ງານມອບລາງວັນທຸລະກິດອາຊຽນດີເດັ່ນແຫ່ງ ສປປ ລາວ ແລະ ລາງວັນການພັດທະນາສີມືແຮງງານ ປະຈຳປີ 2021 (ASEAN Business Awards Laos & Skill Development 2021)

ສະພາການຄ້າ ແລະ ອຸດສາຫະກໍາ ແຫ່ງຊາດລາວ (ສຄອຊ) ພາຍໃຕ້ການສະໜັບສະໜູນໂດຍໂຄງການ ພັດທະນາອະຊີວະສຶກສາ (RECOTVET) ຂອງ ອົງການຮ່ວມມື ລາວ-ເຢຍລະມັນ (GIZ) ປະຈຳລາວ ໄດ້ຈັດງານ “ມອບລາງວັນທຸລະກິດອາຊຽນດີເດັ່ນແຫ່ງ ສປປ ລາວ ລາງວັນການພັດທະນາສີມືແຮງງານ ປະຈຳປີ 2021 ” (ASEAN Business Awards Laos and Skill Development)  ຂື້ນໃນຕອນຄໍ່າຂອງວັນສຸກ, ວັນທີ 4 ກຸມພາ 2022 ທີ່ຜ່ານມາເຊິ່ງກ່າວເປີດງານໂດຍ ທ່ານ ທະນົງສິນ ກັນລະຍາ ໃນນາມສະມາຊິກສະພາທີ່ປຶກສາທຸລະກິດອາຊຽນ ແລະ ທັງເປັນ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ໃຫ້ກຽດເຂົ້າຮ່ວມໂດຍ ພະນະທ່ານ ສຈ. ປອ. ກິແກ້ວ ໄຂຄຳພິທູນ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ປອ ຄຳເເພງ ໄຊສົມແພງ, ກຳມະການສູນກາງພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານເອກອັກຄະລັດຖະທູດສະຫະພັນເຢຍລະມັນ ປະຈຳລາວ ແລະ ຜູ້ສື່ຂ່າວ ລວມເຖິງບັນດານັກທຸລະກິດ ທີ່ ຊະນະເລີດໄດ້ຮັບ “ລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ແລະ ລາງວັນການພັດທະນາສີມືແຮງງານ ປະຈຳປີ 2021 ” (ASEAN Business Awards Laos and Skill Development) .

ທ່ານ ທະນົງສິນ ກັນລະຍາ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ກ່າວວ່າຈຸດປະສົງຕົ້ນຕໍຂອງການຈັດງານມອບລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ (ABA Laos) ລາວແມ່ນເພື່ອຮັບຮູ້ວິສາຫະກິດທີ່ມີຊື່ສຽງໃນລາວທີ່ມີຄວາມຄິດສ້າງສັນ ແລະ ຕອບສະຫນອງຕໍ່ຄວາມຕ້ອງການຂອງຕະຫຼາດລາວ ໄດ້ເນັ້ນໃຫ້ເຫັນວ່າຜູ້ຊະນະເລີດໃນຄ່ຳຄືນນີ້ມີຄວາມພ້ອມທີ່ຈະແຂ່ງຂັນບໍ່ພຽງແຕ່ຢູ່ໃນປະເທດລາວເທົ່ານັ້ນແຕ່ລວມເຖິງໃນລະດັບພາກພື້ນອີກດ້ວຍ.

ນອກນີ້ຍັງເປັນການສົ່ງເສີມສ້າງຄວາມເຂັ້ມແຂງໃຫ້ແກ່ຫົວໜ່ວຍທຸລະກິດໃນແຕ່ລະຂະແໜງການ ແລະ ເພື່ອຍ້ອງຍໍຊົມເຊີຍຜູ້ທີ່ມີຜົນງານດີເດັ່ນປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດໃຫ້ຈະເລີນກ້າວໜ້າງານລາງວັນນີ້ແມ່ນຢູ່ພາຍໃຕ້ກອບວຽກລະດັບພາກພື້ນທີ່ເອີ້ນວ່າ ກອງປະຊຸມສຸດຍອດທຸລະກິດ ແລະ ການລົງທຶນອາຊຽນ ແລະ ການຈັດງານທຸລະກິດດີເດັ່ນ ອາຊຽນ  (ASEAN-BIS), ບັນດາວຽກງານເຫລົ່ານີ້ແມ່ນຈະຢູ່ພາຍໃຕ້ການຊີ້ນໍາ ແລະ ຈັດຕັ້ງປະຕິບັດໂດຍສະພາທີ່ປຶກສາທຸລະກິດອາຊຽນ (ASEAN-BAC). ABA Laos 2021 ເປີດກວ້າງຕໍ່ສະມາຊິກ ສຄອ ແຫ່ງຊາດລາວ ແລະ ທຸກໆຫົວໜ່ວຍທຸລະກິດໃນລາວ ທີ່ລົງທະບຽນຖືກຕ້ອງຕາມກົດໝາຍ, ບໍ່ວ່ານ້ອຍ ຫຼື ໃຫຍ່ ກໍ່ສາມາດສົ່ງເຂົ້າມາສະໝັກຊິງລາງວັນໃນຂະແໜງການຕ່າງໆໄດ້.

