ວັນທີ 22 ມີນາ 2022, ທີ່ ນະຄອນຫລວງວຽງຈັນ.  ສະພາການຄ້າ ແລະ ອຸດສາຫະກໍາແຫ່ງຊາດລາວ, ພາຍໃຕ້ການສະໜັບສະໜູນຂອງໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ, ໄດ້ຈັດກອງປະຊຸມພາກທຸລະກິດ ສໍາລັບຂະແໜງການທ່ອງທ່ຽວຂື້ນ ພາຍໃຕ້ກົນໄກ ທຸລະກິດລາວ ທີ່ໂຮງແຮມລາວພຣາຊ່າ.

ຈຸດປະສົງຂອງກອງປະຊຸມກໍ່ເພື່ອເປັນເວທີເປີດກວ້າງສໍາລັບຫົວໜ່ວຍທຸລະກິດໃນຂະແໜງການທ່ອງທ່ຽວ ໃນການປຶກສາຫາລື ກໍານົດບັນຫາທີ່ເປັນບັນຫາບູລິມະສິດຂອງຂະແໜງການ ແລະ ວິທີແກ້ໄຂ ທີ່ຈະສະເໜີໃຫ້ບັນດາກະຊວງ ແລະ ກົມກອງທີ່ກ່ຽວຂ້ອງ ເພື່ອພິຈາລະນາແກ້ໄຂ.

ກອງປະຊຸມດັ່ງກ່າວແມ່ນໄດ້ຮັບກຽດ ເປັນປະທານຮ່ວມໂດຍ ທ່ານ ຄໍາຫລ້າ ພົມມະວັນ, ປະທານ ຄະນະໜ່ວຍງານປຶກສາຫາລື ພາກທຸລະກິດຂະແໜງການທ່ອງທ່ຽວ, ທ່ານ ປະກາສິດ ຈັນທະປັນຍາ, ປະທານສະມາຄົມ ໂຮງແຮມ ແລະ ຮ້ານອາຫານ, ແລະ ທ່ານ ພູໄຊ ເທບພະວົງ, ເລຂາທິການສະພາການຄ້າ ແລະ ອຸດສາຫະກໍາ ແຫ່ງຊາດລາວ. ນອກນັ້ນ, ຍັງມີບັນດາຜູ້ເຂົ້າຮ່ວມກໍຄື ຕາງໜ້າ ຈາກ ສະມາຄົມທຸລະກິດທ່ອງທ່ຽວ ແລະ ສະມາຊິກ, ສະມາຄົມໂຮງແຮມ ແລະ ຮ້ານອາຫານ, ສະມາຄົມໄກ໋ນໍາທ່ຽວ, ກຸ່ມບໍລິການເຊົ້າລົດ, ແລະ ສາຍການບິນ.

ທ່ານ ຄໍາຫລ້າ ພົມມະວັນ, ປະທານ ຄະນະໜ່ວຍງານປຶກສາຫາລື ພາກທຸລະກິດຂະແໜງການທ່ອງທ່ຽວ ໄດ້ກ່າວໃນບົດເປີດກອງ ປະຊຸມ ໂດຍໄດ້ເນັ້ນຢໍ້າເຖິງຄວາມສໍາຄັນຂອງກອງປະຊຸມພາກທຸລະກິດ ແລະ ໝູນໃຊ້ເວທີນີ້ໃນການສະເໜີບັນຫາຕ່າງໆທີ່ເປັນຜົນກະທົບຕໍ່ການເຕີບໃຫ່ຍຂອງທຸລະກິດຂອງພວກເຂົາ.

ປະທານ ສະມາຄົມໂຮແຮມ ແລະ ຮ້ານອາຫານ, ທ່ານ ປະກາສິດ ຈັນທະປັນຍາ, ຍັງໄດ້ ຮຽກຮ້ອງໃຫ້ສະມາຊິກຂອງຕົນທີ່ເຂົ້າຮ່ວມໃນກອງປະຊຸມຄັ້ງນີ້ ແລກປ່ຽນສົນທະນາຢ່າງຫ້າວຫັນ, ແລະ ກົງໄປກົງມາ ເພື່ອພ້ອມກັນສະເໜີບັນຫາຕໍ່ພາກລັດໃຫ້ແກ້ໄຂຢ່າງຈິງຈັງ.

ທ່ານ ພູໄຊ ເທບພະວົງ, ຫົວໜ້າກອງເລຂາກົນໄກກອງປະຊຸມທຸລະກິດລາວ ທັງເປັນ ເລຂາທິການ ສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ອະທິບາຍໃຫ້ຜູ້ເຂົ້າຮ່ວມເຂົ້າໃຈໃນກົນໄກກອງປະຊຸມທຸລະກິດລາວ ໂດຍສະເພາະ ກອງປະຊຸມພາກທຸລະກິດ ແລະ ຂັ້ນຕອນໃນຕໍ່ໜ້າພາຍຫລັງທີ່ມີກອງປະຊຸມພາກທຸລະກິດ.

ບັນຫາທີ່ຖືກຍົກຂື້ນໃນກອງປະຊຸມມື້ນີ້ລວມມີ: ຂັ້ນຕອນການນໍານັກທ່ອງທ່ຽວເຂົ້າມາ, ການນໍາໄຊ້ລະບົບດີຈີຕອລແທນເອກະສານນໍາເຂົ້ານັກທ່ອງທ່ຽວ, ການສໍາປະທານແຫລ່ງທ່ອງທ່ຽວຂອງລັດ, ຂັ້ນຕອນການແລ່ນເອກະສານ, ແຫລ່ງຂໍ້ມູນຂ່າວສານທີ່ໜ້າເຊື່ອຖື, ການສ້າງຕັ້ງສະພາສົ່ງເສີມການທ່ອງທ່ຽວ, ແລະ ຄ່າທໍານຽມຜູ້ໂດຍສານຂາເຂົ້າ.

ຫລັງຈາກກອງປະຊຸມຄັ້ງນີ້, ກອງເລຂາກອງປະຊຸມທຸລະກິດລາວ ປະຈໍາ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ຈະໄດ້ລວບລວມ ສະຫລຸບບັນຫາທີ່ທາງພາກທຸລະກິດໄດ້ສະເໜີ ແລະ ກະກຽມບົດສະເໜີບັນຫາ ໄປຫາກະຊວງ ແລະ ເຈົ້າໜ້າທີ່ກ່ຽວຂ້ອງ ເພື່ອຄົ້ນຄວ້າປຶກສາຫາລືໃນກອງປະຊຸມພາກລັດ-ທຸລະກິດ ຄັ້ງຕໍ່ໄປ.