ສູນບໍລິການອາຊີວະສຶກສາແບບຄວບຄູ່ ປະຈໍາສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ໂດຍຮ່ວມກັບ ກົມອາຊີວະສຶກສາ ກະຊວງສຶກສາທິການ ແລະ ກິລາ ໄດ້ຈັດກອງປະຊຸມປຶກສາຫາລືຂຶ້ນໃນວັນຈັນ  ວັນທີ 6 ເດືອນ ກໍລະກົດ 2020 ທີ່ ສຄອຊ.

ໃຫ້ກຽດເປັນປະທານກອງປະຊຸມ ໂດຍມີ ທ່ານ ວັນທອງ ສິດທິກຸນ ຮອງປະທານ ສຄອຊ ແລະ ທ່ານ ສົມລິດ ວິຣິິວົງ ຮອງຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ, ມີຜູ້ເຂົ້າຮ່ວມຈາກກະຊວງສຶກສາທິການ ແລະ ກິລາ, ຫ້ອງການສະພາອາຊີວະສຶກສາແຫ່ງຊາດ, ຊ່ຽວຊານໂຄງການ VELA, ຄະນະເລຂາທິການ, ພະແນກແວດລ້ອມທຸລະກິດ ສະພາການຄ້າ ແລະ ອຸດສາຫະກຳແຫ່ງຊາດ ແລະ ທິມງານ ສູນບໍລິການ ອສຄ.

ຈຸດປະສົງຂອງກອງປະຊຸມ ແມ່ນ ເພື່ອປຶກສາຫາລື ແລະ ແລກປ່ຽນຄວາມຄືບໜ້າ ໃນການດຳເນີນງານ ແລະ ກຳນົດທິດທາງໃນການກະກຽມການເປີດ ສູນບໍລິການ ອາຊີວະສຶກສາແບບຄວບຄູ່ ຢ່າງເປັນທາງການ. ພາຍຫລັງກ່າວຈຸດປະສົງຂອງກອງປະຊຸມແລ້ວ ທ່ານປະທານກອງປະຊຸມກໍ່ໄດ້ມີຄຳເຫັນຕໍ່ກອງປະຊຸມ ໂດຍທ່ານໄດ້ເນັ້ນຄວາມໝາຍຄວາມສໍາຄັນໃນການຈັດກອງປະຊຸມຮ່ວມກັບພາກລັດ ເພື່ອແລກປ່ຽນຄວາມຄິດເຫັນໃນການຈັດຕັ້ງປະຕິບັດກິດຈະກໍາຂອງສູນບໍລິການ ສອຄ ແລະ ການເປີດຕົວສູນບໍລິການ ອສຄ ຄຽງຄູ່ກັບວາລະການເປີດກອງປະຊຸມໃຫຍ່ຂອງ ສຄອຊ. ທ່ານປະທານຮ່ວມ ກໍ່ໄດ້ຖືໂອກາດນີ້ຢັ້ງຢືນວ່າການປະຕິຮູບອາຊີວະສຶກສາຍັງສືບຕໍ່ເຮັດຕະຫລອດເພື່ອພັດທະນາໃຫ້ທັນກັບສະພາບການໃນຂົງເຂດປະເທດສະມາຊິກອາຊຽນ. ໂດຍສະເພາະໃນໄລຍະຖືກກະທົບຈາກການລະບາດຂອງພະຍາດອັກເສບປອດ ໂຄວິດ 2019 ສູ່ໃນເງື່ອນໄຂການດໍາລົງຊີວິດແບບໃໝ່ ຫຼື New Normal ນີ້ຍິ່ງຕ້ອງໄດ້ເອົາໃຈໃສ່ເພີ່ມຂຶ້ນ.

ກອງປະຊຸມໄດ້ຮັບຟັງການສະເໜີ ຄວາມເປັນມາຂອງການສ້າງຕັ້ງ ສູນບໍລິການ ອສຄ ແລະ ຜົນການຈັດຕັ້ງປະຕິບັດກິດຈະກໍາຂອງ ສູນບໍລິການ ອສຄ ໃນໄລຍະຫົກເດືອນທ້າຍປີ 2019 ແລະ ຫົກເດືອນຕົ້ນປີ 2020, ການນໍາສະເໜີແຜນການຈັດຕັ້ງປະຕິບັດກິດຈະກໍາຫົກເດືອນທ້າຍປີ ແລະ ແຜນສະເພາະໃນສາມເດືອນຂ້າງໜ້າ (ກໍລະກົດ-ສິງຫາ-ກັນຍາ, 2020) ພ້ອມທັງການປຶກສາຫາລື ແນວທາງການຈັດຕັ້ງປະຕິບັດ ໃນການກະກຽມການເປີດ ສູນບໍລິການ ອສຄ ຢ່າງເປັນທາງການ.

ການສົ່ງເສີມອາຊີວະສຶກສາ ໄປຄຽງຄູ່ກັບສະພາການຄ້າ ຫຼື ອາຊີວະສຶກສາ ແລະ ພາກທຸລະກິດ ແມ່ນໜຶ່ງໃນຍຸດທະສາດຫຼັກຂອງສະພາການຄ້າ ແລະ ອຸດສາຫະກໍາແຫ່ງຊາດ ໃນການພັດທະນາຊັບພະຍາກອນມະນຸດ ແລະ ອາຊີວະສຶກສາແບບຄວບຄູ່ ຫຼື DCT ແມ່ນກົນໄກອັນສຳຄັນທີ່ຈະສ້າງໃຫ້ນັກນັກຮຽນ-ນັກສຶກສາມີຄວາມພ້ອມເຂົ້າສູ່ຕະຫລາດແຮງງານ ໂດຍການຮຽນຮູ້ຈາກທັງທິດສະດີ ຈາກວິທະຍາໄລອາຊີວະສຶກສາ ແລະ ການຮຽນຮູ້ ປະສົບການຕົວຈິງຈາກການຮຽນປະຕິບັດໃນສະຖານທີ່ເຮັດວຽກຕົວຈິງ.