ໃນປີນີ້ປະເພດຂອງ ABA Laos ທີ່ກໍານົດໄວ້ແມ່ນສອດຄ່ອງກັບຄວາມຕ້ອງການຂອງລາງວັນທຸລະກິດອາຊຽນ 2021 (ASEAN Business Award 2021) ເຊິ່ງຈັດຂຶ້ນ ທີ່ ປະເທດ ບູໄນ ໃນເດືອນພະຈິກປີ 2021 ນີ້. ເຊິ່ງໃນປີນີ້ພິເສດອີກ 1 ລາງວັນທີ່ທາງກອງເລຂາໄດ້ນຳມາເພີ່ມເຂົ້າໃນການມອບລາງວັນ ຂອງ ABA Laos ແມ່ນລາງວັນ ການພັດທະນາສີມືແຮງງານ (Skill Development) ເຊິ່ງພາຍໃຕ້ການສະໜັບສະໜູນ ຂອງ ໂຄງການພັດທະນາອະຊີວະສຶກສາ ຫລື (RECOTVET) ຂອງ GIZ ປະຈຳລາວ ເຊິ່ງລາງວັນຂະແໜງການດັ່ງກ່າວນີ້ຜ່ານມາແມ່ນຈັດຂື້ນໃນແຕ່ລະດັບອາຊຽນເທົ່ານັ້ນ, ດັ່ງນັ້ນ ສຄອຊ ເຮົາ ແລະ ໂຄງການພັດທະນາອະຊີວະສຶກສາ ຈຶ່ງໄດ້ເລັງເຫັນຄວາມຫມາຍຄວາມສຳຄັນ ຕໍ່ກັບລາງວັນດັ່ງກ່າວ ຈຶ່ງໄດ້ຮ່ວມກັນນຳເອົາລາງວັນສາຂາດັ່ງກ່າວເຂົ້າມາເປັນ 1 ໃນລາງວັນ ຂອງ ABA Laos ໃນປີ 2021 ນີ້. ຈຸດປະສົງແມ່ນເພື່ອເປັນການຍົກບົດບາດ ໃຫ້ກັບ ວິສາຫະກິດລາວໃຫ້ໂດດເດັ່ນຂື້ນໃນເວທີ ພາກພື້ນ ແລະ ສາກົນ ໂດຍສະເພາະແມ່ນການເຂົ້າຮ່ວມປະຊາຄົມເສດຖະກິດອາຊຽນ ນອກນີ້ຍັງເປັນການສະແດງໃຫ້ເຫັນການດຳເນີນທຸລະກິດທີ່ບົ່ງບອກເຖິງການປະກອບສ່ວນທີ່ສຳຄັນເຂົ້າໃນການພັດທະນາແຫຼ່ງຊັບພະຍາກອນມະນຸດການພັດທະນາແຮງງານທີ່ມີທັກສະ, ໂດຍສະເພາະແມ່ນສະໜອງແຮງງານເລົ່ານັ້ນໃຫ້ກັບທຸລະກິດຂະແໜງການຕ່າງໆ ແລະ ອຸດສາຫະກຳ 4.0 ເພື່ອໃຫ້ສາມາດເເຂ່ງຂັນທາງດ້ານກົນໄກການພັດທະນາເສດຖະກິດ ຂອງ ສປປ ລາວ ໂດຍສຸມໃສ່ຄວາມຕ້ອງການທີ່ຈະສ້າງຄວາມເຂັ້ມແຂງດ້ານວິຊາການ ແລະ ວິຊາຊີບດ້ານສີມືແຮງງານຂອງ ສປປລາວ.

