີ 5 ກໍລະກົດ ທີ່ຜ່ານມານີ້. ກອງປະຊຸມທຸລະກິດລາວຄັ້ງທີ 11 ໄດ້ຍົກເອົາ 3 ກຸ່ມບັນຫາໃຫຍ່ ເພື່ອມາປຶກສາຫາລື ເຊິ່ງໜຶ່ງໃນສາມກຸ່ມບັນຫາ ດັ່ງກ່າວ ກໍ່ແມ່ນກຸ່ມບັນຫາອາກອນທີ່ຕິດພັນກັບທຸລະກິດ. ສະນັ້ນ ກອງປະຊຸມປຶກສາຫາລື ໃນມື້ນີ້ ກໍ່ຖືໄດ້ວ່າເປັນໜຶ່ງໃນຂະບວນການ ພາຍໃຕ້ກອບຂອງກອງປະຊຸມທຸລະກິດລາວ ເພື່ອ ຮວບຮວມເອົາຄໍາຄິດເຫັນຂອງພາກທຸລະກິດ ເຂົ້າໃນການປັບປຸງຮ່າງກົດໝາຍທີ່ຕິດພັນກັບວຽກງານອາກອນ.”