(ດ້ານຊ້າຍ: ທ່ານ ອຸເດດ ສູວັນນະວົງ ປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ; ດ້ານຂວາ: ທ່ານ Mou Hong Cao Cao ຮອງປະທານສະພາການຄ້າ ແລະ ອຸດສາຫະກຳ ແຂວງ ຢູນນານ.)

ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ສະແດງຄວາມປິຕິຍິນດີຕໍ່ການຕ້ອນຮັບທີ່ອົບອຸ່ນຂອງ ສະພາການຄ້າ ແລະ ອຸດສາຫະກຳ ແຂວງ ຢູນນານ, ທັງສອງຝ່າຍໄດ້ແລກປ່ຽນຂໍ້ມູນທາງດ້ານການພັດທະນາເສດຖະກິດ ແລະ ສັງຄົມ ໃນປັດຈຸບັນ, ເຊິ່ງທັງສອງປະເທດເປັນປະເທດທີ່ມີສາຍນໍ້າ ແລະ ສາຍພູເຊື່ອມຈອດກັນ, ເປັນເພື່ອນບ້ານທີ່ດີ ແລະ ເປັນຄູ່ຮ່ວມຍຸດທະສາດຮອບດ້ານ, ມີການພົວພັນກັນນັບມື້ນັບເລິກເຊິ່ງ ໂດຍສະເພາະນັບແຕ່ການເປີດເສັ້ນທາງລົດໄຟ ຈີນ-ລາວ ໃນປີ 2021 ທັງສອງຝ່າຍໄດ້ບັນລຸຜົນສຳເລັດທີ່ສຳຄັນໃນຫຼາຍດ້ານເຊັ່ນ: ໂລຈິສຕິກການສົ່ງສິນຄ້າຜ່ານແດນ, ຂ້າມແດນ, ຄວາມຮ່ວມມືດ້ານການຄ້າ, ການທ່ອງທ່ຽວ, ການແລກປ່ຽນທາງວັດທະນະທຳ ແລະ ອື່ນໆ

ທ່ານ Mou Hong Cao ໄດ້ມີຄຳເຫັນ: ຈະເສິມສ້າງຄວາມສຳພັນ ແລະ ການຮ່ວມມືກັບສະພາການຄ້າ ແລະ ອຸດສາຫະກຳ ແຫ່ງຊາດລາວ ໃຫ້ຫຼາຍຂຶ້ນ ແລະ ນຳພາບໍລິສັດຂອງທັງສອງປະເທດໃຫ້ໃຊ້ປະໂຫຍດຈາກເສັ້ນທາງລົດໄຟ ຈີນ-ລາວ ໃນການເພິ່ມທະວີການຮ່ວມມືໃນຂະແໜງການກະສິກຳ, ແຮ່ທາດ, ການທ່ອງທ່ຽວ ແລະ ອື່ນໆ ເພື່ອສົ່ງເສີມຄວາມຮ່ວມມືທາງດ້ານເສດຖະກິດ ແລະ ການຄ້າຂອງທັງສອງຝ່າຍໃຫ້ເລິກເຊິ່ງຂຶ້ນໃນລະດັບທີ່ສູງຂຶ້ນ ແລະ ກວ້າງຂວາງຂຶ້ນ. ພ້ອມນັ້ນ, ຍັງຫວັງວ່າໃນອະນາຄົດຈະສາມາດລົງນາມໃນຂໍ້ຕົກລົງການຮ່ວມມືທາງຍຸດທະສາດເພື່ອສ້າງແນວທາງທີ່ໝັ້ນຄົງ ແລະ ສະດວກສະບາຍຍິ່ງຂຶ້ນສຳລັບການຮ່ວມມືລະຫວ່າງທຸລະກິດຂອງທັງສອງປະເທດ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ

ທັງສອງຝ່າຍໄດ້ຕົກລົງເຫັນດີເປັນເອກະພາບເບື້ອງຕົ້ນ ຈະລົງນາມບົດບັນທຶກຄວາມເຂົ້າໃຈການສົ່ງເສີມການຮ່ວມມືລະຫວ່າງທຸລະກິດ ລາວ-ຈີນ ຢຸນນານ ໃຫ້ເປັນຮູບປະທຳ ແລະ ມີປະສິດທິຜົນ ໃນແຕ່ລະຂະແໜງການເຊັ່ນ: ກະສິກຳ, ໂລຈິສຕິກ, ການຄ້າ, ການທ່ອງທ່ຽວ, ແຮ່ທາດເປັນຕົ້ນ.

ການຢ້ຽມຢາມໃນຄັ້ງນີ້ ໄດ້ມີຜູ້ເຂົ້າຮ່ວມ ຈາກ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ສະພາການຄ້າ ແຂວງ ຢູນນານ, ຫ້ອງການຜູ້ຕ່າງໜ້າສະພາການຄ້າ ແລະ ອຸດສາຫະກຳແຫ່ງຊາດລາວ ປະຈຳແຂວງ ຢູນນານ, ສະມາຄົມນັກທຸລະກິດໜຸ່ມ ແຂວງ ຢຸນນານ, ສະມາຄົມອຸດສາຫະກຳການປູກພືດທົດແທນ ແຂວງ ຢຸນນານ ແລະ ສະມາຄົມເຄື່ອງມື, ເຄື່ອງຈັກໂລຫະ ແຂວງ ຢູນນານ.