ເຊິ່ງພາຍໃນງານຍັງໄດ້ເຊື້ອເຊີນ ນັກທຸລະກິດລາວຈຳນວນ 4 ບໍລິສັດ ເຊັ່ນ: ບໍລິສັດ ASEAN Contact Center Co., Ltd ກຸ່ມບໍລິສັດ ດາວເຮືອງ ຈຳກັດ, ບໍລິສັດ ອອກພົບຕົກ ແລະ ໂຮງແຮມ ອັງສານາ ເມຊົງ ສຸວັນນະພູມ ທີ່ໄດ້ຮັບລາງວັນຊະນະເລີດ ລາງວັນທຸລະກິດອາຊຽນດີເດັ່ນ ປະຈຳປີ 2021 ທີ່ ປະເທດ ບູໄນ ເປັນເຈົ້າພາບໃນປີ 2021 ມາເຂົ້າຮ່ວມຮ່ວມງານ ເພື່ອຮ່ວມຖ່າຍຮູບຮອບພິເສດ ຮ່ວມກັບ ພະນະທ່ານ ຮອງນາຍົກລັດຖະມົນ ແຫ່ງ ສປປລາວ, ລັດຖະມົນຕີກະຊວງອຸດສາຫະກຳ ແລະ ການຄ້າ, ຄະນະສະພາທີ່ປຶກສາທຸລະກິດອາຊຽນລາວ ເພື່ອເປັນການຍ້ອງຍໍຊົມເຊີຍ ແລະ ຖ່າຍຮູບໄວ້ເປັນທີ່ລະນຶກ.

ງານຊິງລາງວັນຄັ້ງນີ້ໄດ້ຮັບການກວດສອບ ແລະ ຕັດສິນນອກຈາກຕົວແທນ ຈາກ ພາກລັດ, ຄະນະຜູ້ຕາງຫນ້າຂອງສະຖາບັນການສຶກສາລາວ, ຕາງໜ້າຈາກສື່ມວນຊົນ, ແລະ ພາກທຸລະກິດ ແມ່ນຍັງໄດ້ຮ່ວມມືກັບບໍລິສັດ KPMG ເພື່ອຮັບປະກັນຄວາມໂປ່ງໃສ, ຄວາມຍຸດຕິທໍາ ແລະ ຄວາມເປັນມືອາຊີບເຂົ້າໃນຂະບວນການຄັດເລືອກ ແລະ ຕັດສິນຜູ້ຊະນະເລີດລາງວັນ.

ເຊິ່ງ ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ເນັ້ນຫນັກກ່ຽວກັບຄວາມສໍາຄັນຂອງເວທີດັ່ງກ່າວນີ້ໃນການສົ່ງເສີມຄວາມຫມັ້ນໃຈໃຫ້ແກ່ຜູ້ປະກອບການ SMEs ລາວທີ່ໄດ້ປະສົບຜົນສໍາເລັດໃນການເຮັດທຸລະກິດທີ່ຫນ້າເຊື່ອຖື ແລະ ມີຄວາມຮັບຜິດຊອບໃນ ສປປ ລາວ. ການຮັບຮູ້ມາດຕະຖານສູງດັ່ງກ່າວຈະເຮັດໃຫ້ທຸລະກິດລາວມີຄວາມຫນ້າເຊື່ອຖືຫຼາຍ ແລະ ຈະກາຍເປັນຂົງເຂດທີ່ມີຄວາມຫມັ້ນໃຈໃນການນໍາໃຊ້ສະມາຄົມເສດຖະກິດອາຊຽນຢ່າງເຕັມສ່ວນ ໂດຍສະເພາະໃນສະພາບການເເຜ່ລະບາດ ຂອງ ພະຍາດໂຄວິດ-19 ໃນຫລາຍປະເທດສະມາຊິກອາຊຽນ.

ລາງວັນດັ່ງກ່າວຖືກຈັດເປັນ 3 ປະເພດໃຫຍ່ຄື: ລາງວັນຂະແໜງບູລິມະສິດບູດີເດັ່ນຂອງລາວ, ລາງວັນທຸລະກິດ SME ດີເດັ່ນ ແລະ ປະເພດລາງວັນພິເສດ.

ສະຫລຸບຈຳນວນປະເພດລາງວັນ ແລະ ທຸລະກິດ ທີ່ໄດ້ຮັບລາງວັນໃນປີນີ້