ຄະນະພັດທະນາທຸລະກິດກະສິກຳ ປະຈຳ ສະພາການຄ້າ ແລະ ອຸດສາຫະກຳ ແຫ່ງຊາດລາວ ນໍາໂດຍ ທ່ານ ບຸນເລີດ ຫຼວງປະເສີດ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ)

ທ່ານ ບຸນທ່ຽງ ລັດຕະນະວົງ,ຮອງປະທານ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ ແລະ ກຸ່ມຜະລິດກະສິກຳ ເມືອງຫາດຊາຍຟອງ ໄດ້ລົງຢ້ຽມຢາມ ແລະ ເຮັດວຽກນໍາປະຊາຊົນ ບ້ານນາຄັນທຸງ, ບ້ານຫົວນາ, ບ້ານໂນນສະອາດ ເມືອງໄຊທານີ, ນະຄອນຫຼວງວຽງຈັນ ໃນວັນທີ 31 ກໍລະກົດ 2021, ຈຸດປະສົງ ຕົ້ນຕໍ ແມ່ນເພື່ອເປັນການລົງເກັບກຳ ແລະ ແລກປ່ຽນຂໍ້ມູນ ເພື່ອຮັບຮູ້ເຖິງ ສະພາບການຜະລິດ,ໂດຍສະເພາະແມ່ນທ່າແຮງ ແລະ ບັນຫາຕ່າງໆ ເພື່ອຊອກຫາວິທີທາງໃນການສົ່ງເສີມປະຊາຊົນໃນເຂດບ້ານດັ່ງກ່າວກ່ຽວກັບການປູກເຫັດ ແລະ ລ້ຽງໄກ່ລາດ, ເພີ່ມການສ້າງວຽກເຮັດງານທໍາ ແລະການສ້າງລາຍຮັບໃຫ້ນັບມື້ນັບຫຼາຍຂື້ນ, ຮັບປະກັນການສະໜອງສິນຄ້າເພື່ອຫຼຸດຜ່ອນການນໍາເຂົ້າຈາກຕ່າງປະເທດ. ອີງຕາມສະພາບຕົວຈິງໃນປະຈຸບັນ ປະຊາຊົນເຂດບ້ານດັ່ງກ່າວຍັງຂາດປະສົບການດ້ານວິຊາສະເພາະ, ມີທຶນຮອນທີ່ຈຳກັດ, ມີການຜະລິດພໍໃຜພໍລາວກະແຈກກະຈາຍ ເຮັດໃຫ້ລາຄາສິນຄ້າມີການເໜັງຕີງສູງ ເພາະຜູ້ຄ້າຂົນກາງເປັນຜູ້ກຳນົດລາຄາ ສົ່ງຜົນກະທົບຕໍ່ລາຍຮັບຂອງຜູ້ຜະລິດ ແລະ ມີຄວາມຫຍຸ້ງຍາກສົມຄວນໃນການເຂົ້າຫາຕະຫຼາດ.

ອີງຕາມການປຶກສາຫາລືໃນກອງປະຊຸມ ກັບແຕ່ລະບ້ານຢ່າງກົງໄປກົງມາ, ທ່ານ ບຸນເລີດ ຫຼວງປະເສີດ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ຫົວໜ້າຄະນະພັດທະນາທຸລະກິດກະສິກຳ ປະຈຳ ສຄອຊ ໄດ້ມີຄຳເຫັນ ແນະນຳ ປະຊາຊົນຜູ້ຜະລິດໃນໝູ່ບ້ານຕ້ອງມີຄວາມສາມັກຄີ ເປັນຈິດໜື່ງໃຈດຽວ, ຊ່ວຍເຫຼືອເຊິ່ງກັນແລະກັນ ແລະ ຈັດຕັ້ງເປັນກຸ່ມ ຫຼື ສະຫະກອນ ໃນການສັງລວມຂໍ້ມູນຕົວຈິງແລະທ່າແຮງທີ່ຈະສາມາດຜະລິດໄດ້ ເຊິ່ງ ຄະນະພັດທະນາທຸລະກິດ ປະຈຳ ສຄອຊ ຈະພະຍາຍາມຊອກຫາວິທີທາງເພື່ອມາໃຫ້ການສະໜັບສະໜູນ ບໍ່ວ່າຈະເປັນການສ້າງຄວາມເຂັ້ມແຂງໃຫ້ແກ່ກຸ່ມການຜະລິດ, ດ້ານວິຊາສະເພາະ, ການອຳນວຍຄວາມສະດວກໃນການເຂົ້າຫາແຫຼ່ງທືນ, ການເຂົ້າຫາຕະຫຼາດ ແລະ ອື່ນໆ ເພື່ອເຮັດໃຫ້ປະຊາຊົນຜູ້ຜະລິດສາມາດຫຼຸດຜ່ອນຕົ້ນທຶນ, ຮັບປະກັນທາງດ້ານປະລິມານແລະຄຸນນະພາບຂອງສິນຄ້າ, ສ້າງເສດຖະກິດຄອບຄົວທີ່ມີລາຍຮັບທີ່ສູງຂື້ນ, ປະກອບ ສ່ວນໃນການສ້າງສາພັດທະນາປະເທດຊາດໃຫ້ນັບມື້ນັບຂະຫຍາຍຕົວ.’